¹ Mu dangu dina,todila Erodia Agripa ga yandigi gu dadi baadu bega mu di bundu pashi. ² Yagobu,buda wu Yoani gamuzuwi ye mbedi. ³ Dangu Erodia di gadadi mapandi mana ma hegi bayuda giesi,ba gami Piela kega.Mapandi mana ma bwii mu bilumbu bi kindji yi mapaa mana gondi mweemu wu maa. ⁴ Dangu di ba mugami gu hwii,ga mu shi mu dangumbada,ga shi mandonga maya ma ba pumbulu mudiambu di gu mudala,mu gosu ndonga ba pumbulu baya-baya.Ga gadi ye mabanza ma gu mu lela gu misu ma baadu nootsu gu ngoyi yi kindji pagi. ⁵ Ya yena ba swega Piela mudangumbada,haa baadu ba dibundu ba samba Gahungu ngolu mudiambu ye ndi. ⁶ Gilumbu gi moshi mu piba,gu twala yi gilumbu gina gi zola lesa Erodia Piela gwedi baadu,Piela ga gadi wu nimbi ye gadi-gadi ga ba pumbulu boodi,ga gadi wu hwaa gangamana mu miyololu mioodi gu twala yi giafula pabulushi ba gadi mugugedila nzu yi dangumbada. ⁷ Mu mbala yi moashi wandjio wu Fwumu Gahungu gi tshi moniga,ya yena tswemu dji leemi mu dangumbada.Wandjio ga budi Piela du googi mu tsagadi mudiambu di gu mu niamugisa mu gilu,ga mu ledi mbi:"niamuga tswalu.''Mu mbala yi moshi miyololu mi gadugi mu milu mi Piela. ⁸ Bwoona wandjio ga mu ledi mbi:"vada mu gaba ye sabadi woogu.''Ga vadi ,ya yena wandjio ga mu ledi kega mbi:"vada kazaga gaagu,witsa ndanda.'' ⁹ Piela ga landi wandjio,ga dugi mudangumbada.Loo ga ga yaba mbi mapandi mana ma hanga wandjio ma gadi ma mugiediga.Haa ga yaba mbi yeedi kaga ndotshi. ¹⁰ Dangu di ba ludi pulushi wu teegu ye wu zoodi,ba gumi ye giafulu gi ndondu gina gi dala gu vuula.Gia beeni yi gangugi gu twala yi baa.Ba dugi ya yena ba landi bala-bala di moshi mugi tulumugila wandjio ga shishi Piela. ¹¹ Piela gayandigi gu ba gisa mapandi mana ma bwii,ga yagudi mbi:"dangu di yi yabi gugidi mbi Fwumu Gahungu wu tushi.Wandjio wandi ye gitshi gadula gu mioogu mi Erodia ye mapandi mootsu ma mbi ma bayuda ma ba muganinaga.'' ¹² dangu di ga yabi mapandi mana gendi gu nzu Madiya ngudi Yoani wuna wu ba lendigaga Malagu,baadu bengi ba gadi bawagani guna muni samba Gahungu. ¹³ Dangu Piela di gabudi mu giafulu,mwaana mukedu wu moshi wu gisalu,dina diandi Rode,gitshi ga ngula nzu. ¹⁴ Dangu di gayabi danga yi Piela ga gadi gieshi gi vula,haa loo ga gangi nzu swalu,gendi teegu gu yabisa bana ba gadi gu kadi ga nzu mbi:"Piela weedi yeeya ye ndjila.'' ¹⁵ Ba mu ledi mbi:"ndi wu lawugi!"Haa ndi ga yagula kega mbi:"wuna wandjio wandi.'' ¹⁶ Haa Piela gabula kaga gu giafulu.Dangu di ba gangudi nzu,ba mu dadi,ba yidugi ngolu. ¹⁷ Ga hangi gi dimbu gu mioogu miaandi mudiambu ba gadi pweede,ya yena ga ba yabishi pila yi Fwumu Gahungu yi ga mu dushi mudangumbada.Ga yagudi kega mbi:"lu yabi mapandi ma Yagobu ye gwedi bapangi bega.''Ya yena ga dugi,gendi gihani giega. ¹⁸ Mu musuga-musuga di gadi dingi mu kadi ga ba pumbulu ba yufulagani baa ye baa mbi: Piela wu yendi guni? ¹⁹ Erodia ga dumishi baadu mu gwenda mudinga haa loo ba mudadi.Ya yena gasambisa ba pulushi bana ba langidila dangumbada,ga ledi baadu mu gwenda gu bazuwa.Gu ngoyi Erodia ga yambudi manu ma yudeya,gendi gu bula di Sezadiya.mudiambu genda hemina ndambu guna. ²⁰ Erodia ga yugidi beeni bula di Tidi ye Sidoni kabu dingi shela.Dangu diadina,baadu bana di ba wagani mu gwenda moniga gu misu ma Erodia,ba wagani ye mbudaBlashiti,wuna wu dalaga nzu yi Erodia,bendi dinga ngemba gwedi Erodia mudiambu madongu ma dugaga mu manu ma Erodia. ²¹ Mu gilumbu shi Erodia,ga vadi miledi miandi mi gifwumu ngendi gala ye gidi giandi gi gifwumu,ya yena gayandigi gu hega baadu malongi. ²² Baadu bega ba yandigi gu yagula mu ndaga yi ngolu mbi:"wuu loo mbi muudu wu ba yagula!Haa Gahungu wu ba yagula.'' ²³ Kaga mu dangu diadina wandjio wu Fwumu Gahungu Erodia mudiambu ga di hega lugumu lwandi ndi beeni haa loo mbi lu Gahungu.Bipagala bu bimudi,ya yena ga fwii.