¹ Dangu di Yesu genda ye ma bula ma neeni ye mabula ma digi-digii.Ga longagi tsangu dji pimbu dji gi fwumu gi Gahungu.Ba longogi bootsu guumi ye boodi bendagi ye ndi. ² Bakedu beega bana ba gindi mu mihunga ye mu makashi ma baa,ba gadi muni gwenda ye ndi kega:Madiya,wuna wu balendigagi Madiya wu bula di Magadala,mukedu ga dugi mu mihunga mi tsambwadi mi mbii; ³ Yowani mukedu wu Kuza,muudu wu gisalu wu leta mu gi fwumu gi Yerode Antipashi,Suzana;ye ba kedu beega beengi ba gadi muni hana bima bi baa mudiambu di gu sadisa Yesu ye ba longogi bandi. ⁴ Baadu ba gadi muni dugaga mu mabula ma vula;bi tsagi gwedi Yesu.Dangu baadu ba vula ba gadugi gi hani gi moshi,Yesu ga ba deedi gi ngana gii: ⁵ "Muudu wu moshi ga dugi mu nzu yandi gendi mu gu guna kuna diandi.Dangu di gu djiguna mu mangundu,kuna sdjiega djie bwaa mu kadi ga ndjila baadu bitshi gu djiniada,ba nuuni keega bitshi gu dji dia. ⁶ Kuna djiega djie bwaa mu manu ma madadi.Dangu di meeni kuna dji yiminini,mudiambu manu loo ma gadi ye mwetshi. ⁷ Kuna djega djie bwaa mukadi ga bi ngangi.Bi ngangi bieni bi meeni ndjila yi moshi ye djia,bwoona dji bigangi mishi. ⁸ Kuna djiega djie bwaa mu manu ma pimbu dji meeni,''bwoona gosu gi menina gi budji kuna djiega.''Bwoona Yesu mbi:"gosu muudu wuna wedi ye matsu,ga yuuga!'' ⁹ Ba longogi ba Yesu ba mu yufudi gi songidila gi gingana gina. ¹⁰ Ga yagudi mbi:"Gahungu wu luhegi ndjila wu gu yaba mapandi ma gitsweegi ma gi fwumu giandi,haa baadu beega ba yugaga mapandi mana mu bingana kaga,mudiambu loo ba dadi shi ba dalaga;mudiambu ba kada gu bagisa shi bu ba yugi.'' ¹¹ ''Gi songidila gi ngana gina giagi:"kuna djiedi tsangu dji Gahungu. ¹² Baasdu beega beedi nga ndjila.Kuna djiega dji saga bwaa mu ndjila;ba yugaga tsangu djina,haa sadana gitsaga ga dula tsangu djina mu mbundu yi baa mudiambu ba kada gwigila,kada guluga kega. ¹³ Baadu beega kega beedi nga manu mana ye londi di madadi kuna djiega djisaga bwaa mu manu mana.Dangu di ba yugaga sangu djina ba dji gumbulaga ye gieshi.Haa loo ba gangaga mbundu,tunda ba dji gamaga.Ba gwigila mu dangu dji dcigi-digii gu hwii,haa mbi gadipemba bu ga meegi ba dunaga tsalu tsangu djina. ¹⁴ Baadu beega beedi nga kuna djina djiendi bwaa mu kadi ga bingangi.Ba yugaga tsangu djina,haa mudangu di bendaga mu ndjila,mapandi ma ba hega pashi gu mbundu,gi mvwaama ye gieshi gi ludjingu luu,lu yi tsaga gu bagamga ndjila.Buna kuna dji baa loo dji yelelagagi. ¹⁵ Baadu beega beedi nga kuna djina djiendi gu bwaa mu manu ma pimbu ba yuigaga tsangu djina,ba dji gebaga gu mbundu yi pimbu peenza.Ba landagagi tii gwoona gu ba fani buda kuna.'' ¹⁶ "Loo shi muudu wu moshi wu lemisaga mwiinda mudiambu ye gu mubada gatiini mbi loo mu gu mu saa gu mashina ma giandu.Haa ba mu sagaga ye londi di meesa bwoona baadu bana ba bagoda mu nzu ba fani mu dala mwiinda muni leema. ¹⁷ Mudiambu mapandi mootsu mana meedi ma ga swamana,ma moniga gu misu ma baadu;mapandi mootsu ma gitswegi,bu ba mayaba,bu ma yabagana kaga. ¹⁸ ''bwoona ge bani mu pila yina yi lu yugaga mapandi.Mudiambu muudu wuna wedi ye bima Gahungu ga mu lunda bima biega;haa muudu wu kondi gima,Gahungu ga mugadula shi gandambu gena ga gaba yindula mbi geedi gia. ¹⁹ Ngudi wu Yesu ye ba pandi ba Yesu bi tshi dinga ndi,haa loo badadi pila yi gu guma ye gihani gi ga gadi,mudiambu baadu ba gadi ba vula. ²⁰ Baadu ba ledi Yesu mbi:"dala ngudi woogu ye ba pangi bagu,beedi ye ndjila.Ba zodi gu gudala.'' ²¹ Ga ledi baadu bootsu mbi:"ngudi wami ye ba pangi bami beedi baadu bana ba yugaga tsangu dji Gahungu ye ba dji landagagi.'' ²² Gi lumbu gi moshi Yesu ga godi mu bwaadu ye ba longogi bandi ga ba ledi mbi:"du sabugani gu shimu di yanga di.''Bwoona beendi. ²³ Dangu di ba sabugagi,Yesu ga nimbi.Muhunga wu ngolu ga yandigi gu nigisa mwetshi bwaadu bu yandigi gu yula mwetshi,bwoona ba gadi ye gi gonza. ²⁴ Ba longogi beendi niamugisa Yesu gu gilu bwoona ba mu ledi mbi:"fwumu,fwumu,du ba zola fwaa!"Yesu ga shamugi gu gilu.Ga nganini muhunga ye mwetshi:ga guumi pwedee,bweoona ndambu yootsu yina ga guumi pwedee. ²⁵ Dangu di ga yufudi ba longogi bandi mbi:"lugwigiluni?"Haa ba bagami,ba yidugi ngolu.Ba yandigi gu yagula baa ye baa mbi:"muudu wu geedi kii mutindu?Ga ba nganina shi muhunga shi mwetshi,bwoona muni gu muyugila!" ²⁶ Ba sabugi mwetshi,bwoona bi tshi guma mu manu ma baadu ma geraza,manu mana meedi shimu ye shimu ye manu madileya. ²⁷ Dangu Yesu di gaduga mu bwaadu,muudu wu moshi wu bula di moshi di manu mana gi tshi wana Yesu.Muudu wuna ga gadi ye mihunga mi mbii yandiga gu mwaga,loo ga vadaga mi leedi,loo ga djingaga kega mu nzu,haa mu ma djiamu. ²⁸ Dangu di gadadi Yesu,ga shi milolu,ga bwii ye milu mi Yesu,bwoona ga yandigi gu yagula mundaga yi ngolu mbi:"ndji mwaana wu Gahungu,kii mapandi ndji yemi?Padidon loo gutadisa pashi!" ²⁹ Muudu wuna ga ya gudi buna m,udiambu Yesu ga lela muhunga wu mbii muguduga gwedi ndji,mudiambu muhunga wuna ga mu gamagagi mbala dji vula.Ba mu gangagagi miyololu mumioogu ye mu milu,mudiambu ndi loo ga dini.Haa muni gesa mi yololu mina,mihunga mimbii mi munedagi mu bihani mi kondi baadu. ³⁰ Yesu ga muyufudi mbi:"djina diagu naa?"Ndi mbi:"djina diami ndonga''yi neeni''mudiambu mihunga mimbii mi vula migodaga gwedi ndi. ³¹ Mihunga mimbi mi yandigi gu wondila Yesu mbi:"loo gu dumisa gu bilungi." ³² Ba ngulu bavula ba gadi yena pena-pena,ye londi di gamundonda.bu benda dia.Mi hunga mi dingi ndjila gwedin Yesu mbi:"du hega ndjila,dwenda du goda mu ba ngulu bana'',bwoona ga mi hegi ndjila. ³³ Dangu di mihunga mi mbii midugi gwedi muudu weeni,miendi goda gwedi ba ngulu bana,bwoona ba ngulu bootsu ba gadugi tiinu ye londi di mundonda,beendi bwaa ye yanga,bwoona ba fwii mu mwetshi. ³⁴ Baadu bana ba gadi muni dala ba ngulu dangi di badadi mapandi mana,ba diini gu baa.Bendi yabigitsa muvula ye mu mabula. ³⁵ Baadu bi tshi mudiambu ye gudala kii mapandi ma bwaagi.Bitshi guma gi hani gi gadi Yesu badadi muudu wuna Yesu wu gadushi mihunga mimbii.Muudu weeni ga gadi ye milu mi Yesu,wu vadi miledi,wu guumi muudu wu mabanza ma pimbu,bwoona booma bu ba gami. ³⁶ Baadu bana badadi mapandi ba yandigi gu lela baadu beega kii pila muudu wuna ga gadi ye mihunga mimbii ga gindi. ³⁷ Dangu di,baadu bootsu ba manu mana ba dingi gwedi Yesu mu gu gaduga ye ma baa,mudiambu ba yugi booma bu vula.Ya yena,Yesu gendi goda mu bwaadu mudiambu mu vuduga. ³⁸ Muudu wuna Yesu wu gadushi mihunga mimbii ga woondidi Yesu mbi:"dwenda yendi.''Haa Yesu ga mu vududidi mbi: ³⁹ ''Vuduga gu nzu yagu;lela baadu mapandi mana ma guhangi Gahungu.''Ge lela baadu bootsu ba bula mapandi m,ootsu ma muhangi Yesu. ⁴⁰ Dangu Yesu di gitshi vuduga gu shimu di yanga,baadu ba vula bi tshi muyamba,mudiambu ba bootsu bu ba mugingilagi. ⁴¹ Dangu di muudu wu moshi gi tshi guma guna,djina diandi Yedishi;ga gadi fwumu yi nzu yi bisambu yi ba yuuda.Ga fugamani mu milu mi Yesu,bwoona ga wondidi Yesu mu gwenda gu nzu yandi. ⁴² Mudiambu ga gadi ye mwaana wu moshi kega wu mukedu.Mwaana wuna ga gadi gidesu gi ma mvula gumi ye moodi ga gadi pena-pena ye lu fwaa.Dangu Yesu di genda gu nzu di Yedishi baadu ba vula benda mu ganga ndjila. ⁴³ Mukedu wu moshi wu gikashi ga gadi ye kadi baadu bana,meengi ma mudugagi yandiga mamvula guumi ye moodi.Ga manishi mbongu djiandi djioosu gwedi ba minganga,haa shi munganga wu moshi loo ga mugindishi. ⁴⁴ Gi tshi fwinama pena-pena gu ngoyi Yesu.Ga gami tsongi yi muledi wandi.Dangu dina kaga,makashi mandi ma hwii. ⁴⁵ Yesu ga muyudi mbi:"naa wu kami?"Baadu bootsu ba yandigi gu duna.ye yena piela ga yagudi mbi:"fwumu,baadu ba vula ba bagugu djieda-djieda,beedi mu gu guyina-yina mundambu djiootsu.'' ⁴⁶ Haa Yesu mbi:"muudu wu kami;mudiambu yi yugi ndambu yi ngolu yi dugi mu luudu diami.'' ⁴⁷ Mukedu loo gadadi pila yi guswamana.Ya yena gitshi degida.Ga fugamani gu milu mi Yesu.Gu misu ma baadu bootsu ga ledi Yesu mudiambu di kii ga mu gami,kii mutindu ga gindi mbala moshi. ⁴⁸ Yesu ga mu ledi mbi:"Maama wuu,lugwigilu lwoogu lu gugindishi,ndaa pimbu.'' ⁴⁹ Dangu Yesu di ga gadi kaga muni yagula,muudu wu moshi ga dugi gu nzu Yedishi gitshi lela Yedishi mbi:"mwaana woogu wu mukedu wu fwii.Loo gu yangisa kega longi.'' ⁵⁰ Haa Yesu ga yugi mapandi man bwoona ga yandigi gu lela Yedishi mbi:"loo guyuga booma;gwigila kaga,bwoona mwaana woogu ga ginda.'' ⁵¹ Dangu di ga gumi gu nzu yi Yedishi,ga ledi baadu mbi:"shi muudu wu moshi loo ga goda mu nzu ye mi,kaga piela,Yowani,Yagobu,dada ye gudi wu mwaana.'' ⁵² Baadu bootsu ba dilagi ngolu ye gubaga miledi mudiambu lu fwaa lu mwaana wuna lu bahegi kenda.Yesu mbi:"loo gu dilani;mwaana loo ga fwii,haa wu nimbi gilu.'' ⁵³ Ba yandigi gu museya,mudiambu bu ba yabi mwaana wu fwii wu muhundu. ⁵⁴ Haa Yesu ga gami mwaana mu gogu ga mu ledi mu ndaga yi ngolu:''mwaana niamuga!'' ⁵⁵ Mwaana ga sendi kega mooni,bwoona mu mbala yi moshi,ga niamugi.Dangu di Yesu ga ba ledi mu guhega madia. ⁵⁶ Dada ye ngudi wu mwaana wuna ba yidugi ngolu,haa Yesu ga ba ledi mbi:"mapandi maa mabwii yaa,loo gu lesani shi muudu wu moshi.''