¹ Dangu di,bafadishi beega ye balongi bega batshigu ba dugi gu Yelusalemi,bitshi yufula Yesu mbi: ² "mudiambu di kii balongogi bagu loo ba landaga tshigu dji ba mbuda ba teegu?Gu misu yi gudia,loo ba yebisaga gu mioogu nga bu bayagula bisambu bi pidu!'' ³ Yesu ga ba vududidi mbi:"bwoona binu,mudiambu di kii lu landaga tshigu dji binu beeni,haa binu loo lu landaga tshigu dji Gahungu? ⁴ Mudiambu Gahungu ga yagudi mbi:'djidisa dada ye ngudi woogu,'gayagudi kega mbi:'muudu wuna wu gonda djidisa dada ye ngudi wandi gafani fwaa.' ⁵ Haa binu lu bayagula mbi:'muudu bu gayagudi gwedi dada ye ngudi wandi mbi:"lusadisu lwootsu lu yi zolagi gu guhega,gwedi magabu mana ma swegi mudiambu ye guhega Gahungu,''' ⁶ mfwunu loo yedi mbi mu gu djidisa dada wandi.Bwoona,lu zuwaga mapandi mana ma Gahungu ma ga yagulaga;ya yena lu landagagi matsigu ma binu beeni. ⁷ Binu baadu ba bupala,yezaya ga gudi mapandi ma kiediga dangu di ga yagudi gu twala mapandi ma binu mbi: ⁸ 'Gahungu ga yagulaga mbi:baadu ba ndjidisagagi kaga gu ganu,haa loo mbi gu mbundu. ⁹ Bisambu bina bi ba sambilaga biedi bi pamba,mudiambu ba longaga tshigu gwedi baadu bootsu mbi djedi malongi ma Gahungu!"' ¹⁰ Dangu di,Yesu ga lendigi baadu,bwoona ga ba ledi mbi:"yugani,lu fani yaba mbi. ¹¹ Madia mana godaga mu ganu di muudu loo ma mugumisagagi mvindu;haa mapandi mana ma dugaga mu ganu djandi,maa mana ma gusagagi mvindu. ¹² Dangu di,balungugi bitshi yufula Yesu mbi:"wu yabi mbi mapandi mana maa wu yagudi ma hegi bafadishi pashi gu mbundu?'' ¹³ Yesu mbi:''dada wami wuna weedi gu yilu ga tsumuna bi menina biootsu bina bi ga gondi guna. ¹⁴ Yambulani bafadishi!beedi ba mitwadishi ba fwii misu,mbi muudi wu moshi wu fwii misu ga ba needa weega wu fwii misu,ba boodi ba fani bwaa muwulu. ¹⁵ Piela ga ledi Yesu mbi:"du dendudila gingana gii," ¹⁶ Yesu mbi:"binu kega,loo yandu lu yabi? ¹⁷ Loo yandu lu yabi mbi madia mana mootsu ma godaga mu ganu di muudu ma ludaga mu zumu,bwoona gu ngoyi,ma dugaga ye ndjila? ¹⁸ Haa mapandi mana ma dugaga gu ganu,ma dugaga gu mbundu.Mapandi maa mana ma gumisaga muudu mu mbii. ¹⁹ Mudiambu mabanza ma mbii mana ma dugaga gu mbundu yi muudu maa mana ma munedaga mu gu zuwa baadu,mu gu hanga gi ndumbu,mu gu hanga mapandi ma tsooni,mu gu yiba,mu gu yagula bupala ye gu venza baadu beega. ²⁰ Mapandi maa mana ma gumisaga muudu mu mbii.Haa mbi muudu bu ga di wu shi loo gu sugula gu mioogu miandi,loo ma fani mugumisa muudu mu mbii. ²¹ Dangu di,Yesu ga gadugi yena,bwoona gendi gu ndambu gu bula Tiidi ye Shidoni. ²² Mukedu wu moshi mu gu gifudi gi Ganana ga djinga mu gi djini gina.Gitshi mu gu lela Yesu mu ndaga yi ngolu mbi:"Fwumu,mwaana wu Davidi nzuga kenda!Mwaana wami wu mukedu geedi ye mihunga mimbi,bwoona ga ba dala pashi dji vula.'' ²³ Haa Yesu loo ga muledi shi gima gi moshi.Balongogi ba Yesu bitshi mu wondila mbi:''mutshadigisa,ga ba saa loolu di vula mudiambu yi gaba gwisa du landa.'' ²⁴ Bwoona Yesu ga ba ledi mbi:"Gahungu ga tumi mudiambu baadu ba yishiledi bana beedi nga mamema maa mabidi.'' ²⁵ Haa mukedu wuna gitshi fugamana gu milu mi Yesu,bwoona ga yagudi mbi:"fwumu,kulusa.'' ²⁶ Yesu mbi:"loo gwedi pimbu mu gu senda mapaa ma baana mu gu hega ba mbwaa.'' ²⁷ Mukedu mbi:"eh fwumu,gwedi mu kiediga,haa shi ba mbwaa keega ba diagaga bidini bi mapaa bina bi bwagaga gu mashina ma mesa ma ba fwumu ba baa.'' ²⁸ Bwoona Yesu ga mu ledi mbi:"weedi mukedu wu moshi wuna weedi ye lugwigilu lu ngolu!mapandi mana wu zodi,bu mahangamana.''Mu dangu diadina mwaana wandi ga gindi. ²⁹ Yesu ga gadugi yena,bwoona gendi pena-pena di yanga di galileya.Gendi shimuguga ye longa di munda wu moshi. ³⁰ Baadu ba vula bitshi mu nedila bigada,ba fwii misu,bi hulu ye bakashi ba vula.bendi ba dulula ye milu ma Yesu,bwoona ga ba gindishi. ³¹ Baadu ba yidugi ngolu dangu di ba daadi bihulu muni yagula,bi gada muni niamuga,bi fwaa muni dala,bwoona ba yandigi gu gumisa Gahungu wu shiledi. ³² Yesu ga lendigi balongugi bandi,bwoona ga yagudi mbi:"yi ba dala kenda mudiambu ye baadu baa,mudiambu beedi ye mi yaa bilumbu bidadu bi mvimba;loo beedi shi gima gi gudia.Loo yi zoodi gu ba vudula mu gwenda gu ma nzu ma baa ye nzala;dangu diega ba lembwa ngolu mu ndjila.'' ³³ Balongugi ba mu yufudi mbi:"yaa mu gifudi gi maganga,guni du fani dala bima bi gudia mudiambu du hega baadu baa?'' ³⁴ Yesu mbi:"lwedi ye mapaa magwi?"ba mbi:''mapaa mantsambwadi ye ndambu yi ba mbitshi ba mwetshi.'' ³⁵ Bwoona Yesu ga ledi baadu bootsu mu gushigumuga ye londi di kaya. ³⁶ Dangu di ga sendi mapaa mantsambwadi ye ba mbitshi bana,ga hegi Gahungu lugumu,ga geshi mapaa ye ba mbitshi bini-bini,ga hegi balongugi bandi,bwoona balongogi ba gabishi gwedi baadu. ³⁷ Baadu bootsu ba dii,ba yugudi.Bwoona balongogi ba yudishi bisandji bi ntsambwadi bi bini bi mapaa ye ba mbitshi bina bi saadi yatshi. ³⁸ Baadu bana ba dii ba gadi ba bagala miidi miya,haa loo badangi ba kedu ye baana. ³⁹ Bwoona Yesu galedi baadu mbi:''ndani gu binu.''Dangu di,ga godi mu bwadu,gendi gu ndambu yi Magadani.