¹ Gi lumbu gi moshi ga gadi mu nzu yi bisambu yi ba yuuda,ga gadi muni longa baadu,ga gadi muni gu ba yabisa tsangu dji pimbu.Bwoona ba nganga ba Gahungu,ba longi ba tsigu ye ba mbuda beega ba bayuuda bu bitshi. ² Ba mu yufudi mbi:"du lela,mu kii giyega wu hangaga mapandi maa?Naa guhegi gi yega gieeni?'' ³ Yesu mbi:"mi kega yi ba yufula pandi yi moshi.Lu ndela ⁴ Mbi naa wu duumi Yowani mu gu bodiga baadu,Gahungu mbi loo baadu?" ⁵ Haa ba yandigi gu yagula baa ye baa mbi:"mbi bu duvududi:Gahungu wu mudumi'',ga du yufula mbi:"mudiambu di kii lu kondi gwigila mapandi ma Yowani?" ⁶ Haa mbi bu duyagudi :"baadu ba mudumi'',baadu bootsu ba gwitsa gu duzuwa mu madadi,mudiambu ba bootsu ba yabi pimbu-pimbu mbi Yowani ga gadi mbigudi wu Gahungu. ⁷ Bwoona ba yagudi mbi:loo duyabi mbi naa wu mudumi mu gu bodiga baadu. ⁸ Bwoona Yesu mbi:"mbi bwoona,mi kega,loo yi ba lulela mu kii giyega pangaga mapandi maa.'' ⁹ Dangu di,Yesu ga yandigi gu dela baadu gi ngana gi mbi:"gu gadi ye muudu wu moshi ga hangi mangundu ma vinu.Ga ma defishi gwedi baadu bana ba hangaga ma ngundu ma vinu,bwoona gee ndjinga ngolu mu gi fudi giega. ¹⁰ Dangu di gu gadula ndumba dji vinu di dilungi,bwoona ga dumi muhiga wu moshi gwedi baadu bana muni hanga mangundu mandi mudiambu ba muhega ndambu ndumba ndjina dji ga fani senda.Haa baadu bana ba budi muhiga weeni,ba mu tsagadi bwoona ga vudugi mioogu buna. ¹¹ Mweni ngundu yina ga dumi muhiga weega.Haa baadu bana ba mubudi kega,ba mudugi,ba tsagadi,bwoona ga vudugi mioogu buna. ¹² Bwoona ga dumi kega muhiga wu dadu.Ndi kega ba mulwadishi,ba mu lumbi ye ndjila. ¹³ Dangu di mweni ma ngundu mana ga yagudi gu mbundu yandi mbi:"kii fani hanga?Yi ba duma mwaana wu yi zolaga ngolu.Yi ba yindula ba mudjidisagi.'' ¹⁴ Haa dangu di baadu bana di dadi mwaana wuna,ba yagudi mbi:"ndi wuuwu wusala yinga dada wandi du muzuwa;bwoona mangundu masala mapidu.'' ¹⁵ Ba mudushi mu mangundu ma vinu,bwoona ba muzuwii.''Yesu ga ba yufudi mbi:haa mweni mangundu kii ga baa hanga? ¹⁶ Ga gwitsa zuwa baadu bana,bwoona ga defisa ma ngundu gwedi baadu beega.''Dangu baadu di ba yugi mapandi mana,ba yagudi mbi:"loo,loo gu fani gala buna!" ¹⁷ Haa Yesu ga badadi,bwoona ga ba ledi kii disongidila di mapandi maa ma sonigi mu muganda wu Gahungu mbi:"dadi di matshi ba dungi ma nzu di gumi dadi di gu luda fwunu''? ¹⁸ Gosumuudu wuna wu bwaa ye londi di dadi dina,bu gabaguga.Bwoona mbi dadi dina bu di bwidi gosu muudu wuna bu di mufutumuna ga guma nga fududu.'' ¹⁹ Mu dangu diadina,ba longi ba tshigu ye ba mbuda ba nganga ba Gahungu ba dinga pila yi gu gama Yesu mudiambu bu ba yabi mbi ga dii ginganagina mudiambu ye baa.Haa ba dinagi baadu booma. ²⁰ Bwoona,ba gingilagi dangu di pimbu mudiambu di gu mu gama,bwoona ba dumi baadu beega mu gwenda yu ga mu mayela mapandi mana ma gayagulagi.Baadu bana ba hanga mupila mbi ba badala nga baadu ba kiediga;bwoona mbi ba mu yufudi gosu mapandi mana ba fani mu gama mu pandi ya yina yi gavudula.Mudiambu ba gumuhega gu mioogu mi guvedinela. ²¹ Ba mu yufudi mbi:"longi,du ba yaba mbi mapandi mana ma wu yagula ye ma wu longaga meedi makiediga.Du ba yaba kega mbi wu sendaga baadu bootsu gi geledi,wu longaga kega ndjila yi Gahungu wu mukiediga djiootsu. ²² Du lela,mbi matshigu ma pidu ma duhegaga tswaa mu gufuda gidadi gi todila wu neeni wu gi fwumu gi Loma mbi loo?" ²³ Haa Yesu bu gayabi ndungi dji baa djina.Bwoona,ga ba ledi mbi: ²⁴ "Lu ndela lundondu lu moshi lu mbongu mbunzu yii ye djina di ye londi di mbongu dji yedi yi naa?"Ba mbi:"yedi yi todila wu neeni." ²⁵ Bwoona Yesu mbi:"wu todila wu neeni,hanani gwedi todila wu neeni;gwedi Gahunguhanani gwedi Gahungu.'' ²⁶ Mu mapandi mana ma gayagula gu misu ma baadu loo ba madadi mambi mana ma ba fani mugamina.Haa bu ba yidugi mudiambu ye mvudu yina yi gahani;bwoona,ba gadi peede. ²⁷ Basadiseya bitshi gwedi Yesu.{baa bayagulaga mbi:baadu loo ba niamugaga mu lufwaa} ba mu yufudi, ²⁸ Mbi:"longi,Moshi gaduhegi tshigu dji mbi muudu wedi wandi wuna wu kwedi,bwoona mbi mbuda wuna wu fwii haa mbi loo shi-shi shi mwaana wu moshi,mu gegi wandi ga fani kwela mukedu wuna mudiambu ga buda baana mu djina di mbunda wandi wuna wu fwii. ²⁹ Bwoona gu gadi ye ba bagala ba tsambwadi,ba gadi baana dada ye ngudi wu moshi.Mbuda wu baa ga kwedi mukedu bwoona ga fwii haa loo ga shi-shi shi mwaana wu moshi. ³⁰ Gu gadi gi geledi gwedi mugegi wu landi mbuda wuna ye mugegi wandi weega. ³¹ Gu gadi kega gidesu gi moshi gwedi ba bootsu ba tsambwadi ba kwedi kega mukedu wuna,bwoona ba fwii,haa loo ba shi-shi shi wu moshi. ³² Gu ngoyi,mukedu wuna ga fwii. ³³ Bwoona gi lumbu gina gi shamuga baadu bana ba fwii,mukedu wuna ga gala wu naa?mudiambu ba batsambwadi bu ba mukwedi.'' ³⁴ Yesu ga vududi mbi:"ba bagala ye bakedu ba dangu di,ba kwelaga. ³⁵ Haa ba bagala bana ye bakedu bana ba Gahungu ba dalaga mbi ba fani shamuga mu lufwaa ye gu djinga mu dangu di gwitsa,loo ba fani kwela. ³⁶ Loo ba fani fwaa kega,mudiambu ba gumi nga ba wandjio;bedi baana ba Gahungu mudiambu ba shamugi mu lu fwaa. ³⁷ Moshi ga ledi pimbu-pimbu,mu tsangu dji gamudi gana ga lemagi mbaa,mbi baadu bana ba fwii bu ba shamuga mu lu fwaa.Mudiambu bu ga lendigi fwumu Gahungu mbi:"Gahungu wu Abalahamu,Gahungu wu Yizagi,Gahungu wu Yagobu. ³⁸ Mapandi ma ba lesa mbi Gahungu wuna gedi Gahungu wu mooni haa loo gedi Gahungu wu baadu ba hwaa fwaa.Mudiambu baadu bana bootsu ba djingaga ye Gahungu bedi baadu ba mooni." ³⁹ Ba longi beega ba matshigu ba mu ledi mbi:"longi,wu ya gudi pimbu." ⁴⁰ Mudiambu loo ba dadi kega pila yi guyufula Yesu mapandi meega. ⁴¹ Yesu ga ba yufudi mbi:"buni ba fani yagula mbi mesiya wedi mwaana wu Davidi? ⁴² Mudiambu Davidi ndi beeni wu ba yagula mu muganda wu migunga mbi:"fwumu Gahungu lesa fwumu wami mbi:"gala yaa gu gogu diami di gibagala ⁴³ Tii gwoona gu yi saa ba mbeeni ba gu gumashina ma milu miagu mudiambu wu ba niada." ⁴⁴ Bwoona,mbi Davidi bu ga lendigi Mesiya mbi"fwumu'',bunii Mesiya ga fani gala kega mwaana wu Davidi?" ⁴⁵ Dangu baadu bootsu ba yugi Yesu,Yesu ga ledi ba longogi bandi mbi: ⁴⁶ ''Gebani mudiambu ba longogi ba tshigu ba zolaga gwenda luda-luda ye ma mvwela ma baa.Ba zolagagi baadu ba hega mbodi mu mazandu ba zolaga gu gala mu bidi bi teegu mu ma nzu ma bisambu ye mu bihani mi lugumu mu ma feedi. ⁴⁷ bendaga dambula bima bi bakedu bi bamifwiidi.Ba sambaga bisambu bi leeya mudiambu ye gudilela gwedi baadu mbi beedi baadu ba pimbu.Ba senda ndola dji guluda pashi.