¹ Mu dangu dina,guvedinedi Elodi antipashi ga yugi mapandi ma ba yagulagi mudiambu ye Yesu. ² Ga ledi baadu bandi mbi:''muudu wuu geedi yowani mbodiga wu shamugi mu lufwaa.Ya yena geedi ye ngolu di guhanga mapandi ma guyiduga. ³ Mudiambu Elodi ga gami Yowani,ga mugangi mishinga,bwoona ga mushi mu dangumbada,Elodi ga hangi buna mudiambu ye Elodiadi,mukedu wu mbuda wandi Filibi. ⁴ Yowani ga lela Elodi mbi:"loo wu fani dambula mukedu wu mbuda woogu.'' ⁵ Elodi ga dingi pila yi guzuwaa Yowani,haa gadina baadu booma,mudiambu ba senda Yowani nga mbigudi wu Gahungu. ⁶ Elodi ga gadi ye mwaana wandi wu mukedu.Bwoona mu gilumbu gi ba disaa nzaba yi gubuduga gu Elodi,mwaana wuna gitshi gina ye misu ma baadu ma balendigi gu nzaba.Elodi gadaadi gieshi bu vula. ⁷ Ya yena ga ledi mwaana wu mukedu wuna mbi:yi ba gesa Gahungu mbi gosu gima gina gi wu badinga,yiguhuga. ⁸ Ngudi wandi gamuledi gima gi gafani dinga;ya yena mwaana wu mukedu ga ledi Elodi mbi:"pega mudu wu Yowani mbodigi ye londi di longa!'' ⁹ Elodi ga dadi kenda dji vula,haa mudiambu ga shidi ye misu ma baadu bana ba ga lendigi ye nzaba,ya yena ga ledi muudu wandi wu moshi mbi:yi zaa wu muhega! ¹⁰ Bwoona muudu wuna gendi gesa mudu wu Yowani mbodiga mudangumbada. ¹¹ Gitshi needa mudu ye londi di longa,ga hani gwedi mwaana wandi wu mukedu,bwoona mwaana ga needi gwedi ngudi wandi. ¹² Ba longugi ba Yowani ba sendi mvumbi wu Yowani bendi gu djiga.dangu di,bendi lela Yesu mapandi mana. ¹³ Dangu Yesu di gayugi mapandi mana,ga goodi mu bwadu,ga gadugi yana,bwoona gendi gala ye gihani gina gi gafani gala ndi beeni.Dangu baadu di bayugi buna,ba gadugi mu mabula ma baa,bwoona ba landi Yesu pena-pena ye mwetshi. ¹⁴ Dangu Yesu di ga gadugi mubwadu,ga dadi baadu ba vula ba yi tshi,ga yugi kenda,bwoona ga gindishi ba pangi ba baa bana ba gadi ye makashi. ¹⁵ Mu dangu di djiami dangu,ba longi bandi bitshi mu lela mbi:"dangu di luudi ngolu,yaa kega mabula meedi gu leeya.Ba lela baadu baa benda mu mabula mudiambu ba sumba bima bi baa bi gudia. ¹⁶ Haa Yesu ga ba ledi mbi:''loo gwedi pimbu;binu beeni ba hegani bima bi gudia. ¹⁷ Baa mbi yaa twedi ye mapaa madanu buna ye ba mbitshi boodi ba mwetshi. ¹⁸ Yesu mbi:''yi zaa lu needa yaa yeedi mii.'' ¹⁹ Yesu galedi baadu bana bootsu mbi:shi mugani ye londi di bifwufu bwoona gasendi mapaa mana mootsu ye ba mbitshi bana boodi,ga dadi gu yilu,ga hegi Gahungu madonda.Ga geshi mapaa bidini-bidini,ga hegi batumwa bandi,bwoona ba tumwa ba gabishidi baadu. ²⁰ Baadu bootsu ba di,ba yugudi.Bwoona ba tumwa ba yudishi bisandji gumi bi bidini bi mapaa yi bi bambitshi bi saadi mu manu. ²¹ Baadu bana ba di bagadi makama miidi midanu,haa loo badangi ba kedu ye baana. ²² Dangu di,Yesu ga ledi ba tumwa mbi:godani mu bwadu sabugagani gu shimu di yanga gu misu yami,bwoona yi ba sala lela baadu baa mbi:ba vuduga mu mabula ma baa. ²³ Dangu di ba vudugi mu mabula ma baa,Yesu gendi ndi beeni mu mundonda mudiambu ye gusamba Gahungu.Dangu di bwii piba,Yesu ga gadi ndi beeni guna. ²⁴ Haa bwadu di gadi di gumi tunda ye kadi di yanga mwetshi ga gadi muni nigisa bwadu ngolu,mudiambu muhunga ga gadugi gu ndambu dina di bendagi. ²⁵ Mu kogu wu teegu,Yesu ga gadi muni gwenda ye londi di mwetshi.Ga gadi muni gwenda pena-pena ye ba tumwa. ²⁶ Haa di bamudadi muni luda ye londi di mwetshi,booma bu bagami.Ba yagudi mbi:"awuu diabulu!''bwoona ba yandigi gu saa miloolu mudiambu ye booma. ²⁷ Yesu ga ba ledi mumbala yi moshi mbi:bwisani mbundu!Awuu mii lu galegu ye booma.'' ²⁸ Piela ga yagudi mbi:fwumu,mbi wuna weedi ndji ndesa mi kega yitsa ye londi di mwetshi tii yaana ye weedi.'' ²⁹ Yesu mbi:''yi zaa witsa!''Bwoona piela gadugi mubwadu,gayandi gwenda ye londi di mwetshi gu misu ma Yesu. ³⁰ Haa dangu piela di gadadi mbi muhunga geedi mu gulanda,booma bu mugami,ga yandigi gu djiama,ga yagudi mundaga yi ngolu:''fwumu,kulusa!'' ³¹ Mu mbala yi moshi Yesu ga gangudi googu diandi ga mugami piela,bwoona ga ledi piela mbi:"ndji muudu wu lugwigilu lu digi-digi,mudiambu di kii wu gadi ye mbundu djioodi?" ³² Ba boodi ba godi mu bwadu,haa muhunga ga hwii. ³³ Ba tumwa bana ba gadi mu bwadu ba fugamani ye milu mi Yesu mu gu musambila.Ba yagudi mbi:"mukiediga weedi mwaana wu Gahungu!'' ³⁴ Dangu di ba sabugi yanga,ba gumi gu ndambu yi Jenezaledi. ³⁵ Baadu ba gidini gina ba yabi wuna Yesu;ba pashi tsangu djiandi mu gidini gina giootsu.Bwoona bitshi mu needila baadu bootsu ba belagi. ³⁶ Ba gadi muni mu woondila mbi:hega ba kashi ndjila yi gu gama shi tsongi yi muledi woogu.Bwoona baadu bootsu ba gami mu ledi wandi ba mani ginda.