¹ Batumwa ye ba pangi ba dibundu dina di gadi gu yudeya,ba yugi mbi baadu bana loo beedi bayuda ba gumbudi kega mapandi ma Gahungu. ² Ya yena dangu di vudugi Piela gu yelusalemi,ba kidishidu bana ba gadi bayuda ba yandigi gu mu nganina: ³ "Mudiambu di kii wu godi mu nzu yi baadu bana ba gondi bayuda,mudiambu dikii wu dii ye baa?" ⁴ Dangu di Piela ga bayabishi mapandi mootsu mana ma bwii yandiga luyandigu ye tsuga. ⁵ Ndi mbi:"dangu di yi samba Gahungu ye bula di Yope yi dadi gu ndotshi gima gi moshi gi fanagani nga muledi wu neeni,ba wu gami mundambu dji yaa,gitshi gulumuga tii gihani gi yi gadi. ⁶ Yi dadi pimbu-pimbumu kadi ga gia ya yena yi dadi bambitshi ba milu miya-miya,ba mbitshi ba mushidu,bima bimooni,ye ba nuni ba pila ye pila.'' ⁷ Yi yugi ndaga yi moshi muni yagula mbi:"Piela,niamuga zuwaa gosu gima gi mooni wu dia!"Yi vududi mbi: ⁸ "Loo,Fwumu mudiambu gima gi tshigu mbi loo gima gimvindu loo yandu yi shi muganu diami.'' ⁹ Ndaga yi yagudi duga gu yilu mbala djioodi mbi:"gima gina Gahungu gi ga gadudi tshigu yi gia loo lu fani gu gidaga kega mu tshigu.'' ¹⁰ Mapandi mana ma bwii mbala dji dadu,ya yena Gahungu ga gadudi kega bima bina biootsu,ga bi dombushi gu yilu. ¹¹ Dangu diadina kega,ba badumishi,yi ga dugi gu bula di Sezadiya,bitshi guma gu nzu yina gu yi gala. ¹² Muhunga wugedila ga ndeshi mu gwenda wagana ye baa gu gonda mbundu djioodi.Ba pangi baa ba sambanu beendi ye mi kega,ya yena dwendi goda mu nzu di Koladine. ¹³ Ga yandigi gu du yabisa pila yi gadadi wandjio wuna witshi guma gu nzu yandi.Wandjio ga mu ledi mbi:"duma baadu bega benda ba lendiga Shimoni wuna wu ba lendigaga Piela. ¹⁴ Mapandi mana ma ga gulela,ma gu gulusa ndi ye nzu yagu yiootsu. ¹⁵ Dangu di yi yandigi mu gu ba lela muhunga wu Gahungu gitshi gulumuga ye londi di ba nga buga gulumugi ye londi di pidu mu lu yandigu. ¹⁶ Ya yena yi yibugi mapandi mana Fwumu Yesu ma gayagudi:"Yoani ga bodigi baadu mu mwetshi haa binu lu senda muhunga wu Gahungu." ¹⁷ Bwoobuna Gahungu gahegi magabu mandi gidesu gi moshi nga bu ga du hegi pidu gu mbudi Fwumu Yesu kishidu gu mbundu,ya yena mi yi gadi ye fwunu yi gu ganga Gahungu ndjila yi gu hanga mapandi mana ma gazolaga? ¹⁸ Dangu di ba yugi mapandi mana,loo ba shii kega tembi.Ba gumbishi Gahungu mbi:"gu mugiediga baadu bana loo beedi bayuda Gahungu ga ba hegi ndji yi gu balamuna mbundu mudiambu ba gala ye mooni.'' ¹⁹ Gu ngoyi lufwa lu Etieni ba dadi saa ba kidishidu pashi.Ba kidishidu ba pasagani bega beendi tii gu manu ma Fenishiya,gu gisanga gi Shipre tii gu bula di Antioshi,haa loo mbi gedi baadu bega. ²⁰ Haa mu kadi ga baa mu gadi ye baadu bega ba Shipre ye ba bula Sireni,dangu di gumi baadu bana gu Antioshi.Bayandigi gu yabisa kega tsangu dji pimbu dji Fwumu Yesu gwedi bana ba gondi bayuda. ²¹ ngolu dji Fwumu Gahungu dji gadi ye baa ya yena baadu bengi ba gumi ba kidishidu. ²² Baadu ba di bundu di yelusalemi ba yugi tsangu di baa,ya yena ba dumishi badinabashi gu antioshi. ²³ Dangu di gitshi guma guna,bu gadadi kii pila Gahungu ga ba sagumuni,ya yena ga dadi gieshi gi vula mudiambu ye mapandi mana.Ga ba woondidi baa bootsu kega mu landa Fwumu Yesu mu gidesu gi moshi. ²⁴ Badinabashi ga gadi muudu wu pimbu.Ga gadi wu gu yula ye muhunga wu Gahungu ye mu lugwigilu baadu ba vula ba gumi ba kidishidu. ²⁵ Gu ngoyi Badinabashi gendi gu bula di Tadishi mudiambu di gudinga Sawulu. ²⁶ Dangu di ga mu dadi ga needi gu Antioshi.Mvula yi moshi wu muhundu ba wanagani gu di bundu dina ye ba longi baadu ba vula,baadu ba Antioshi,baadu ba teegu ba yandigi gu lendiga ba longugi ba kidishidu. ²⁷ Mu bilumbu bina mbigudi bega ba gadugi gu Yelusami mudiambu di gwenda gu Antioshi. ²⁸ Muudu wu moshi mu kadi djina diandi,ga niamugi gumisu ma ba kidishidu,ya yena ga ba yabishi mu ngolu dji muhunga wu Gahungu mbi nzala yi neeni yi gala mu gifudi gi muhundu''mapandi mana mabwii mu dangu di gadi todila di neeni Kolodi.'' ²⁹ Ba kidishidu ba geshi mbi gosu muudu,nga bwedi gi mvwama giandi ga dumisa lusadisu gwedi bangi bana ba djingaga gu Yudeya. ³⁰ Ba hangi bwoona,ba dumishi mbongu gwedi ba mbuda ba Yudeya gu mioogu mi badinashi ye Sawulu.