² Dala gu gadi ye fwumu wu moshi wu ba pumbulu ga gadi ye muhiga wu zolagi ngolu,ga gadi ye gikashi gi lufwaa. ³ Dangu fwumu wuna di ga yugi tsangu dji Yesu,ga dumishi ba mbuda beega ba bayudeyo mudiambu ba wondila Yesu mu gwitsa gindisa muhiga wandi. ⁴ Ba mbuda bana bitshi guma gwedi Yesu,bwoona ba yandigi gu mu wondila ngolu mbi:muudu wu fani ndji mugumu sadisa. ⁵ Mudiambu ndi ga zolaga baadu ba pidu,ndi kega wu du dungidi nzu yi bisambu yi neni. ⁶ Dangu di,Yesu gendi ye baa.Dangu di ga gumi pena-pena ye nzu yi fwumu wu bipumbulu,fwumu weni ga dumi ba ndugu bandi mudiambu ba mu lela mbi:''fwumu,loo gwitsa,mudiambu mi loo yi fani mu gu guyamba mu nzu yami. ⁷ Yi dadi mbi loo yi fani mu gwitsa moniga gwedi ndji.Haa yagula gwoogu gu ganu muhiga wami ga ginda. ⁸ Mi kega yi dumugilaga ba fwumu bami,gwedi ba pumbulu bami:mbi bu yiledi wu moshi:"nda"ndikega wendi;mbi bu yiledi wega mbi:"yizaa''ndi kega wu yitshi,"shi muhiga wami kega mbi bu yi muledi mbi :"hanga bu ndi kega wu hangi.'' ⁹ Dangu Yesu di ga yugi mapandi ma fwumu wu ba pumbulu ma gayagulagi ga yi dugi ga balumugi gwedi baadu bana bitsa mulanda gaba ledi:''yi lu ledi,shi gu yishiledi loo yandu yi dadi muudu wedi ye lugwigulu luu.'' ¹⁰ Baadu bana ba dumi fwumu wu ba pumbulu bitshi guma gu nzu yandi,bitshi wana muhiga wu gindi. ¹¹ Gu ngoyi madangu mana Yesu gendi gu nayini,ba longogi baandi ye baadu beega bendi ye ndi. ¹² Ya yena ga gumi ye tsongi bula,ga dadi baadu muni neda muudu wu gu fwaa gu ma djamu,mwaana wu moshi buuna gwedi ngudi wuna wu mu fwiidi,baadu bengi ba bula benda landa mukedu wuna. Dangu fwumu Yesu di ga mudadi ga mu yugi kenda ga mu ledi:"loo gudila." ¹⁴ Dangu Yesu di ga gumi finama ye mugobi,ga gami,ba neda mugobi ba manani ye ga yagudi:"pangi wami yi guledi niamuga." ¹⁵ Mvumbi yi niamugi yi yandigi gu gu yagula.Yesu ga muvududi gwedi ngudi wandi. ¹⁶ Ya yena booma bu gami baadu bootsu,ba yandigi gu gumisa Gahungu,muni yagula,mbigudi wu neni wu gumi mu kadi gapidu!Gahungu wu yitshi sadisa baadu bandi.'' ¹⁷ Mapandi maa mahangi Yesu mapasagagani mu gifudi giootsu gi Yudeya ye mabula ma pena-pena. ¹⁸ Ba longogi ba Yowani ba mudedi mapandi mootsu. ¹⁹ Bwoona Yowani ga lendigi ba longogi bandi boodi,ga badumi mu guyufula fwumu Yesu:"ndji wedi ndona wu dugingaga e wega?" ²⁰ Dangu ba longogi bana di ba gumi gwedi Yesu,ba mu ledi mbi:"Yowani mbodigi wu dumi gwedi ndji mu gu yufula:"wedi ndona wu gwitsa e ndona wu du ba ginga mbilo ndona wega?'''' ²¹ Mu dangu diadina,Yesu ga gindishi ba kashi beengi,beni pashi,beni mihunga mi mbi,bi fwaa misu bi yandigi gu dala. ²² Yesu ga baledi:ndani mudalani Yowani miootsu mi lu dadi ye mi luyugi.Bi fwaa misu bi dadi,bi gada bi yendi,beni kungudi ba gindi,bi fwaa matsu ba yugi,baadu ba fwii ba shamugi,ntsangu di pimbu dji hanamani gwedi ba tsugami. ²³ Gieshi gwedi muudu wuna wu konda yambula gu gwigila gwedi mi mudiambu ye mahanga mami.'' ²⁴ Dangu di vudugi ba longogi ba Yowani,Yesu ga yandigi gu yagula gu twala yi baadu,''ki lwendi dala mugifudi gi maganga,lugasa luniganaga mu muhunga? ²⁵ Ki lwendi dala,muudu ndona wu vadi miledi mi pimbu?Haa baadu bana ba vadaga miledi mi pimbu ba ndjingaga mu ma nzu ma ba fwumu ba neni. ²⁶ Haa ki lwendi dala?mbigudi wu moshi?eeh,yi ba lu lela,gu guluda mbigudi. ²⁷ Dalani muna mu basonigi:''dala yi ba dumisa mbigudi wami gu misu magogu wu yidiga ndjila yagogu." ²⁸ Yi ba lu lela ,mu kadi gabaadu bootsu ba budugi gwedi mukedu,loo gwedi shi wu moshi wedi mbuda nga Yowani.Dangu di wuna wu ludi mugigegi mugi fwumu gi Gahungu gedi mbuda nga ndi. ²⁹ Dulagi du bidadi ye baadu bootsu,baa mu yugishilagi.Ba gumbudi mbi Gahungu gedi wu kiediga,ba sendi kega mbodiga gwedi Yowani. ³⁰ Haa ba fadishi ye balongi ba ma tshigu ba duni mapandji mana ma Gahungu ga zolagi mbi ba hanga,ba duni kega gu senda mbodiga gwedi Yowani. ³¹ Yesu ga yagudi kega mbi:"ye naa lu fani fanigisa baadu ba dangu di?ba fanagani yenaa? ³² Ba fanagani ye baana ba dambaga ye gihani yi yudi baadu ba vula,mbi ba lendigi bega bana beega ba yagudi mbi:''dulubudidid mizigi ye maginu haa loo lu ginii!Du yimbi mi ma fwaa,haa binu loo lu didi!'' ³³ Yowani batishite wu yi tshi ga dunagagi gudia mudiambu di gu samba Gahungu loo ga nwagaga malafu,haa lu ba yagula mbi:''loo gedi muhunga wu mbii"! ³⁴ Haa mwaana muudu wu yi tshi ga diagaga,ga nwagaga,haa lu yagulaga mbi:''dala muudu wu ga diagaga ngolu ye ga nwagaga malafu ngolu,gedi ndugu wu dulagi ye wu baadu ba masumu!'' ³⁵ Haa ndungi dji Gahungu dji monigaga dji yabagani gwedi baadu bana bootsu ba mu gumbulaga. ³⁶ Mufadishi wu moshi ga lendigi Yesu mugwitsa dia gu nzu yandi.Yesu bu gi tshi,haa ndi ga shigumugi ye meesa mugu dia. ³⁷ Ye dina gu gadi mu kedu ga hanga gi ndumbu.Dangu di ga yugi mbi Yesu kedi muni gu dia gu nzu wu mufadishi ga nedi mulangi wu moshi wu ba hangi ye daadi Albadi;mulangi wuna ga gadi wu guyula ye madiashi. ³⁸ Gi tshi manana gu ngoyi yi Yesu mu milu.Ga gadi muni dila,tsanga diandi dji yandigi gu noga ye londi di milu mi Yesu.Bwoona gadibi milu mi Yesu ye tsugi djiandi ga mi hegi beshi ga mishi madiashi. ³⁹ Mu fadishi wuna ga lendigi Yesu,dangu di gadadi ma pandi mana ga yandigi gu yagula gu mbundu mbi:"mbi mu kiediga muudu ga gadi mbigudi ga kanda yaba mu kedu wu wubagama gedi naa,mbi kega mukedu gedi ki mutindi;ga kanda yaba mbi gedi ndumbu!" ⁴⁰ Dangu di,Yesu ga ledi mu fadishi wuna mbi:"Shimoni,yedi ye ma pandi ma gu gulela."Shimoni mbi:''longi,yagula.'' ⁴¹ Yesu mbi,''gu gadi ye baadu boodi,ba gadi fwuga yi muudu wu moshi wuna wu defisaga baadu mbongu.Muudu wu tegu wu defii ndondu kama dji danu,wu djiodi ga defii ndondu magu madanu. ⁴² Loobaa gadi ye mbongu dji gu fuda fuga yina.Bwoona,muudu wuna wu baa defishi mbongu ga badudi fwuga yina ba ba boodi.Mu kadi ga baadu baa ba bootsu naa wu lunda gu mu zola ngolu?'' ⁴³ Shimoni mbi:"Yi ba dala mbi muudu wu mu zola ngolu muudu wu defi mbongu dji vula.''Yesu mbi:"wu yagudi pimbu." ⁴⁴ Dangu di,ga balumugi gu gadi mukedu wuna,haa ga ledi shimoni mbi:"wu mukedu wu?Yi godi mu nzu yagu,bwoona loo wu pegi mudiambu di gusugula milu miami.Haa mukedu wu sugudi milu miami ye tsanga djiadi,haa ga migusumuni ye tsugi djiandi. ⁴⁵ Loo wu pegi beshi.Haa ndi,yandiga dangu di yitshi goda,ga ba hega milu miami ma beshi. ⁴⁶ Loo madiashi mu mudu.haa mukedu wu kwidi madiashi mu milu. ⁴⁷ Bwoona,yi ba gu gulela mbi gu zola guna guneni gu galeshi gu ba lesa mbi Gahungu wu mu loludi,shi bu hangi masu ma vula.Haa muudu wuna kondi hanga masumu ma vula,mbi Gahungu wu mu loludi,muudu loo galesa luzolu lu vula.'' ⁴⁸ Dangu di Yesu ga ledi mukedu wuna mbi:''Gahungu. ⁴⁹ Baadu bana ba gadi meesa ma moshi ye Yesu ba yandigi gu yagula ba beeni mbi:"muudu wu wubalolula baadu gedi naaa? ⁵⁰ Haa Yesu ga ledi mukedu wuna mbi:"lugwigilu lwoogu lu gu hulushi;nda pimbu.''