¹ Nzaba yi mapaa ma gonda mugedi,yina yi balendigi pagi yi finamani. ² Ba mbuda ba matshigu badingagi bunii ba fani gu zuwaa Yesu,haa ba yugagi miganda booma. ³ Gadiapemba ga godidi Yudashi Eshikariti wu moshi mu kadi ga batumwa guumi ye boodi. ⁴ Yudashi gendi wagana ye ba mbuda ba mitshigu ye ba fwumu ba batanini mudiambu ba balembula Yesu. ⁵ Ba gadi mu gieshi ye bamulemvushi mu gu muhega mbongu. ⁶ Ga gumbushi bwoona ba yugani mu gu dinga mayela mu gu balembudila Yesu mu luzolu lu bagondi. ⁷ Gi lumbu gi mapaa magonda mugidi gina gi ba fani zuwa mwaana dimema wu pangi gi lungi. ⁸ Yesu ga dumi Piela ye Yowani mu gu balela mbi:"nda lwenda lu du lqambila madia ma pagi mudiambu nga du diani''. ⁹ Baa ba mu ledi mb:"guni wu zodi mbi dwenda du hanga.'' ¹⁰ Gabavudidi mvudu mbi:"yugani,mu dangu di lu gondagi gi vula,muudu wu moshi witsa ye bungu di mwetshi wu luwanagana yaa ndi.nga lu mu landa mu nzu yu ga godagi. ¹¹ Nga lu yagula gwedi mweni nzu mbi:fwumu ga yagudi mbi:"du lela sugu digadilagi pagi ye batumwa bandi? ¹² Ga lu needa gu sugu di neeni di yilu,di pimbu gwoona gu lu hangila biootsu''. ¹³ Baa bendi ye badadi biootsu nga bu gadi.Ye ba yidigi madia ma pagi. ¹⁴ Dangu di lungi,ga gadi yatshi ye basadi. ¹⁵ Ga ba ledi mbi:"yi tshi ye ma songa mootsu maz gudia madia pagi gu moshi ye binu gu twala yi gu dala bielu. ¹⁶ Mudiambu,yi ba lu lela,loo yi madia keega tii gu gulungisama mu gi fwumu gi Gahungu.'' ¹⁷ Bwoona,Yesu ga sendi mbungu tangu dji ga djisagumuni,ga yagudi:"sendani gabisani binu bootsu. ¹⁸ Bwoona yi ba lu lela,loo yi nwaa keega mwetshi wu ndumba dji vinu,mbi gi fwumu gi Gahungu loo gitshi. ¹⁹ Gu ngoyi,ga sendi mapaa,ye tangu dji ga masagumuni ga ma yudishi gabahegi muna ba lela mbi:"hanga bwoona ma gu ndindulaga.'' ²⁰ Gidesu gi moshi,gu ngoyi yi mashiga,ga sendi mbungu muna yagula mbi:"mbungu yi yeedi gu wagana gu mu mengi maami matsagugi mudiambu ye binu. ²¹ Haa galani ye gu gieba,wuna wu teegi geedi ye mi yaa yi meesa maa. ²² Bwoona mwaana muudu geedi mugwenda nga bwoona bu gusonamani haa kenda gwedi muudu wun a wu mudegi.'' ²³ Baa bayandigi gu yufula mbi gwedi naa mu kadi ga pidu wu fani hanga bwoona. ²⁴ Ba yugani baa mu guyindula mbi gwedi baana beedi ba mbuda ba fani hanga mapandi maa. ²⁵ Ga baledi mbi:"ba fwumu ba bapani ba bayadi ye bana bahegi ndjila ye londi di baa balendigaga mu mbala yi moshi bana ba bayugilagagi. ²⁶ Haa looo gu gala gi desu gi moshi gwedi binu.Bwoona bana bootsu beedi nga ba mbuda mu kadi ga binu ba digumisa nga baana ba bagegi.Ye wuna weedi ye fwunu yi yingi ga gala nga wuna wu gondi fwunu. ²⁷ Bwoona weedi mu neeni:gwedi ndona weedi ye meesa mbi ndona wu ba shila madia?Loo mbi ndona weedi ye meesa?Mudiambu,yeedi ye kadi ga binu nga wuna wu ba luleshila madia. ²⁸ Haa binu lwedi bana ba gangi mbundu ye mi mu gu megama ngwami. ²⁹ Yi lu hegi gi fwumu gi moshi,nga bu pegi mi dada wami gi fwumu giami, ³⁰ bwoona nga ludia ye gu nwaa ye meesa maami mu gi fwumu giami.Ye nga lugala ye gidi giami mu gu sambisa biganda guumi ye moodi ma Yishiledi. ³¹ Shimoni,Shimoni,gala ye gu gieba,gadiapemba gu lu senda gu ngoyi ga lu yungula mu muyungula nga fuba. ³² Haa yi sambi mudiambu ndji mudiambu lugwigilu lwoogu lugonda gulumuga.Dangu di wu duga,nga muhiga lugwigilu gwedi ba pangi baagu.'' ³³ Piela ga mu ledi mbi:"fwumu,yedi finama mu gwenda ye ndji mu nzu mbada ye mu lufwaa.'' ³⁴ Haa Yesu ga muledi mbi:''Piela,yi ba gu lela bwoobu,loo ga gangulagi lelu ndji ye mi mu gu tuna mbala dji dadu mbi loo wu nzabi.'' ³⁵ Ga ba ledi keega mbi:"mu dangu di yi ludumi gu gonda maguda,bima bigudia loo ye biladu,binu bu lu gondi shi gima gi moshi?"Baa bavududi mbi:"gima loo.'' ³⁶ Haa ga ba ledi mbi:"haa dangu di,wuna weedi ye maguda ga senda ye wuna keega wu gondi mbedi,ga dega muledi wandi wu moshi ga sumba mbedi. ³⁷ Mudiambu yi ba gu lela mbi mana ma ba sonigi mudiambu ma fani lungisama:'magadi ma hwaa dangamana nga wuna weedi gungoyi tshigu.'' ³⁸ Baa bayagudi mbi:"fwumu,dala!dwedi ye mambedi moodi maama.''Haa ndi ga ba ledi mbi:"dji lungii.'' ³⁹ Gu ngoyi yi gudia,Yesu gendi nga bu gadi gigalulu mu gu hanga,mu mindonda mi Olive,ba tumwa bandi ba mu landi. ⁴⁰ Dangu di ba gumi,ga ba ledi mbi:"sambagani mudiambu mbi lugonda gubwaa mu masumu.'' ⁴¹ Bwoona ga gengugi ga gumi gu leya ye baawu handi ga fugamani ye mabongu,muna saambila. ⁴² Baawu mbi:"daada,mbi buu wu zodi,gadula bugogu bu mweedi mi.Dangu diootsu luzolu lwami,haa lwoogu luhangamana.'' ⁴³ Bwoona mutumwa wu moshi gitshi moniga gwedi ndi gu yilu mu gu muyiga lugwigilu. ⁴⁴ Dangu di galaganani,ga sambidi ye lugwigilu ye tsanga djiandi dji gumi nga madaba ma neeni ma mengi muna bwaaga mu manu. ⁴⁵ Mudangu di ga sambi ngolu,gitshi gwedi ba tumwa,ye ga ba dadi gu gilu mumbada ye kenda djiandi. ⁴⁶ Ga ba yufudi:"mudiambu di kii lu ba nimba?Niamugaani sambagani mudiambu lugonda gubwaa mu masumu.'' ⁴⁷ Mudangu di ga yagulaagi keega,badadi,gibuga gineeni giitshi ye yudashi,wu moshi mu batumwa guumi ye boodi witsa gu baneeda.Gu fani gwedi Yesu mu guhega beshi, ⁴⁸ haa Yesu ga mu ledi mbi:"Ydashi,mu gu pega beeshi wu zodi gu deega mwaana muudu?" ⁴⁹ Dangu bana bootsu ba gadi mumbimba Yesu badadi mina mi ludagi,ba yagudi:"fwumu,du bula mu mbedi?" ⁵⁰ Wu moshi mu kadi ga baa ga budi mwaana gi salu wu fwumu manu ye ga mugeshi tsuu di gidada. ⁵¹ Yesu ga yagudi:"gu lungi,tsuga!''Ye ga gami tsuu ye gamubeludi. ⁵² Yesu ga yagudi gwedi ba fwumu bamanu,gwedi ba fwumu ba manzu ma Gahungu ye gwedi ba mbuda bana bootsu bitsagi mudiambu ye lufwaa lwandi:"lu ba gwitsa nga bana bitshi nwanisa gindiaani,ye dji mbedi ye bima bieega bi kabu? ⁵³ Mudangu di yi gadi dangu djiootsu ye binu mu nzu yi Gahungu,binu loo lushi mioogu gwedi mi haa yaa dangu di binu,ye gwedi mungolu dji piba. ⁵⁴ Ba mubwidi,baa bamuneedi mu nzu yi bageshi kanu.Haa Piela ga ba landilagi guleeya. ⁵⁵ Gu ngoyi mbendi gumusaa mbaawu mu kadi ga gondi diana di ba gadi mu gimvuga,piela ga gadi gimvuga ye baa. ⁵⁶ Musadi wu moshi wu mukedu mudiambu ga shigumugi gwoona gwedi semu dji mbaa ga mudadidi ye ga yagudi mbi:"bagala wuu ga gadi keega ye ndi.'' ⁵⁷ Piela ga duni ye ga yagudi mbi:"mukedu,mi loo yi nzabi muudu wuu.'' ⁵⁸ Mudangu ndambu,muudu weega ga mudadi ye ga yagudi mbi:"ndji keega weedi mu kadi ga baa.''Haa Piela mbi:"bagala wuu,loo yeedi muna.'' ⁵⁹ Gu ngoyi dangu di moshi di mvimba,weega ga gadadi ye ga yagudi ngolu mbi:"mu masonga,bagala wuu ga gadi yendi gu gadileya.'' ⁶⁰ Piela ga vudidi mbi:"bagala wuu,loo yi ba yaba kii wu ba yagula.''Mu dangu ndambu di ba yagulagi,koogu ga gogudi. ⁶¹ Gahungu,ga balumuni miisu,gu gadi Piela,Gahungu mbi:"koogu wu teegu mugwitsa gogula leelu ndji wu tuunagi mbala djidadu.'' ⁶² Ye gu duga,ga didi ye kenda djiootsu. ⁶³ Baadu ba gami Yesu ba yandigi gu museya ye mu bula. ⁶⁴ Di bamuvadishi puu yi ngangu,ba mu yufudi ye gu yagula mbi:"yaguledi naa wu gubudi?" ⁶⁵ Ba yagudi mapandi meega ma vula ma maduga gwedi ndi. ⁶⁶ Mudangu guuma di gutshi,gi mvuga gi ba mbuda ba gulu,ba geshi kanu ye ba zushi ba vugani baa baneedi Yesu mu gimvuga gi baa. ⁶⁷ Ye ba yagudi mbi:"mbi weedi Kidishidu,du lela.''Haa ndi ga bavudidi mbi:"mbi bu yi leedi,binu loo lugwigilagi, ⁶⁸ ye mbi bu yi lu yufudi,binu loo luvudu lagi mvudu. ⁶⁹ Yabani mbi,mwaana muudu ga gala wu shigumugi gu googu di gidada di ngolu dsji Gahungu. ⁷⁰ Baa bayagudi baa bootsu mbi:"ndji disonga weedi mwaana wu Gahungu?"Ye ga bavudidi mbi:"lu ba miyagula,yeedi bwoobuna.'' ⁷¹ Baa ba yagudi mbi:"mudiambu di kii du fani dinga keega baadu ba gu geesa?Mumbada du biyugi pidu beeni mu ganu diaandi.''