¹ Mu dangu dina,gu dugi ye mi tsigu gu hangi Sezadi Agushide,mu gu soniga baadu bootsu ba djinga mu gifudi gianda! ² Gu sonigisa djina gu gadi nga gu teegu,dangu di gadi Kidiniusu wu gadi guvedinedi wu Sidiya. ³ Diadina baadu bootsu bendagi mu gudi sonigisa,gosu muudu gu vula diandi. ⁴ Yizefu keega ga dombugi gu Nazaledi gu gifudi gi Gadileya,ga gadi muni gwenda gu Yudeya vula di Davidi di ba lendigagi Beteliyeme;mudiambu ga gadi mu giganda gi Davidi. ⁵ Gendi mu gu disonigisa ye Madiya wu gadi mukedu,wu kandi moona.Wu gondi yaba shi bagala wu moshi. ⁶ Dangu di ga gadi yaana,dangu gilumbu giandi gi gubuda gi lungi. ⁷ Ga budi mwaana wu bagala,mwaana wandi wu teegu ye ba mushi mukadi ga gima gi dilaga ba mbitshi,udiambu loo ba gadi ye gihani mu nzu yin ba nzendji. ⁸ Mu gi ndjunga gina,gu gadi ye baadu ba dalagagi ba mbitshi mimbi mu piba mu tsegi mu gu dala ba mbitshi ba baa. ⁹ Mu mbala yi moshi,mu tumwa wu fwuu ga ba gumini ye mwini wu ngolu ga yuudi ye gadi baa,di ba yugi bwoona. ¹⁰ Mu tumwa ga ba ledi mbi:"loo gu yugani booma,mudiambu yi ba lu lela mapandi ma pimbu,ma lu hega gieshi gi vula gwedi baadu bootsu. ¹¹ Mu hulushi wuna gwedi Kidishidu wu budugi lelu gu vula di Davidi,geedi fwumu. ¹² Dalani bidimbu bi lu dala:lu dala mwaana wu mugeegi wu ba fidimigi miledi mu gi sandji gina gi dilaga ba mbitshi.'' ¹³ Mu mbala yi moshi gidiga gi ba pulushi ba yilu,bitshi wana wu yitshi teegu muna hana lugumu gwedi Gahungu mbi: ¹⁴ "lugumu lugala gwedi Gahungu guna gu yilu ye yaa ye londi di manu,mu kadi ga baadu bana ba muzolaga.'' ¹⁵ Dangu di dombugi ba tumwa bana gu yilu,baadu ba dala ba mbitshi ba yagudi mu kadi ga baa mbi:"twendani gu Beteliyemi du dala mapandi mana ma bwii guna,bi du hangidi fwumu.'' ¹⁶ Ba halumugi gwenda dala Madiya ye Yizefu ye mwaana wuna wu budugi,ga gadi wu hwaa nimbi mu gima gina gi dilaga ba mbitshi. ¹⁷ Dangu di bendi dala mapandi mana,ba yandigi gu lela baadu mapandi ma ba baa ledi mudiambu ye mwaana wuna. ¹⁸ Baadu bootsu ba yugi mapandi mana ba yidugi bu yagudi baadu bana ba dalaga ba mbitshi. ¹⁹ Haa Madiya,ga gadi muna yindulaga bima bina biootsu bi ga yugi,muna bi saa gu mbundu. ²⁰ Gu ngoyi bima bina ba fugi migogu bendi,mu ndjila benda hana lugumu gwedi Gahungu mu mapandi mana ma ba yugi ye mana ma ba dadi,nga bu ba ledi wandjio. ²¹ Dangu di ga lungishi bi lumbu ginana ba fani mu hanga mukanda,ba mu hegi djina Yesu dina di yagudi wandjio gu twala yi gu mu hanga mukanda. ²² Dangu di lungi gilumbu gi gugadula masumu ma baa nga bugadi gigalulu gi mitshigu mi Mososhi,Yizefu ye Madiya ba sendi mwaana ba mu needi gu nzu yi bisambu yi Yelusalemi mu gu muleshigisa gwedi fwumu. ²³ Landila bina bi ba sonigi mu mitshigu mi fwumu mbi:"mwaana wootsu wu teegu wu bagala ba fani mu sagumuna gwedi fwumu.'' ²⁴ Beendi keega mu gu hana magabu nga bu gadi tshigu yi hana fwumu:"mapombu moodi ma neeni mbi loo moodi ma digi-digii.'' ²⁵ Gu Yelusalemi gu gadi ye dada wu moshi djina dina Shimoni.Dada wuna ga gadi masonga ye wu hwaa gu gwigama.Ga gadi muni gi ganga gilumbu gi badula Yishiledi mu kenda,ga gadi wu hwaa yudisama mu muhunga wugedila. ²⁶ Muhungu wu gu gedila wu muledi gu twala mbi loo fwaa mbi loo wu dadi Meshiya wuna wedi fwumu. ²⁷ Shimoni gendi gu nzu yi bisambu,muhunga wu gu gedila wu mupushi mu gwenda.Ye dada ye gundi wu Yesu ba mu needi gu nzu yi bisambu mupila mbi ba lungisa bina bi dingi mitshigu mudiambu ye ndi, ²⁸ Shimoni ga sendi mwaana gu mioogu miandi,muna lumisa Gahungu mbi: ²⁹ "Dangu di fwumu yambula mbi musadi woogu genda ye ngemba nga bu yagudi ndaga yagu. ³⁰ Mudiambu misu mami ma dadi muhulushi, ³¹ wuna wu yidigi gu misu yi baadu bootsu. ³² Nga mwini wuna wu lesa ba pani ndjila yagu ye ga hana lugumu gwedi baadu bagu ba yishiledi. ³³ Dada ye ngudi wandi ba yugi gieshi mu bima bi bayagulagi mudiambu mwaana baa Yesu. ³⁴ Shimoni ga musagumuni ye ga yagudi gwedi ngudi wandi Madiya mbi:"mwaana wuu ga solugi mudiambu ye gu bwisa ye gu shamugisa baadu bavula ba Yishiledi geedi nga gidimbu giandi gi bula duna baadu. ³⁵ Mbedi yi gu dobula mooni gu tsuga yi gu dala mbi ngimdu ndji baadu bavula bu mi yabagana. ³⁶ Gu gadi keega ye mbigudi wu moshi wu mukedu djina diandi Hana mwaana wu Faniela mu giganda gi Hazadi.Ga gadi mbuda ga djingi mvula dji nsambwadi ye mulumi wandi wu makwela mulumi wandi ga fwii, ³⁷ gasadi nga mufwidi mamvula magumi ginaana ye maya,loo ga gala gu leeya ye nzu yi bisambu ye ga hangila Gahungu piba ye mwini mu guduna gu dia mudiambu ye gusamba gosu dangu. ³⁸ Mu dangu diadina Hana gi tshi gwedi baa ye gayandigi gu hana madonda gwedi Gahungu ye ga yandigi gu yagula mapandi ma mwaana wuna gwedi bana ba gingila mbi Gahungu gahulusa baadu ba Yelusalemi. ³⁹ Dangu di ba hangi mapandi mana mootsu nga bu baledi mitshigu mi Gahungu bendi gu baa ye mwaana gu bula di baa Nazaleti,mu gifudi gi galileya. ⁴⁰ Mwaana ga gadi muna gula,ga gulagi ye ndungi ye lugumunu lu Gahungu lu gadi gwedi ndi. ⁴⁴ Dada bendagi gosu mvula gu Yelusalemi mudiambu ye fedi yi pagi. ⁴² Dangu di ga lungishi mvula gumi ye djioodi ga dombugi mudiambu ye fedi nga bu gadi gilulu gi baa. ⁴³ Dangu bi hwii kindji bendi gu bula di baa,mwaana baa Yesu ga sadi gu Yelusalemi,haa ba dada bandi loo ba yabi mbi wu sadi. ⁴¹ Baa yindula mbi geedi ye ba ndugu baandi,ba hangi gilumbu gi moshi mu ndjila gu misu mu gu mudinga gwedi bandugu bandi ye ba dada bandi. ⁴⁵ Loo ba mudadi,ba vudugishi gu Yelusalemi mu gu dinga keega. ⁴⁶ Gu ludi bilumbu bi dadu di bendi mudala mu nzu yi bisambu wu hwemini mu kadi ga ba mbuda ba dibindu,muna ba yugishila ye gu ba yufula mapandi. ⁴⁷ Baadu bootsu ba mu yugishilagi ba gadi muna yiduga mu ndungi djiandi ye mu mamvudu mandi. ⁴⁸ Dangu di ba mudadi,ba yandigi gu yiduga ye ngudi wandi ga mu lendigi ga muledi mbi:"mwaana wami,mudiambu di kii wu du hangi buu?Yuga,dada woogu ye mi dwedi mu gu gudinga ye booma!.'' ⁴⁹ Ga ba ledi mbi:"mu kii giguma lu ba ndinga?Loo lu ba yaba mbi yi fani gala mu nzu yi dada wami?" ⁵⁰ Haa loo ba yabi bu ga bugaba lela. ⁵¹ Gu ngoyi di bendi yendi gu Nazaledi,ga ba yugidi.Ye ngudi wandi ga swega bima bina biootsu gu mbundu. ⁵² Haa Yesu ga gadi muna gulaga ye ndungi ye guleya ye ga bongi lusagumunu gwedi Gahungu ye gwedi baadi.