¹ Baadu ba vula ba dihani mu gu soniga mundandani mapandi ma ludi,ma ludi mu kadi ga pidu. ² Nga bu sonigi bana ba gadi,yandiga lu yandigu ba yitshi nga ba mbangi ye ba sadi ba ndaga. ³ Diadina,mi keega yi daadi mbi pimbu yi yufula pimbu-pimbu yandiga luyandigu kii biludi,ye mu gu gusonigila ndi Tiyofani. ⁴ Yi zodi mbi wu yaba pimbu malongi ma wu sendi. ⁵ Mudangu di du gadi Yelodi di fwumu wu bayuda,gu gadi ye musadi wu gGahungu wu moshi djina diandi Zagadiya,ga gadi mundonga yi basadi ba Abia.Mukedu wandi ga gadi mweni gi ganda gi Aloni,djina diandi di gadi Luzebedi. ⁶ Ba boodi gadi baadu ba pimbu gu misu ma Gahungu,ba lemvulagilagi pimbu mitshigu miootsu mihanagi fwumu. ⁷ Haa loo ba gadiye mwaana,mudiambu Luzebedi ga gadi mukobu,ye ba boodi ba gadi ba gumi bambuda mu dangu dina. ⁸ Gilumbu gi moshi,Zagadiya ga gadi muna hanga gisalu giandi gu musi ma Gahungu,gu gadi gilumbu gi ga fani hanga ye baadu ba gidiga giandi. ⁹ Nga bu gadi gi galulu gi baa mu gugooda mu sugu di gimengi,mu nzu yi bisambu,ba sulamanagi mu gu yaba kii mu samudi wu ba gooda ye gu fuba gi mengi. ¹⁰ Baadu bootsu ba gadi muna samba ye ndjila mudangu di guhana magabu ma mengi. ¹¹ Mutumwa wu Gahungu gitshi,ga manini mu muninga mu googu di gidada di sugu di gimengi. ¹² Di gadadi mutumwa,Zagadiya ga bwii gisaga-saga ye gayugi booma. ¹³ Haa mutumwa ga muledi mbi:"loo gu yuga booma,Zagadiya,mudiambu bisambu biagu ba bigumbudi.Mukedu Luzebedi ga buda mwaana wu bagala.Ye lu muhega djina di Jean. ¹⁴ Ga guhega gieshi gi vula ye ngemba,ye ba vula ba dala gieshi mu gubuduga gwandi. ¹⁵ Mudiambu ga gala muudu wu neeni gu misu ma fwumu,loo ga fani nwa vinu mbi loo ma lafu makabu.Ga gala wu yudisami mu muhunga wu gedila yandiga mu nzumu di ngudi wandi. ¹⁶ Baadu ba Yishiledi ba vula ba vuduga gwedi fwumu wu baa Gahungu. ¹⁷ Ga gala gu twala yi Gahungu ye muhunga wu ngolu nga Ediya,mu gu vudula mbundu dji ba dada gwedi baana ba baa ye gu needa bipumbula mu gu dinedisa bwedi ndungi dji beeni masonga,mupila mbi lu yidigila fwumu baadu ba yilamani.'' ¹⁸ Zagadiya ga yagudi gwedi mutumwa:"buni yi yaba mbi gu gala bwoobuna?Mudiambu yedi mununu,mukedu wami wu gumi mbuda loo fani buda keega.'' ¹⁹ MUtumwa mu ledi mbi:"yedi Gabriyele,muudu wu galaga gu misu ma Gahungu.Ga tumi mu gulela ye gu gudimuna pandi yii yipimbui. ²⁰ Dangu di,loo wu gwigidi mundaga yami.loo wu bula yagula tii gilumbu gihangamana yina mudangu didia.'' ²¹ Baadu ba yuga Zagadiya ba yidugi mbi ga gadi dangu di leeya gu meesa ma mengi. ²² Dangu di gadugi,loo ga kugi gu ba lela,ye bu gayabi mbi bina bi ga daadi gu sugu di mengi gwedi ndotshi,ga yandigi gu ba lela mubimbu loo ga yagula keega. ²³ Dangu di gamani gisalu,ga vudugi gu nzu yandi. ²⁴ Gu ngoyi dangu mukedu wandi Luzebedi ga sendi zumu.Ngondi dji danu gendi gu di swega,ga di lela mbi: ²⁵ "dala bu pangi fwumu;wu tshi misu mandi ye masagumunu mandi gwedi mi mudiambu ye gu kadula mu mapandi ma peega tsooni gu misu ma baadu. ²⁶ Dangu di lungishi zumu diandi ba ngondi ba sambanu,Gahungu gadumi Gabriyele gu bula di Galileya di ba lendigaga Nazaledi, ²⁷ gwedi mwaana wu mukedu wu moshi djina diandi Madiya ga gadi wu konda yaba yandu shi bagala wu moshi,Yosefu wu gadi wu konda gu mumona,mweni gi ganda gi Davidi.Mwana mukedu wuna ba mulendigagi Madiya. ²⁸ Gendi gwedi ndi ye ga mu ledi:"mbodi,gwedi wu sagumuni Gahungu,Fwumu geedi ye ndi.'' ²⁹ Mundaga yina,ga bwii gisaga-saga ye gandigi gu di yufuola mbi:mbodi djina kii dji ba lela. ³⁰ Mu tumwa ga mu ledi mbi:"Madiya,loo gu yuga booma,mudiambu wu sendi lusagumunu gu misu ma Gahungu. ³¹ Dala wu ba senda zumu wu buda mwaana wu bagala.Wu muhega djina di 'Yesu.' ³² Ga gala muudu wu neeni,ba bula mulendiga mwaana muudu wuna weedi gu yilu.Fwumu Gahungu ga mu hega gi fwumu gi giganda gi Davidi. ³³ Gabula yala bilumbu biootsu mu nzu yi Yagobu ye loo gu gala ye nzala mu gifwumu giandi.'' ³⁴ Madiya ga ledi mutumwa mbi:"buni gu hangamana,mudiambu di geedi yi yabi bagala?" ³⁵ Mutumwa ga mu ledi mbi:"muhunga wu gu gedila bu ga gwitsa gwedi ndi ngolu dji muudu wuna weedi gu yilu bu yi gu fidimiga gi ninga giandi.Bwoobuna,mwaana wuna ga gala muudu wu masonga,ba mu lendiga mwaana wu Gahungu. ³⁶ Ye dala pangi woogu Luzebedi wu sendi keega zumu mu ginunu giandi ga buda mwaana wu bagala.Wu lungishi ba ngondi ba sambanu,ye zumu,muudu wu ba lendigagi mugobu. ³⁷ Mudiambu,loo gwedi ya gima gi gondi gwedi Gahungu.'' ³⁸ Madiya ga yagudi mbi:"yedi musadi wu fwumu.Yambula mbi bihangamana gwedi mi nga bu lu yagudi.''Diadina mutumwa di gendi. ³⁹ Mudangu dina Madiya gendi tsalu gu bula di moshi di mundonda di gadi mukadi di vula di Jideyo. ⁴⁰ Ga vudugi gu nzu yi Zagadiya ye ga hegi Luzebedi mbodi. ⁴¹ Dangu di yugi Luzebedi mbodi yi Madiya,mwaana wu gadi mu zumu diandi ga nigagani.Muhunga wu Gahungu wu yuudi mu mbundu yi Luzebedi. ⁴² Ga shi milolu mu gadi ga ndaga mbi:"weedi wu hwaa sagumuga mukadi ga ba kedu bootsu,ye sagumuna lu ndumba luna lwedi mu kadi ga zumu diagu. ⁴³ Ye buni ba pegi gudi wu fwumu woogu mu gwitsa tala? ⁴⁴ Mudiambu,dangu di yugi mbodi diagu mu matsu mami,mwaana wu nigagani ye gieshi mu zumu diami. ⁴⁵ Gieshi gwedi muudu wuna wu gwigidi,mudiambu bina bi mu ledi fwumu bu bi lungisama.'' ⁴⁶ Diadina Madiya ga yagudi mbi:"mooni wami hana lugumu gwedi fwumu, ⁴⁷ muhunga wami wu yangadi gwedi Gahungu,muhulushi wami. ⁴⁸ Mudiambu wu shi misu gwedi mi mukedu wu gondi fwunu gi sadi giandi.Gi gidi mbi,yandiga leelu di maganda mootsu ma bula ndendiga mweni gieshi. ⁴⁹ Mudiambu,ngolu dji hangi gima gi ngolu gwedi mi;djina diandi djedi diandina shela. ⁵⁰ Kenda diandi di pasagana mu magu ye magu mana ma bula mu yuga booma. ⁵¹ Wu shi ngolu googu diandi ye ga pashigishi bana ba galaga lulendu. ⁵² Ga ba gadula ba fwumu mu bidi bi baa bi gifwumu.Ye ga ba gumisa baadu ba gondi fwunu. ⁵³ Ga ba gumisa baadu ba gondi nzala ye bima bi pimbu,haa mvwama,ga ba duma mioogu mi pimba. ⁵⁴ Gitshi gwedi mu gu sadisa baana ba Yishiledi ba mu sadilaga,mupila mbi ga ba lela kenda djiandi ⁵⁵ (nga bu ga yagudi gwedi ba dada ba pidu)gwedi Abalahamu ye gwedi gi ganda giandi giootsu mu bilumbu biootsu.'' ⁵⁶ Madiya ye Luzebedi ba djingi gihani gi moshi gi ba ngondi dadu,gu ngoyi bina,ba vudugi mu manzu ma baa. ⁵⁷ Dangu di gilumbu gi luzebedi gi gubuda gi lungi,ye ga budi mwaana bagala. ⁵⁸ Baadu ba pena-pena ye bapangi bandi ba yugi mbi fwumu wu hangi mapandi ma neeni gwedi ndi,ba yangaladi mu gimvuga ye ndi. ⁵⁹ Gi lungi gi lumbu gi ginana gi gu hanga mwaana mu kanda.Ba zodi gu mulendiga mu djina di''Zakadiya'',djina di dada wandi. ⁶⁰ Haa gudi wandi mbi:"loo,ba bula mulendiga Jean.'' ⁶¹ Ga ba ledi mbi:"loo gwedi shi muudu mu kadi ga ba pangi baagu wu fugi djina di.'' ⁶² Ga hanga bi dimbu gwedi dada mu gu yaba buni lu fani gu mu lendiga. ⁶³ Ga dingi dadi di gu sonigila ye ga sonigi mbi:"djina diami Jean.''Bootsu ba yidugi. ⁶⁴ Mu dangu diadina ganu diandi di gangugi ye lu lumi.Ga yandigi gu yagula,ga gumishi Gahungu. ⁶⁵ Diadina baadu bootsu ba gadi mu mimba nzu yi baa ba gadi muni yiduga.Ye mu gidini gi miselu mi yudeyo giootsu ba yagudila bima bina. ⁶⁶ Baadu ba yidugi mapandi mana ba migami mu ma mbundu ye ba diyufulagi mbi:"mwaana wuna ga gala naa?"Mudiambu googu di fwumu di gadi gwedi ndi. ⁶⁷ Zakadiya,dada wandi ga muyudisami mu muhunga wu gedila,ga yandigi gu yagula mu djina di Gahungu mbi: ⁶⁸ "ga ba sagumuna fwumu,Gahungu wu Yishiledi,mudiambu wu dadi baadu bandi ye wu lungishi mu gu digulumusa mu luudu lu gi muudu. ⁶⁹ Wu du dumishidi musadi wandi wu ngolu wi giganda gi Davidi,muhulushi wandi. ⁷⁰ Bwoona bu ga yagudi gwedi baadu ba masonga mu dangu di ludi bana ba yagulagi mapandi magwitsa gu misu. ⁷¹ Gwedi lusagumunu lu ba du gadula gu mioogu mi ba mbeni ye gwedi bana bootsu ba gondaga gu du zola(ye gu du duna). ⁷² Wu di fanigishi ye ba dada ba pidu ye wu yibugi lushilu lwandi lu gashi, ⁷³ mu gu dala gushila gu ga gumbudi gwedi Abalahamu dada wu pidu,mu gu duhega. ⁷⁴ Gu ngoyi yi gu du dambula gu mioogu mi bambeni,mu pila mbi du musamba ye gu gonda booma, ⁷⁵ mu pimbu ye masonga gu misu yandi yandi mu luzingu lu pidu lwootsu. ⁷⁶ Ndji,mwaana wami,wu gala mu yagudi mapandi ma muudu wuna wedi gu yilu,mudiambu wu gwenda ye fwumu mu gwitsa gwandi. ⁷⁷ Ye gu lela gwedi baadu mbi bu ga bahulusa mu masumu ma baa. ⁷⁸ Gahungu wu pidu bu ga du yambudila ma sumu mu kenda djiandi.Mu kenda djina,ga gwitsa nga bu dugaga dangu gu yilu. ⁷⁹ Ga hana mwini gwedi baana beeni mu piba ye mu bivudi bi gu fwaa,mu pila ga duneeda mu ndjila yi ngemba.'' ⁸⁰ Haa mwaana ga gadi muna gula ye gu guma buguba mu muhunga ga djinga,mu tsegi tii mu gilumbu gina gi ga yandigi gu di deshigisha gwedi baana ba Yishiledi.