¹ Dangu di,Yesu ga ba dedi gi ngana mudiambu ye gu ba longa mbi:lu fani sambaga Gahungu dangu diootsu gu gonda gu lembwa. ² Yesu mbi:gu bula dji moshi gu gadi ye sushi wu moshi wuna wu gondaga dina Gahungu booma,loo gwandi ga sagaga shi baadu beega lu djidu. ³ Gu mbula dieni dina gu gadi ye kega ye mukedu wu moshi wu mu fwiidi,gi tsaga lesa zushi wuna mbala divula mbi:gesa mapandi ma pidu mu pila mbi mi yi nunga,bwoona mbeeni wami ga beela. ⁴ Zushi wuna ga dunaga gwandi mbala djivula mu gu hanga mutindu wuna wu dzolaga mwaana mukedu weeni.Haa gu ngoyi,ga yagudi gu mbundu ya mbi:shi mi loo yi dinaga Gahungu booma,shi loo yi djidisaga baadu beega, ⁵ Haa mufwiidi wu ga banzangisa,bwoona,yi fani gu musadisa mbilo,ga bala gwitsa vuduga mbala djivula mudiambu ga ndembwisa. ⁶ Bwoona fwumu Yesu ga yagudi kega mbi:yu gani mapandi ma bupala ma yagudi zushi wu. ⁷ Mbela Gahungu loo gasadiga baadu bana ba gasodi,abeena ba mulendigaga piba ye mwiini mudiambu ga basadisa?Mbela bu ga sunginina mu gu ba sadisa? ⁸ Yi ba lu lesa mbi:ga ba sadisa swaalu.Haa dangu mwaana muudu di ga gwisa ye loondi di manu,bwoona ga gwisa wana baadu ye lu gwigilu? ⁹ Yesu ga di kega gi ngana gi gwedi baadu beega bana ba yagulaga mbi beedi baadu ba pimbu,bana kega ba sawulaga baadu bootsu. ¹⁰ Gu gadi ye baadu boodi,beendi gu nzu yi Gahungu mudiambu ye gu sambila,muudu wu moshi ga gadi mu fadishi,bwoona muudu wega ga gadi galagi ga fudisaga baadu bi dadi. ¹¹ Mufadishi wuna ge manana mwaa guleya ndi beeni,bwoona ga sambidi pila yayi mbi:Gahungu,yi ba gu guhega madonda,mudiambu loo yedi nga baadu bootsu bana bedi beebi,baadu ba bu pala ye ba gindumbu yi ba gu hega madonda kega mudiambu loo yedi nga galagi ga fudisaga bidadi. ¹² Mu gosu yi dunaga gudia mbala djioodi mudiambu ye gu gusambila,bima biootsu bi yi sendaga yi ga bisaga magabu gumi,haa ndambu yi moshi yi gu guhegaga magabu. ¹³ Haa galagi gena ga manani mwaaguleya ga ndambu.Loo ga dala pila yi gu dala gu yilu,haa ga bulaga ye tulu yandi,ga yagulagi mbi:Gahungu nzuga kenda,mudiambu yedi muudu wu masumu. ¹⁴ Haa Yesu ga yagudi kega mbi:yi ba lu lela mbi dangu galagi ga bi dadi di gavudugi gu nzu yandi Gahungu buga mugumbudi,haa loo ga gumbudi mu fadishi wuna mudiambu Gahungu ga gulumusaga baadu bana bootsu ba didzangulaga,bwoona ga dzangulaga bana bootsu ba di gulumusaga. ¹⁵ Dangu di,baadu bitshi neda baana ba ba gegi gwedi Yesu mudiambu ga ba saa mioogu,dangu ba tumwa di ba badadi,ba yandigi gu ba nganina, ¹⁶ Haa Yesu galedi baadu bana mu gu neda baana ba baa pena-pena ye ndi,bwoona ga ledi ba tumwa baandi mbi:yambulani baana bitsa ya gwedi mi,lu ba gangegu ndjila mudiambu gi fwumu gi Gahungu giedi gwedi baadu bana beedi nga baa. ¹⁷ Yi ba lulela ma pandi ma kiediga,gosu muudu wuna wu gondi gumbula gi fwumu gi Gahungu pila mwaana yi ga yigumbulaga,loo ga goda shi gandambu mu gi fwumu gina. ¹⁸ Fwumu wu moshi wu ba yudashi gitshi yufula Yesu mbi:longi,ndji muudu wu pimbu kii yi fani hanga mu gu senda wu mvula ye mvula? ¹⁹ Yesu ga yagudi mbi:mudiambu di kii wu ba yagula mbi mi yedi muudu wu pimbu?Shi muudu wu moshi loo gedi wu pimbu,gwedi Gahungu buna. ²⁰ Ndji wu yabi tshigu,loo wu hangaga gi ndumbu,loo wu dzuwaga muudu,loo wu yibaga,loo wu ya gulaga ma pandi ma bupala,djidjisa dada wogu ye ngudi wogu. ²¹ Haa muudu wuna mbi:yi landaga tshigu djiootsu ya ndiga gi gegi giami. ²² Dangu Yesu di gayugi mapandi mana ma ga mu lela mbi:gima gi moshi gi gu gondi kega nda wenda wu dega bima biagu biootsu,wu hega ba tsugami mbongu,haa nga wu gala ye gi mvama gu yilu gu ngoyi yi gia wu ndanda. ²³ Haa dangu muudu weni di ga yugi mapandi mana,ga gumi kenda-kenda,mudiambu ga gadi ye gi mvama gi vula. ²⁴ Dangu Yesu di gadadi mbi fwumu wuna wu gumi kenda,ga yagudi mbi:pashi dji vula gwedi ba mvwaama mu gugoda mu gi fwumu gi Gahungu. ²⁵ Mbitshi wu neni,shamon ga fani dala pashi mu gu goda mu ndjila shi shindani,haa mvwama ga fani dala pashi dji guluda kega gi desu mu gu goda mu gi fwumu gi Gahungu. ²⁶ Baadu bana ba mu yugi ba ma mu yufudi mbi:haa wu fani huluga? ²⁷ Yesu mbi:mapandi mana ma baadu ma fani gonda hanga,Gahungu ga fani ma hanga. ²⁸ Dangu di Piedi ga yagudi mbi:dala,du shi-shi ma nzu ma pidu mudiambu mu gwitsa gu landa. ²⁹ Yesu mbi:yi ba lulela ma pandi ma kiediga,mbi muudu buga shi-shi nzu yandi,mukedu wandi,ba pangi baandi,dada ye ngudi wandi,mbilo baana bandi mudiambu gi fwumu gi Gahungu. ³⁰ Ndi ga senda ma gabu ma gu luda gi desu mu dangu di,haa mu dangu di bagwitsa,ga senda moni wu mvula ye mvula. ³¹ Yesu ga nedi ba tumwa bandi gumi ye boodi mwaa gleya ga ndambu ye baadu beega,haa ga ba ledi mbi: yu gani pimbu,du ba gwenda tii gu yelusalemi aguna ma pandi mootsu ma bwaa pila yi sonigi ba mbigudi mudiambu ye mwaana muudu. ³² Mudiambu ba mu hana gu mioogu ma bapani,bu ba museya,bu ba mu duga,ba mu logudila meedi. ³³ Ba mu bula muswamba,bu ba mu ndzuwa,haa mu gilumbu gi dadu,Gahungu bu ga mu niamugisa mu lu fwaa. ³⁵ Dangu Yesu di ga gumi pena-pena mu gu guma gu bula di yedigo,muudu wu moshi ga gadi gi fwaa misu,ga gadi wu hwemini mu mbimba yi ndjila.Gadinga ma gabu gwedi baadu. ³⁶ DEangu di ga yugi baadu ba vula muni luda ga yufudi mbi:ki bibwii? ³⁷ Ba mu ledi mbi:wuna Yesu muudu wu nazaledi wu ba luda. ³⁸ Haa ndi ga yagudi mu ndaga yi ngolu mbi:Yesu,mwaana wu davidi,ndzuga kenda! ³⁹ Baadu bana ba gadi gu misu ba yandigi gu mu nganina mbi:ganga ganu diagu!Haa ga yagudi kega ngolu mbi:mwaana wu davidi,ndzuga kenda. ⁴⁰ Yesu ga manani,haa ga yagudi mbi:yi dzani lu muneda muudu wuna yaa,dangu muudu weni di gitshi pena-pena ye Yesu,Yesu ga mu yufudi mbi: ⁴¹ Wu dzodi yi guhanga kii?Muudu wuna mbi:Fwumu,yi dzodi gu dala kega. ⁴² Yesu mbi:dala kega,mudiambu lu gwigilu lwoogu lu gu gindishi. ⁴³ Mu dangu diadina,muudu weni ga yandigi gu dala kega,haa ga yadgi gu landa Yesu ye ngoyi ye gu haga Gahungu lu gumu,dangudi baadu bana bootsu ba gadi yena ba dadi mapandi mana,baa kega ba yandigi gu hega Gahungu lu gumu.