¹ Yesu ga lendigi ba longogi bandi gumi ye boodi.Ga ba hegi ngolu ye giyega gi gudusa mihunga miootsu mi mbi ye gu gindisa baadu ba gikashi. ² Ga ba dumishi mudiambu gi gwe lela baadu tsangu dji gi fwumu gi Gahungu ye wu gu gindisa ba kashi. ³ Ga ba ledi mbi:"loo gu nedani shi gima gi moshi shi mudi loo,shi ga waba loo,shi madia loo,shi mbongu loo;loo gu nendani shi ma sumishi moodi-moodi. ⁴ Gosu nzu yina yi ba lu yambi,galani muna tii gwoona gu lu gaduga ye bula dina. ⁵ Mu gosu bula dina di gonda gu lu yamba,ga dugani ye bula dina.Dangu di lu ba gaduga lugumunani milu mi binu mudiambu ye gu gadula fududu yina yedi gu mashina ma milu ma binu,mu pila mbi ba yaba mbi ba hangi mbii. ⁶ Dangu di,ba longogi beendi;beendi mu gu luda mu mabula mootsu.Beenda ya bisa tsangu dji pimbu ye gu gindisa beeni bi kashi. ⁷ Dangu di guvedinela Erodi antipashi ga yugi mapandi mootsu ma hangagi Yesu,bwoona ma banza mandi ma gumi gisaga-saga.Mudiambu baadu beega ba yagula mbi:"Yowani mbodigi wu niamugi mu lu fwaa.'' ⁸ Beega mbi Ediya wu yitshi moniga.''Beega mbi:"mu kadi ga ba mbigudi ba gumwaga,mbigudi wu moshi wu niamugi mu lu fwaa.'' ⁹ Haa Erodi mbi:"Yowani?Mi yi mugeshi mudu.Haa muudu wuna gu fani gala naa wu yi ba yuga mapandi maa?"Bwoona ga yandigi gu dinga pila yi gu dala Yesu. ¹⁰ Dangu di ba tumwa bitshi vuduga gwedi Yesu,ba mu ledi mapandi mootsu ma ba hangi.Ga ba sendi,beendi yeb ndi mu gu gala kaga baa beeni gi hani gi moshi pena-pena ye bula di Betisayida. ¹¹ Haa baadu ba vula ba yugi mapandi mana,bwoona bi tshi mu landa Yesu ga ba yambi,ga yandigi gu ba lela tsangu dji gi fwumu gi Gahungu,ga gindishi kega baadu bana ba gadi ye makashi. ¹² Dangu di djiama dangu,ba longogi bootsu guumi ye boodi bi tshi lela Yesu mbi:"lela baadu beenda mu ma bula maneeni ye mu mabula ma digi-digii mudiambu ye gwenda dinga madia ye bihani bi gunimba.Mudiambu gu dwedi mu ntsegi.'' ¹³ Haa Yesu ga ba ledi mbi:"binu beeni ba hegani madia ba mbi:"dwedi ye mapaa madanu ye ba mbitshi boodi ba mwetshi.Haa wu zodi du ba sumbila madia?'' ¹⁴ {Ba bagala bana ba gadi guna magu madanu}Yesiu ga ledi bas longogi bandi mbi:"lelani baadu bootsu ba shigumuga mu gi mvuga mu gosu gabu baadu gi desu magumi madanu." ¹⁵ Ba longogi bandi,ba hangi bwoona,ba ledi baadu bootsu mu gu shigumuga. ¹⁶ Yesu ga sendi mapaa mana mootsu madanu ye ba mbitshi bana boodi.Gadadi gu yilu,ga hani madonda gwedi Gahungu mudiambu ye madia mana.Ga mageshi bidini-bidini ga mahani gwedi ba longogi bandi mu gu gabila baadu. ¹⁷ Baa bootsu ba di,ba yugudi.Balongogi ba yudishi bi sandji guumi ye bioodi mu bidini bi mapaa ye bi bambitshi bina bi sadi yatshi. ¹⁸ Gi lumbu gi moshi Yesu ga gadi muni sambila Gahungu ndi beeni.Balongogi bandi bitshi gwedi ndi.Ga ba yufudi mbi:"baadu ba yagulaga kii mudiambu ye mii? ¹⁹ Ba yagulaga mbi:''baadu beega yagulaga mbi ndi wedi Yowani mbodigi;beega mbi Ediya,beega mbi mbigudi wu moshi mukadi ga ba mbigudi ba tunda wu shamugi mu lu fwa.'' ²⁰ Dangu di Yesu ga ba yufudi mbi:"bwoona binu lu yagulaga mbi yedi naa?"Piela mbi:"weedi mesiya wu Gahungu! ²¹ Yesu ga ba shidi tshigu mbi:loo gu yagulani mapandi maa shi gwedi muudu wu moshi. ²² Ga yagudi kega mbi mwaana muudu ga fani dala pashi djivula.Ba mbuda nganga ba Gahungu ye ba longi batshigu,bu ba muduna,bu ba muzuwa.Bwoona mu gilumbu gi dadu Gahungu bu ga mushamugisa mu lu fwaa. ²³ haa ga ba ledi ba bootsu mbi:"mbi muudu bu zodi gwitsa ndanda loo ga fani yi ndula kega ludjingu lwandi ndi,ndi beeni;haa ga senda kulundji wandi gosu gilumbu,gitsa ga ndanda. ²⁴ Mudiambu gosu muudu wuna wu zodi gu hulusa mooni wandi,bu ga dibisa,haa gosu muudu wuna wu bidisa mooni wandi mudiambu ye mi bu ga dihulusa. ²⁵ Kii fwunu muudu mu gu gala ye bima biootsu yaa ye londi di manu,mbi bu ga bidishi ndjila yandi mbi loo wu fwii? ²⁶ Haa mbi muudu bu ga zugi tsooni mbi loo wu dadi malongi ma mi tsooni,mwaana muudu ga mudala kega tsooni dangu di ga gwitsa vuduga mu lugumu lwandi,mu lugumu lu dada Gahungu ye mu lugumu lu ba wandjio ba Gahungu. ²⁷ Yi ba lu lela mapandi ma kiediga,baadu beega yaa,bu ba fwaa shi buni tii gwoona gu ba dadila gi fwumu gi Gahungu. ²⁸ Dangu Yesu di ga mani mapandi mana,posu yi moshi yi ludi bwoona ga sendi Piela,Yowani ye Yagobu.Gendi ye baa ye londi di mundonda guna gendi mudiambu di gu sambila Gahungu. ²⁹ Dangu di ga sambilagi,mbunzu yi balumugi pila yega,miledi miandi mi gumi peembi shela. ³⁰ Mu gitulumugila baadu boodi ba monigi guna,ba gadi muni solula ye Yesu!Baadu bana baa,baa:Mososhi ye Ediya,. ³¹ Ba gadi muni ye lugumu lu yilu.Ba gadi munisolul;a ye Yesu mudiambu di lu fwaa luna lwoondi lu ga fani gwenda gu fwaa gu Yelusalemi. ³² Piela ye baadu bana ba gadi yendi,ba gadi muni mimba gilu gi ngolu.Haa dangu di ba shamugi gu gilu bu badadi lugumu lu Yesu,ba kega badadi ba bagala bana boodi ba manani gihani gi moshi ye ndi. ³³ Dangu Mososhi ye Ediya ba gadi mu gu shisa Yesu mudiambu di gu vuduga,Piela ga mu ledi mbi:"fwumu,gwedi pimbu mu pila yi dwedi yaa.Du dunga bi sasa bi dadu,gi moshi mudiambu ye ndji,gi moshi mudiambu ye Mososhi,giega mudiambu ye Ediya.'' {Piela loo ga yabagi mapandi mana ma gayagulagi.} ³⁴ Dangu di ga gadi muni yagula kaga,duda di yitshi ba fidimiga ba bootsu,bwoona,dangu ba longogi badadi mbi duda di yitshi ba fidimiga,booma di bu basendi. ³⁵ Bwoona yi dugi gu duda dina mbi:"wuu gedi mwaana wami wu yi zolaga.Lu mu yugilaga." ³⁶ Dangu di dugi ndaga yina bwoona,loo ba dadi kega muudu wega,kaga Yesu ndi beeni.Balongogi ba gadi pweede.Mu dangu dina,loo ba ledi shi muudu wu moshi mapandi mana ma badadi. ³⁷ Mu gilumbu gi landi,bi tshi gulumuga gu mu ndonda,bwoona baadu ba vula bitshi wana Yesu. ³⁸ Muudu wu moshi mu kadi ga baadu bana ga yangudi mu ndaga yi ngolu mbi:"longi,yi ba gu guwondila mu gwenda dala mwaana wami wu bagala,mudiambu loo yedi ye mwaana weega. ³⁹ Muhunga mimbii wu mugamaga,bwoona ga yagulaga mundaga yi ngolu,ga gonaga,ga dugaga mafulu-fula gu ganu,ga lwalaga bwoona muhunga wuna ga mushisaga ye londi di pashi. ⁴⁰ Yi wondidi bangugi ba gogu,haa loo ba kugi.'' ⁴¹ Haa Yesu mbi:"yaaa...binu baadu baa loo lu gwigilaga,binu baadu lu bidi ndjila yi pimbu!Yi fani lu gangila mbundu tii kii dangu?Yi zaa wu needa mwaana woogu yaa.'' ⁴² Dangu di tsaagi mwaana wuna pena-pena Yesu,muhunga wuna ga mu bwishi mu manu,bwoona ga yandigi gu gona.Haa Yesu ga nganini mihunga wuna,ga gindishi mwaana,bwoona ga vudidi mwaana gwedi dada wandi. ⁴³ Baadu bootsu ba gadi muni yiduga ngolu mudiambu ye ngolu dji neeni di Gahungu.Dangu baadu bootsu ba gadi muni yiduga mudiambu ye mapandi mana mootsu mahanga Yesu,Yesu ga ledi ba longogi bandi mbi: ⁴⁴ "Gamani pimbu mapandi maa ma yi ba lulela:bu bahana mwaana muudu gu mioogu mi baadu mudiambu ba mugama. ⁴⁵ Haa loo ba yabagi maspandi mana ma yagula Yesu;Gahungu loo ga ba hegi ndugi di guyaba gisongidila gi mapandi mana.Bwoona ba gadi mu booma mu gu yufula Yesu mapandi mana. ⁴⁶ Ba longogi ba yandigi gu saa teembi mu gu yaba naa wu ludi buneeni mukadi ga baa. ⁴⁷ Yesu bu ga yabi mabanza ma baa.Bwoona ga sendi mwaana wu kunda,ga mu niamugishi pena-pena yendi, ⁴⁸ Haa ga ba ledi mbi:"gosu muudu wuna wu yamba mwaana wu mudjina djiami,mu nzambi mi beeni;gosu muudu wuna wu banzamba yagula mbi ga yambi kega muudu wuna wu tumi.Mudiambu muudu wuna wu ludi kunda mu kadi ga binu bootsu,ndi wu ludi bu neeni.'' ⁴⁹ Yowani ga yagudi mbi:"fwumu,du dadi muudu wu moshi guna ga dusaga mihunga mbii mu djina diagu.Du mu ledi mbi:"loo gu hanga kega buna mudiambu loo wedi muudu wu pidu." ⁵⁰ Haa Yesu mbi:"loo lu fani mu lela buna.Mudiambu muudu wuna loo gedi mbeni wu binu,gedi ndugu wu binu.'' ⁵¹ Bilumbu bina bi shi Gahungu mudiambu ye gu gadula Yesu ye londi di manu ye gu zangula gu yilu gu gumi Pena-pena,bwoona Yesu ga geshi mbi ga fani gweda kaga gu bula di Yelusalemi. ⁵² Ga dumi ba tumwa beega gu misu.Dangu di beendi,bee goda gu bula di moshi gu manu ma Samadiya mudiambu ye gu muyidigila mapandi mootsu. ⁵³ Haa baadu bula dina ba duni mu gu muyamba,mudiambu ba yaba mbi bu geenda gu Yelusalemi. ⁵⁴ Dangu ba longogi baa baYagobu ye ba Yowani ba dadi mapandi mana,ba yufudi mbi:"fwumu,haa wu zodi mbi du lendiga mbaa du yilu,dwitsa du zuwa baadu baa bootsu?'' ⁵⁵ Haa Yesu balumugi gu ndambu yina yi gadi ba longogi bana,bwoona gayandigi gu ba nganina. ⁵⁶ Dangu di ba gadugi gu bula dina,beendi gu bula djiega. ⁵⁷ Dangu di ba gadi kaga mu ndjila,muudu wu moshi ga ledi Yesu mbi:"yi fani gu gulanda gosu guna gu wu ba geenda.'' ⁵⁸ Yesu ga yagudi mbi:"migengi miedi mu mawulu ma miaa,mudiambu gu nimba,ba nuni beedi ye mayamba ma baa,haa mwaana muudu loo gedi gihani gi fani nimba. ⁵⁹ Ga ledi muudu weega mbi:"yi zaa witsa wu ndanda.''Haa muudu wuna mbi:''fwumu,peega teegu ndjila yenda yi djiga dada wami.'' ⁶⁰ Yesu mbi:"yambula baadu bana ba fwii ba djiga baa ye baa,haa ndji ndawenda wu longa ntsangu dji gi fwumu gi Gahungu. ⁶¹ Muudu weega kega ga mu ledi mbi:"fwumu,bu yi gwitsa gu gulanda.haa peega teegu ndjila mu gwenda hega gi ganda giami mbodi yi tsuga.'' ⁶² Haa Yesu mbi:"muudu wuna wu bongi demu,wu ba zola bundula manu mbi bu gadadi gu ngoyi loo ga fani mu gu hanga mu gi fwumu gi Gahungu.