¹ Gu ngoyi bi lumbu bi sambanu bi ludi,Yesu ga bongi piela,Yagobu ye Yowani mugegi wu Yagobu.Ye ga ba nedi ye londi di mundonda wu leya,guna ba gadi ba beeni shela bwoona luudu lwandi lu balumugi pila yega gu misu ma baa, ² Mbunzu yandi yi yandigi gu sema nga dangu,miledi miandi mi gumi gu benga nga dangu. ³ Dangu di ba longogi bana ba dadu ba dadi Mososhi ye Ediya muni solula Yesu. ⁴ Piela ga ledi Yesu mbi:"Fwumu,gwedi pimbu nga bu twedi yaa.Mbi bu zodi,yi fani dunga ya bi sasandala bi dadu gi moshi mudiambu yi ndji,gi moshi mudiambu ye Mososhi,giega mudiambu ye Ediya.'' ⁵ Dangu di ga gadi muni yagula,duda,di moshi di gadi muni lema di yitshi ba fidimiga,bwoona ndaga yi dugi ye duda dina mbi:"Awu gedi mwaana wami wu yi zolaga ngolu,yedi ye gieshi gi vula mudiambu ye ndi lu mu yugilagani!" ⁶ Dangu di yugi balongogi ndaga yina,ba yugi booma bu vula,ba bwii mbunzu mu manu. ⁷ Yesu gitshi pena-pena ye baa,ga ba gami,bwoona ga yagudi mbi:"niamugani,loo gu galaniye booma!" ⁸ Dangu di ba dadi bwoona,loo ba dadi kega shi muudu,kaga Yesu buna. ⁹ Dangu di ba gadi muni gulumuga mu mundonda,Yesu ga ba hengi tshigu mbi:"loo lu fani lela shi muudu wu moshi ma pandi mana ma ba dadi gu mbona-misu,tii gwoona Gahungu ga niamugisa mwaana muudu mu lu fwaa. ¹⁰ Dangu di ba longogi bana ba yufudi Yesun mbi:"mudiambu di kii ba longi ba tshigu ba yagulaga mbi Ediya wu fani gwitsa tegu?" ¹¹ Yesu mbi:''mu kiediga,Ediya wu fani gwitsa mudiambu ye gu yidiga mapandi mootsu mu pila yi ma fani gala. ¹² Haa yi ba lu lela mbi Ediya wu yitshi tunda,bwoonabaadu loo ba mu yabagi,tunda ba mu hangi mapandi mootsu ma ba zolagi.'' ¹³ Pila yi moshi kega ba dadisa mwaanamuudu pashi,bwoona ba longogi ba yabagi mbi ga ba balela mudiambu ye Yowani mbodigi. ¹⁴ Dangu di bitshi wana kega baadu,muudu wu moshi gi tshi fugamana gu milu mi Yesu, ¹⁵ Bwoona ga mu ledi mbi:"fwumu,yugila mwaana wami kenda,gedi ye gikashi gi gugona ga dalaga pashi dji vula.mudiambu mbala dji vula,ga bwaagaga gu mbaa mbilo mu mwetshi. ¹⁶ Yi mu nedi gwedi ba longogi bagu,haa loo ba dadi pila yi gu mu gindisa.'' ¹⁷ Bwoona Yesu mbi ah,binu baadu baa ba gondaga gwigila,binu baadu lu bidi ndjila yi pimbu!Yi fani gala ye binu tii kii dangu?Yi fani lu gangila mbundu tii kii dangu?yi zani lu nedila yaa.'' ¹⁸ Yesu ga nganini mu hunga wu mbi,bwoona ga dugi gwedi mwaana wuna.Mu dangu diadina kaga mwaana ga gindi. ¹⁹ Bwoona ba longogi bitshi yufula Yesu :"mudiambu di kii du gondi dala pila yi gu dusa mihunga mina?" ²⁰ Yesu mbi:"mudiambu loo lwedi ye lu gwigilu lu gulunga.Yi ba lulela mapandi ma kiediga:"mbi lu gala ye gandambu ga lugwigilu nga ga lu ndumba ga mudi wu mutarde lu kadi lela mu ndonda wu:"ga duga yaa nda bwaa guna,ga kada gwenda,''lu kadi dala pila yi gu hanga mapandi mootsu! ²¹ Mu gudusa muhunga wu pila yina loo wu fani hanga gima giega,haa wu fani sambila Gahungu ye gu duna gu dia. ²² Dangu di ba gadi gu bula di gadileya,Yesu ga ledi ba longogi mbi:"ba hega mwaana muudu gu mioogu mi baadu, ²³ Bwoona bu ba muzuwa,haa mu gilumbu gi dadu Gahungu bu ga mushamugisa mu lufwaa.''Dangu di kenda dji ba gami dji vula. ²⁴ Dangu Yesu ye ba longogi baandi ba gumi gu bula di gapedinahumu,ba dulagi du bidadi du nzu yi Gahungu yi ba yuda bitshi yu fula piela mbi:"haa longi wu binu ga fudaga gi dadi gi nzu yi Gahungu?" ²⁵ Pedelu mbi:"egaa''.Dangu di ga fudaga mu nzu .Dangu pedelu di ga godi mu nzu,Yesu muudu wu tegu ga yandigi gu yagula mbi:"Shimoni,kii wu bayindula?Ba naa ba fudaga gidadi gi ba fwumu ba gifudi gii?Baadu ye ba nzenji?" ²⁶ Pedelu mbi:"ba nzenji.''Yesu mbi:"bwoona baadu loo ba fani fuda gidadi.'' ²⁷ Haa loo duzodi gu hega baadu baa pashi gu mbundu.Bwoona ndaa ye yanga,lumba ndobu loba mu mwetshi;swangula mbitshi wu tegu.Bwoona bu dala lu ndondu lu mbongu gu ganu diandi.Gu fani mu gu fudila gidadi gi nzu yi Gahungu mudiambu ye mi ye ndji,senda ndaa wu fuda gidadi gi pidu gwedi baa.