¹ gu Ikonimi Polu ye Badinabashi bendi goda gu nzu yi bisambu yi bayuda.Dangu di di bahani malongi,bana ba gadi bayuda ye ba gondi bayuda ba gumi ba kidishidu mudiambu di pandi mana ma bayagudilagi. ² Haa bayuda bana ba duni gu gwigila,ba tsubishi baadu bana ba gondi bayuda mu gu gala bambeeni ba bakidishidu. ³ Polu ye Badinabashi ba gadi bilumbu bi vula gu Ikoniumi.Ba yagulagagi ye gigesa giootsu.Mudiambu basagi mbundu yi baa gwedi Gahungu,balonga baadu mbi Gahungu ga dalaga baadu mu disu di pimbu.Gahungu kega ga lela mbi malongi maa baa magadi makiediga,mudiambu Gahungu ga ba hegi ngolu dji hanga mapandi ma pila ye pila. ⁴ Baadu bega ba gadi mu ma bula ba gabugi mu ndambu djioodi:bega ba zolagi gu landa manunga ma bayuda,haa bega ba zola landa manunga ma Polu ye Badinabashi. ⁵ Bwoona bayuda ye baadu bega bana ba gondi bayuda,ye ba mbuda bana ba ganini Polu ye Badinabashi mu gu ba hanga mbii,ba zola gu ba daa madadi mudiambu ba bazuwaa. ⁶ Dangu batumwa di bayabi mapandi mana,ba diini gu ndambu di mabula maa meedi mu manu ma Likawonia:gu Listre ye gu Dedibe ye ndambu yina djiedi pena-pena ye mabula meeni. ⁷ Gu bendagi,bendagi mu gu hana tsangu dji pimbu. ⁸ na gu Listre gu gadi ye muudu wu moshi wu budugi milu gi fwuu.Loo ga niamuga mud milu miandi mi gadi degi-degi.Loooo ga sadi niamuga shi gilumbu gi moshi yandiga di gabudugi. ⁹ Gilumbu gi moshi ga yuga mapandi ma yagula Polu.Polu ga mudadi shela bwoona di ga mu dadi mbi muudu weeni ga shi mbundu mbi ga fani mu gindisa. ¹⁰ Bwoona,Polu ga muledi mu ndaga yi ngolu mbii:"niamuga,gala wu gu sungamana!Mu mbala yi moshi ga niamugi di ga yandigi gwenda gu mweendu. ¹¹ Gadu baadu di badadi mapandi mahangi Polu,ba yagudi mu ndanga yi baa yi bula ngolu mbi:"Duhungu du sendi maludu ma baadu du yitshi gulumuga mu kadi ga pidu.'' ¹² Balendigagi Badinabashi mbi:"Zyishi",Polu ba mu lendigaga mbi:"Ermisi"mudiambu Polu ga yagulaga mapandi. ¹³ Nzu yi moshi yi bisambu yi Gahungu wu Zeyishi yi gadi gu Tsoongi bula.Nganga wu nzu yina yi bisambu wuna wu yitshi needa ba ngombi ba bagala gu twala yi biafulu bi ma nzu mana.Ba gadi ba shi mishinga mi bi tundu mu ba ngombi bana.Nganga weeni ye baadu bega ba zolagi gu zuwa ba ngombi mudiambu di gu dambigila Badinabashi ye Polu. ¹⁴ Haa dangu batumwa bana ba boodi di bayugi mapandi mana,ba bagi miledi mi baa,ba godi mu tiinu ye kadi ga baadu,ba yufudi mu ndaga yi baa ngolu mbi: ¹⁵ "mudiambu di kii lu hanga mapandi maa?Pidu dwedi baadu nga binu du ba lulela tsangu dji pimbu mbi lu yambula bi deegi bii,bi pamba-pamba,bwoona lu balumuna ma mbundu ma binu gwedi Gahungu wuna wu mooni.Gahungu wu gangi yilu ye maanu nzadi mungu ye bima biootsu bina biedi muna. ¹⁶ Mu dangu di gulu ga shi-shi biootsu bi baadu mu gu landa ndjila yi moshi. ¹⁷ Haa dangu diootsu ga lu lesaga mapandi ma pimbu ma ga hangaga.Ga lu nogishilaga mvula yina yi gadugaga gu yilu,ga lu hegaga dangu di gu gadula bima mu mangundu,ga lu hegaga ma dia;dji lu hegaga gieshi gu mbundu. ¹⁸ Shi ba tumwa bu ba yagudi buna,haa badadi pashi teegu mu gu gama baadu bana ndjila mu gu ba dambigila magabu ma gimengi. ¹⁹ Haa bayuda bega bana ba dugi gu Antioshi ye bana beedi pena-pena ye manu ma Pishidiya ye bana dugi gu bula di Ikoniumi,bitshi guma guna.Ba di gindugu ye beeni bula dina,di ba dii Polu madadi mudiambu di gu mu zuwa.Gu ngoyi,ba bendi mu ngolu,bwoona ba mu dushi ye bula mudiambu ba yindula mbi wuu fwii. ²⁰ Haa dangu ba kidishidu bitshi gu mu djieda di ga shamugi,bwoona ga vudugi gu bula.Mu gilumbu gi landi,ndi ye Badinabashi bendi gu Dedibi. ²¹ Dangu Polu ye Badinabashi di ba yabishi tsangu dji pimbu gu bula di Dedibi,baadu ba vula ba gumi ba kidishidu.Bwoona ba vudugi gu bula di Listre,gu Ikoniumi,ye gu Antioshi dina djiedi pena-pena ye manu ma Pashidiya. Benda hega gigesa gwedi kidishidu ye gu ba woondila mu gu saa mbundu gwedi Gahungu ²² .Benda ba lela mbi:"du fani dala pashi mu gu goda mu gifwumu gi Gahungu.'' ²³ Mu gosu di bundu benda soola bambuda mudiambu ye bundu,benda samba Gahungu.Bwoona ba bahega mioogu mudiambu mi Fwumu Yesu wina wu ba gumbudi. ²⁴ Dangu di ba ludi mu manu ma Pishidia di ba gumi yugi mu gi dini gi gifudi gi Panfilia. ²⁵ Bendi yabisa tsangu dji Gahungu gu bula di Pediga.Bendi kega gu bula di Ataliya. ²⁶ Ga duga guna bendi gu Antioshi mu matswa:ba Antioshi baa baledi mbi Gahungu ga lu geba pila yi ga lu zodilaga,mudiambu ye gu soola gisalu gina gi lu hangaga.gisalu gina gi ba hanga mu gu lungisa dangu bitshi vuduga gu Antioshi. ²⁷ Dangu di bitshi guma gu Antioshi,ba lendigi baadu bootsu badibundu,ba ba ledi mapandi mootsu ma Gahungu ma ga sadi ye baa ye pila yi ga gangudi ndjila yi baadu bana ba gadi bayuda ye bana ba gondi gala bayuda lugwigilu. ²⁸ Ba gadi bilumbu bi vula ye ba kidishidu.