¹ Dangu di dulagi dootsu du bi dadi ye baadu beega ba masumu ba bootsu bitshi gwedi Yesu mudiambu ye gu mu yugishila. ² Ba fadishi ye ba longi ba tshigu ba yandigi gu mutsuba mbi:"dalani muudu wu yambaga baadu mbi,ye gu dia ye baa!" ³ Yesu ga ba deedi gi nganagi mbi:" ⁴ Mbi mukadi ga binu muudu wu moshi wedi ye ma mema kama yi moshi,bwoona di mema di moshi di bidii ki ga hanga? loo ga fani ya mbula mamema mana mega magumi gi vwaa ye gi vwaa mu gisanga,mudiambu ge gadinga dimemadina di bidii,tii gwoona gu gadidalagi? ⁵ Bwoona mbi bugadidadi,wu di shi ye mbanda yandi mu gieshi, ⁶ Bwoona mbi ga vudugi gu nzandi.Mbi bu ga gumi gu nzu,ga lendiga ba ndugu bandi shi baadu ba galagagi pembeni ye nzu yandi.Bwoona ga ba lesa mbi:''galani mu kieshi ye mi mudiambu yi dadi dimema diami dina di bidi." ⁷ Yi ba lulela mbi gi desu gi moshi mbi Gahungu ga dala gieshi gi vula mudiambu ye muudu wu moshi wu masumu wu ba lumuni mbundu.gieshi giandi gina giluda gieshi gina gi gadalagagi mudiambu ye baadu magumi givwa ye givwa ba pimbu bana ba gondi funu mu gubalumuna mbundu. ⁸ Ye kega,mbi gwedi ye mukedu wu moshi wedi ye mbongu dji ndondu gumi,haa wu bidishi lu ndondu lu moshi gi ga fani hanga?ga fani le misa winda,ga fani gomba nzu ga dinga lu ndondu luna pimbu-pimbu tii gu ga didala. ⁹ Bwoona mbi buga lu dadi,ga lendiga ba ndugu bandi ba bakedu ye ba kedu bana ba galagagi mu mbimba nzu wandi.Bwoona wu ba leshi mbi:"yi zaani du yangalalani ye mi,mudiambu yi dadi lundondu lwami lu mbongu lu bidi. ¹⁰ Pila yi moshi kega,yi ba lulela mbi,bawanjio ba Gahungu ba dala gieshi mudiambu ye muudu wu moshi wu masumu wu balumuni mbundu." ¹¹ Yesu ga yagudi kega mbi:''gu gadi ye muudu wu moshi ga gadi ye baana boodi ba bagala. ¹² Gi lumbu gi moshi mwaana wuna wu mugegi ga ledi dada wandi mbi:"dada,pega gabu diami mukadi ga gimvwama giagu gina gi fani senda ya yena dada baa ga ba gabidi bima biandi. ¹³ Gu ngoyi bi lumbu ndambu,mu gegi ga degi bima biootsu bi ga sendi gwedi dada wandi gendi mu gi fudi gi leya.Guna gu gendi be bisa mbongu djiandji mu gisaga-saga. ¹⁴ Dangu di ga manishi mbongu djiandi djiotsu,nzaala yi ngolu yi godi mu gi fudi gina,ga yandigi gu dala pashi. ¹⁵ Ya yena di gedinga gi salu gwedi muudu wu moshi wu gi fudi gina,bwoona muudu wuna ga mu bongi mu gisalu.Ga mu shi mu mangundu maandi mudiambu ye gu dala ba ngulu bandi. ¹⁶ Gadzolaga gu dia ndumba djina dji dia bangulu,mudiambu ga yuguda,haa shi muudu wu moshi loo ga muhega gu dia. ¹⁷ Dangu di,ga yandigi gu yindula lu djingu lwandi haa gayagudi gu mbundu yandi mbi:"baadu ba vula ba hangaga gu nzu yi dada wami beedi ye mavula mana ma ba fani gonda manisa mu gudia.Haa dala mi ndo yi ba fwaa gunzala aya. ¹⁸ Yi ba vuduga gwedi dada wami bwoona yi mu lesa mbi:"da yi hangi masumu gwedi Gahungu ye gwedi ndji. ¹⁹ Loo fani kega gu gala mwana wogu;tsenda ga muudu wu moshi mu kadi ga baadu ba gu ba gisalu." ²⁰ Dangudi,ga yambudi gi fudi gina,ga vugi gwedi dada wandi."Dangu mwana weni ga gadi munzila,gidamina ye nzu yi baa,dada wandi ga mu dadi,ya yena ga muyugidi kenda,dangu di,gendi tiinu mu gu wanagana ye mwana wandi mu nzila,ga mu yambi,ga muhegi beeshi. ²¹ Haa mwana ga ledi dada wandi mbi:''da yi hangi masumu gwedi Gahungu ye gwedi ndji.Loo fani kega mugu gala mwana wogu.. ²² Dada ga ledi ba higa baandi mbi yi zaa lu neda tswalu lobu di gu luda pimbu,lwitsa lumu vadisa.Lumu vadisa kega lupedu mu lembu ye giladu mu milu. ²³ Lwitsa lu neda mwana ngombi wu matshi ma vula,lu mu dzuwila nga lu hanga kindji. ²⁴ Mudiambu mwana wami ga gadi nga muudu wu gu faa,haa ndi wu sendi kega moni;bu gabidi,ye yana wu monigi kega.Dangu di,ba yandigi gu da kindji. ²⁵ Dangu di ba hanga kindji mwana wandi wu mbuda ga gadi mu mangundu.Dangu di tshi vuduga ga gumi finama ye nzu ga yugi baadu muni gina midjigi. ²⁶ Ga lendigi boyi wu moshi,ya yena ga mu yufudi mbi:"ki mapandi ma bwi guna?" ²⁷ Boyi mbi mu ge giagu witshi vuduga gu nzu,ya yena dada wogu ga mu dzuwidi mwana ngombi wu matshi,mudiambu gi tshi vuduga ye ludu lu pimbu. ²⁸ Dangu di,mwana wu mbuda ga yugi kabu djiingi;ga duni gu goda mu ndzu haa dada wandi gi tshi duga, bwoona ga yandigi gu muwondila mbi:"yi zaa goda mu nzu." ²⁹ Haa ga ledi dada wandi mbi:''dala!yi gu hangidi ma mvula mavula yi guhangilaga nga muhiga,loo yandu yi duni ndaga ya gu shi gilumbu gi moshi.Dangu di loo shi gi lumbu wu ndzuwidi mwana ngombi wu matshi.Yi hangi ba kindji ye ba ndugu bami. ³⁰ Haa mwana wogu wu wumani mbongu mu ba kedu bana ba hangaga gindumbu,dangu di gitshi vuduga,wu mudzuwidi mwana ngombi wu matshi!'' ³¹ Dada wandi ga muledi mbi:''mwana wami,ndji wu galaga dangu diootshu ye mi bima biami biootsu bedi biagu. ³² Gwedi pimbu mbi du dani kindji,du yangalalaani,mudiambu mu gegiagu wu ga gadi nga muudu wu gu faa,haa wu sendi moni;bu ga bidi haa wu monigi kega."