¹ Dangu Yesu di ga dadi bwoona ga dadi ba mvwaama muni saa magabu ma baa mu sandugu di nzu yi bisambu. ² Ga dadi kega mukedu wu moshi wu mufwiidi wu tsugami,ga ba shi ndondu dji mbongu ndjoodi mu sandugu djina. ³ Bwoona Yesu ga yagudi mbi:"yi ba lu lela pandi yi kiediga:magabu ma mufwiidi wu tsugami ma ludi magabu ma shii baadu bootsu. ⁴ Mudiambu baa bootsu beedi ye mbongu dji baa djivula,bwoona ba gondi dala pashi muguhana magabu,haa mukedu wuu,mu gi tsugami giandi gahani mbongu djiootsu dji gagadi djia mu gudjingila.'' ⁵ Baadu beega ba gadi muguyagula mudiambu ye nzu yi bisambu yi ba yuuda mbi:nzu yi bisambu yii yedi yi pimbu ye madadi ma maa mapimbu mana ma shi baadu muna mu gu hana lugumu gwedi Gahungu.Bwoona Yesu mbi: ⁶ "Bima bii biluba dala,mubilumbu bi ba gwitsa loo gu sala shi dadi ye londi di madadi meega.Madadi maa mootsu bu mabwaa.'' ⁷ Bwoona ba mu yufudi mbi:"longi,ma pandi maa ma bwaa kii mutindu?Kii gidimbu gi moniga gina gi dulesa mbi dangu di fani bwaa pandi yina gulungi?'' ⁸ Yesu mbi:"ge bani pimbu,baadu ba luhunegu.Baadu beengi ba bula senda mu ndjina diami mbi:"yedi Mesiya!"Mbi:"dangu di lungi!"Haa binu loo gu ba landani. ⁹ Mbi bu luyugi baadu muni yagula mudiambu ye bidumba mbi loo gu balumaga gu mapandi,binu loo gu degidani;mapandi mana ma fani bwaa teegu.Haa tsuga yi pandi yiootsu loo yi gwitsa tswalu.'' ¹⁰ Bwoona ga ba ledi kega mbi:"baadu ba gifudi giega bu bagwitsa nwaanisa beeni gifudi giega,beeni gifidi giega bu ba gwitsa nwaanisa kega baadu ba gifudi giega. ¹¹ Manu bu manigagana ngolu;nzala yi ngolu shela ye gi kashi gi mbii bu gigala bihani biootsu;mapandi manamahegaga baadu booma ye bi dimbu bi ngolu bu bimoniga gu yilu. ¹² Haa dangu pandi yina yootsu yi gala konda bwaa teegu,bu ba lugama,ba lu dadisa pashi,ba lu needa mu nzu yi bisambu yi ba yuuda mudiambu ye gu lusambisa,ba lu saa mudangumbada ba lu needa gu misu ma ba todila ye ba guvedinela mudiambu ye mii. ¹³ Bwoona nga luhana gimbangi gi pimbu mudiambu ye mii. ¹⁴ Lu fani yaba mbi pandi yina lu yagula mudiambu lu binga,loo lu fani yi ndula gu misu. ¹⁵ Mudiambu mi beeni bu yi lu hega ndugi yi guyadila,shi mbeeni wu moshi loo ga saa teembi mukadi ga binu mbi loo muguduna mapandi mana ma lu bula yagula. ¹⁶ Shi ba dada ba binu,ba ngudi ba binu,ba pangi ba binu,baadu beega ba giganda gi binu,ye ba ndugu ba binu,ba lu hana gu mioogu mi ba mbeeni ba binu beega bu ba lu zuwa. ¹⁷ Baadu bootsu bu ba lumenga mudiambu ye mi. ¹⁸ Haa loo gwedi shi lu tsugi lu mooshi lu bila mu midu mi binu. ¹⁹ Bi bu lu gangi mbundu,bu lu huluga.'' ²⁰ Dangu di lu dala ba pumbulu ba ndjiedi Yelusalemi,bu lu yaba mbi gu sadi gandambu Yelusalemi di ba fwaa. ²¹ Mu dangu diadina baadu bana ba gala mu manu ma Yudeya,pimbu ba dina mu yega yedi mi ndonda;baadu beega ba gala mu kadi ga Yelusalemi,pimbu ba duga mudiambu ba dina gu leya;bwoona bana ba gala mutsegi loo gwitsa mudiambu di gu goda gu Yelusalemi. ²² Mudiambu bi lumbu bina bi gala bilumbu bi Gahungu gahana ndola gwedi baadu bandi,mudiambu mbi mana mootsu ma ba sonigi mu muganda ma Gahungu mabinga. ²³ Mu bilumbu bina,kenda gwedi ba kedu bana ba ma nzumu ye bana ba banwisa baana ba digi-digii ma beenu!Mudiambu pashi dji ngolu shela dji gala mu gifudi gii,Gahungu ga yugila beeni gifudi gii kabu. ²⁴ Ba ba zuwa mu mambedi.Ba baneeda mu gihiga mu gifudi giootsu.Bwoona baadu bana ba kondi ba yuuda ba gwitsa niada-niada tii gwoona gu hwaa dangu di baa.'' ²⁵ Bi dimbu bu bi moniga mu dangu,mu ngondi ye mu miooda.Yaa ye londi di manu baadu bootsu mu gifudi giootsu ba dala pashi gu mbundu.Ba dala booma mudiambu ye loolu di ngolu di ba la saa muungu dangu di luda muhunga. ²⁶ Baadu ba bula fwaa ngambu mudiambu ye booma di ba bula yindula mu pandi yina yi gwitsa bwaa yaa ye londi di manu bima bi ngolu bina biedi gu yilu bu bi nigagana. ²⁷ Bwoona lu dala mwaana muudu muni gwitsa mu kadi ga maduda,mu ngolu ye lu gumu lu neeni. ²⁸ Dangu di yandiga gu bwaa pandi yina,lu gala lu hwaa yilamana,lu niamugisa midu mi binu,mudiambu dangu di Gahungu di gu lu hulusa di gala di gumi pena-pena.'' ²⁹ Bwoona Yesu ga ba deedi gi ngana gii:"dalani miidi mi mafiji ye miidi miootsu. ³⁰ Mbi bu ludadi mbi gu yandigi gu dusa kasa,lu fani yaba mbi dangu di mvula di gumi pena-pena. ³¹ Pila yi moshi ye binu kega,mbi bu ludadi mbi pandi yina yi ba bwaa lu fani yaba mbi gi fwumu Gahungu gi gumi pena-pena. ³² ''Yi ba lu lela pandi yi kiediga:baadu beega ba dangu di loo ba fwaa mbi pandi yina yi konda hangamana. ³³ Yilu ye manu di gala gu tsuga yimiaa,haa ma longi ma mi loo ma gala ye tsuga. ³⁴ Ge bani!Loo lu fani yindula mu gu daga ma kindji gosu dangu mbi loo mu guzela malafu,loo lu fani yindula pashi dji ludjingu luu;mbi loo gilumbu gi lu yi tshila mu gi tulumugila. ³⁵ Mudiambu gu yitshila baadu bootsu beedi londi di gifudi giootsu nga mudambu. ³⁷ Gosu gi lumbu mu mwiini Yesu ga gadi muni longa mu nzu yi bisambu yi ba yuuda;haa mu piba genda mu mundonda wu miidi mi odive. ³⁸ Bwoona gosu gilumbu mu musuga-musuga baadu bootsu beendagi mu nzu yi bisambu mudiambu di gu muyugishila.