¹ Gi lumbu gi moshi gi gadi gi lumbu gi hululuga,Yesu gedia gu nzu yi ba farizi ba mu godulula. ² Muudu wu mooshi wu gadi ye mioogu,milu mi gu djimba gi tshi manana gu misu ma Yesu. ³ Yesu yu fudi ba longogi batshigu ye ba farizi."Mu tshigu dji pidu ba hani tswaa mu gu gindisa muudu mu gilumbu gi gu hululuga mbilo? ⁴ Haa ba gadi kaga pwedee.Yesu ga gami mukashi ga mu gindishi,ga mu leshi mbi nda gogu!'' ⁵ Dangu di,Yesu ga ba yufudi mbi:"mbi muudu wu moshi mu kadi ga binuwedi ye mwaana mbilo ngombi wuna we mbwaa mu wulu di mwetshi, loo ga fani gu mudusa mudangu dina,shi gwedi gi lumbu gi gu hululuga?'' ⁶ Haa loo ba dadi pila yi gu hana mvudu. ⁷ Dangu Yesu di ga dadi mbi,baadu ba balendigi mu gudia beedi gu sola bihani bi lugumu ga badedi gi ngana mbi: ⁸ Mbi muudu bu ga gulendigi mu kindji yi wala loo gala ye gi lugumu mudiambu gu fani ye muudu wega wu gu ludi mulugumu. ⁹ Dangu di gwitsa muudu wuna wu gu lendigi binu boodi ga gwitsa gu lulela mbi niamuga shisa gi hanigi.Wu niamuga ye tsoni mu gwenda ye gi hani gi tsuga. ¹⁰ Haa,mbi bu ba gulendi mukindji nda shigumuga ye gi hani gi tsuga, dangu di tsaa Fwumu kindji ga gu lesa mbi ndoyi: yi zaa gala ye gi hani gi lu gumu.Mudiambu wu gala ye lu gumu gwedi baadu bana ba lu badia baa mesa ma moshi. ¹¹ Muudu wotsu wu ba gudi saa bu ba mugulusa,wu ba gudigulumusa bu ba mudombusa mu misu ma baadu bootsu. ¹³ Haa mbi wu ba hanga kindji lendiga ba tsugami,baadu bana beedi ye miogu,milu mi gi fuu,ye bi fwa misu. ¹⁴ ndji wu gala mu gieshi,mudiambu loo ba dala pila yi gu guhanga pila yi wu ba hangi.Gahungu ga gu hanga pila yina dangu di ga niamusa baadu ba pimbu mu lu fwaa,bana ba hangagi ma pandi ma muhega gieshi.'' ¹⁵ Muudu wu moshi mu kadi ga baadu bana bagadi mesa ma moshi Yesu dangu di gayugi ma pandi ga leshi Yesu mbi:"gieshi gwedi muudu wuna wu dia mu gi Fwumu gi Gahungu!'' ¹⁶ Yesu mbi:muudu wu moshi wu yidigi kindji yi neni,ga lendigi baadu beengi mu gwitsa mu kindji yina. ¹⁷ Dangu di bayidigi ma pandi ma kindji gu hwi,ga dumishi muudu wandi mudiambu ye gulesa baadu bana ba galendigi mbi:"yi zaa lwitsa kindji yi finamani dangu di.'' ¹⁸ Haa mu gadi ga baadu bana bootsu kosu muudu ga yandigi gu hana mvudu mu pila yandi.Muudu wu tegu ga ledi muudu wuna mbi:yi tsumbi ngundu yi fani gwedala,ndolula mbi budzodi. ¹⁹ Muudu wega mbi:''yi sumbi bangombi bami gumi,bwoona yendi mu gu bamega mbi beedi ngolu mu guhanga gisalu.Ndolula,mbi bu dzodi. ²⁰ Wega kega mbi:"yi hangi wala bilumbu biabibi;loo yi ba dala pila yi gwitsa. ²¹ Bwoona muudu wuna ga vudugi gwedi fwumu wandi,nga muleshi ma pandi mana ya yena fwumu wandi wu nzu ga yugi kabu djingi,ga leshi muudu wandi mbi:''ndawenda tswalu mu masandu ye mu ma bala-bala ma mabula.Senda ba tsugami,baadu bana beedi ye mioogu,milu mi gifu ye bi fwaa misu,bwoona yi ba nada yaa. ²² ''Bwoona Muudu wuna loo gendi guleya gitshi lesa fwumu wandi mbi:yi hangi biootsu bi wu ndeshi,haa bi hani bwega bieedi mudiambu ye baadu beega. ²³ Dangudi,fwumu ga leshi muudu wandi wu gisalu mbi:nda wenda mu mandjila maneni ye ma kunda mana medi mu tsegi.Ba lesa bitsa mu kindji yi mudiambu yi ba dzola mbi nzu yami yi yula ye baadu. ²⁴ Haa yi ba lula mbi loo gwedi shi muudu wu moshi mu kadi ga baadu bana ba yilendigi tegu mu gwitsa dia mu kindji yami!'' ²⁵ Baadu ba vula beenda luda Yesu ndjila yi moshi.Ga balu mugi mu lugalu luna lu bagadi, bwoona ga ba leshi mbi: ²⁶ ''gosu muudu wu ba gwisa gwedi mi loo ga fani gala mutsadi waami mbi loo gaduni dada ndi,ngudiandi,mu kedu wandi,baana bandi,ye pangi bandi ba bagala ye ba bakedu;ga fani gudiduna ndi beeni. ²⁷ Gosu muudu wuna wu ba konda neda kundji wandi,wu ba konda ndanda loo ga fani gala tsadi wami. ²⁸ Haa mbi muudu wu moshi mu kadi ga binu ga wu dzola dunga nzu yi leya,tegu ga fani hwemina mudiambu ye gu yindula mbi gedi ye mbongu talu gwaa mudiambu ye nzu yina. ²⁹ Bwoona ga yaba mbi ye mbongu di gulunga mudiambu ye gu manisa nzu yina. Bwoona mbi bugashi lu yandigu lu nzu,dangu di loo ga dadi pila yi gumanisa nzu yina,baadu bootsu ba dala nzu yina ba yadigi gu museya ye gu mu lesa. ³⁰ Mbi:ki mutindu muudu wu,ga yandigi gu dunga nzu,haa dadi pila yi gumanisa! ³¹ Pila yi moshi kega,mbi Todila wedi ye ba pumbulu mafunda ma gumi moodi buna,bwoona mbi ga badzodi gwe nwana ye Todila wega,tegu ga fani dala pimbu-pimbu mbi wu fani nwana ye Todila wuna wedi ye ba pumbulu mafunda ma gumi moodi? ³² Mbi lombi bwoona dangu todila wuna weega wedi gu leya,ga fani dumisa tumwa ba todila weega mu gu bayufula mbi kii du fani hanga mudiambu du gala mu ngemba?'' ³³ Yesu ga yagudi kega mbi:"pila yi moshi kega mudiambu ye binu:loo gwedi ye muudu wu moshi fani gala mu longogi wami mbi loo ga duni bima biandi biootsu.'' ³⁴ Mungu gedi gima gi moshi gi pimbu,haa mbi tomu yandi mbi bi hwi ki pila ba fani vudula kega tomu yina? ³⁵ Ba fani hangila kega shi mu manu ma mangundu,shi mu gihani gina yi ba basaa vindu yi ba mbitshi,haa ba fani matsa.kosu muudu wuna wedi ye matsu maguyuga ga yuga!''