¹ Gu gadi muudu wu moshi djina diandi Ananiashi,ye mukedu wandi Safira.Ba degagagi ndambu yi manu ma baa. ² Haa Ananiashi ga gadudi ndambu yi mbongu ya yena ge hana ndambu yega gwedi ba tumwa,mukedu wandi kega bu ga yabagi mapandi mana. ³ Piela ga yagudi mbi:Ananiashi mudiambu di kii sadana ga gu godi mu mbundu yaagu,ga ba gu lela mu gudaa bupala gwedi muhungua wu Gahungu?Mudiambu di kii sadi swega ndambu mbongu di wu degi manu mana? ⁴ dangu di wu gadi wu gonda dega manu mana disonga loo magadi magu?Dangu di wu degi mbongu dji gadi djiagi shi.Wu kanda hangila nga bwoona bu wuzolagi.Kii pila wu hangi mu mbundu yagu mu gu hanga buna?Loo wu yagudi bupala gwedi baadu haa gwedi Gahungu. ⁵ Dangu di yugi Ananiashi mapandi mana ga bwii ya yena ga fwii.Booma bu vula shela bu gami baadu bana ba yugi mapandi mana. ⁶ Baana ba bagala bitshi ganga mvumbi yandi miledi ba munedi ye ndjila mudiambu di gwenda gu mu djiga. ⁷ Gidesu gi madangu madadu maludi,gu ngoyi mukedu wu Ananiashi gitshi goda kega.Loo ga yaba mapandi mana mabwii. ⁸ Piela ga mu yufudi:ndesa,mbi mu talu yina lu degi manu ma binu?Ndi mbi:"eeh"ya yina kaga. ⁹ Ya yena Piela mbi:"mudiambu di lu wagani mu gumega muhunga wu Gahungu?Yuga,baadu bana bendi gu djiga mulumi woogu,ba gumi ye giafulu,ba mu needi kega ye ndjila. ¹⁰ Kaga mudangu diadina ga bwii mu milu mi Piela,ya yena ga fwii.Dangu baana ba bagala di bitshi goda ba mudadi wufwii.Ba muneedi yendjila bendi mu djiga pena-pena ye mulumi wandi. ¹¹ Booma bu vula bu gami baadu bootsu ba dibundu ye bana bootsu ba yugi mapandi mana. ¹² Ba tumwa ba hangaga mapandi mavula ma gu yiduga mu kadi ga baadu.Ba kidishidu bootsu ba wagani mu gimvuga gi moshi mu mbasani yi Salomon, ¹³ ye shi muudu wu moshi loo gitsaga wanagana ye baa;haa ba bahegaga lugumu lu vula. ¹⁴ Ba bagala ye bakedu ba vula ba gumbulaga Fwumu Yesu mu mbundu dji baa,ya yena talu yi ba kidishidu yi gumaga yi vula. ¹⁵ Mudiambu di mahanga mana ma hangaga ba tumwa baadu bitshi gu saa bakashi mu mabala-bala ye londi di biandu ye mu bipoyi mudiambu,dangu Piela di gwitsa luda givudivudi gi gama gosu muudu wuna mu kadi ga baa. ¹⁶ Baadu ba vula bitsaga,ba dugaga mu mabula ma pena-pena ma Yelusalemi,mudiambu mu gwitsa gu Yelusalemi.Bitsaga needa bakashi ye bana ba gadi ye mihunga mimbii.Bwoona ba bootsu ba gindaga. ¹⁷ Fwumu wu ba nganga badibundu ye baadu bana bootsu ba gadi ye ndi ba mu gu goda mu mapandi mana mudiambu ba gadi musogi gwedi ba tumwa. ¹⁸ Ba gami ba tumwa ya yena ba shi mudangu mbada. ¹⁹ Haa mu kadi ga piba,wandjio wu Fwumu Gahungu gitshi gangula giafulu yi dangumbada,ga ba dushi ye ndjila ya yena ga ba ledi mbi: ²⁰ "Ndalwenda lu manina ye nzu Gahungu.yabisa baadu mapandi mootsu mana ma dadidi mooni wu paa.'' ²¹ Batumwa ba yugidi wandjio wuna,ya yena mu musuga-musuga shela bendi goda mu nzu yi bisambu ba yadigi gu longa.Fwumu wu banganga ba Gahungu ye baadu bana ba gadi yendi,ba lendigi ba lendigi bambuda bootsu ba Yishiledi,ga dumishi ba pudishi bandi mu gwenda dinga ba tumwa mudangumbada. ²² Haa,dangu di gumi ba pulushi gu dangumbada loo ba badadi,bitshi vuduga,ba bayabigishi: ²³ ''Du dadi dangumbada yi gu ganga pimbu-pimbu shela,ba pulushi ba manani ye twala yi giafula,loo ba dadi shi muudu wu moshi mukadi.'' ²⁴ Ba yugi mapandi mana,fwumu wu bapulushi ba mudangumbada ye bambuda ba dibundu ba yidugi ngolu mudiambu ye batumwa,ba di yufudi mu mbundu dji baa mbi mapandi ma bwii. ²⁵ Muudu wu moshi gitshi ba yabigisa mbi:"dala baadu bana ba lushi mudangumbada,beedi mu nzu yi bisambu.Ba balonga baadu! ²⁶ Dangu di,fwumu wu bapulushi ye baadu bandi be dinga ba tumwa.Gitshi gu ba vudula,haa lombi mu ngolu,mudiambu ba yuga booma,mudiambu ye gu ba zuwa mu madaadi. ²⁷ Dangu di di bitshi ba vudula gu hwii,ba basambishi gu twala yi gimvuga gi neeni gi bayuda.Fwumu wu banganga ba dibundu ga ba yufudi mapandi mbi:"du hani tshigu dji neeni mbi muudu wu fani longa mu djina dina?Haa binu dala ²⁸ mapandi mana ma luhangi:lu pashi tsangu dji binu ye bula di Yelusalemi di mvimba.Ye lu ba yagula mbi pidu du zuwii muudu wuna. ²⁹ Piela ye batumwa bana bega ba baledi mbi:"du fani lemvuga tegu gwedi Gahungu,haa loo mbi gwedi baadu. ³⁰ Gahungu wu ba kaga dji pidu ga shamugishi Yesu mu lufwaa wuna wu ba zuwii mu kulundji. ³¹ Gahungu ga mu dombushi gu yilu mu ngolu djiandi,ga hangi mu gala Fwumu ye kulundji mudiambu mu guhana ndjila gwedi beeni Yishiledi mu gu balumuna mbundu ye mu gu gumbula mbi Gahungu bu ga balolula mudiambu ba hangi masumu. ³² Pidu ye muhunga wuna wu Gahungu wu ga hani gwedi baadu bana ba mu lemvugilagi,dwedi batumwa ba mapandi mana. ³³ Dangu di gimvuga gi neni gi bayuda ba yugi mapandi mana,ba yugi kabu dji vula.Ba geshi mbi batumwa ba fani fwaa. ³⁴ Haa gu gadi ye mu fadishi wu moshi mu gi mvuga gina,djina djiandi Gamaliele.Ga gadi longio wu tshigu.Baadu bootsu ba mu djidisaga.Ga niamugi,ya yena ga leshi baadu mu gu dusa batumwa ndambu ye ndjila. ³⁵ Ya yena ga ledi baadu bana ba gadi mugimvuga mbi:"binu beeni Yishiledi gebani mudiambu ye mapandi maa lu ba zola hanga baadu baa. ³⁶ Mudiambu gu yela loo gu vula,Tedasi gitshi mu kadi ga pidu,ya yena ga yandigi gu yagula mbi gedi muudu wu Fwumu.Gi desu gi baadu kama ye djiya ba vugani gwedi ndi.Haa baadu bega ba mu zuwi,ya yena bana bootsu ba mulandaga,ba pasagani.Shi muudu wu moshi loo ga sadi mu gimvuga gina. ³⁷ Gu ngoyi yandi yudashi mweni Gadileya gitshi mu kadi ga pidu dangu di ba sonigisa madjina ma baadu.Ga bendi baadu ba vula mu gu mulanda.Ba mu zuwi kega,ya yena baadu bana bootsu ba mu landagagi ba pasagani. ³⁸ Dangu di ba lu lela mbi loo gu landa baadu bana ba yambulani benda mudiambu mbi mapandi maa ba bagana mbi ma ba hanga maduga gwedi baadu ba kenda. ³⁹ Haa mbi gu mukiediga mapandi ma mabaduga gwedi Gahungu,loo ba gu ma zuwa.Giebani mbi loo gu moniga mbi lu nwanishi Gahungu.Baadu ba gimvuga gina ba landi ndongishila di Gamaliele. ⁴⁰ Ba lendigi kega batumwa,ba babudi,bwoona ba baledi mbi:"loo gu longa kega mu djina di Yesu,ya yena ba bayambudi." ⁴¹ Batumwa ba gadugi mu gimvuga gi bayugi mu gieshi giootsu,mudiambu Gahungu ga dadi mbi ba fani mu gu dala tsooni mudiambu di djina di Yesu. ⁴² Gosu gilumbu mu nzu yi bisambu ye mu manzu ma baadu,baa longaga ye gu yabigitsa tsangu dji pimbu dji Yesu Mesiya