¹ Gu gadi ye muudu wu moshi gu bula di Sezadiya djina diandi Koladine ga gadi Fwumu wu ba pumbulu bana ba balendigaga ba pumbulu ba ba Italia. ² Ga gadi ye mbundu yi Gahungu ndi ye nzu yandi basambaga Gahungu gi hani gi moshi ye ba yuda,ba batsugamindi ga sambaga Gahungu gosu dangu. ³ Gilumbu gi moshi gidesu gi troiser(3h)di mashiga gadadi pimbu-pimbu gu ndotshi wandjio wu Gahungu gitsa goda mu nzu yandi.Wandjio ga mu ledi mbi:"Koladine!'' ⁴ Koladine ga dadi wandjio ngolu ye booma ga mu yufudi mbi:"Fwumu kii mapandi?''wandjio ga mu ledi mbi:"bisambu biagu ye lusadisu lu ba sadisa baadu Gahungu wu gumbudi bwoona ga guyindudi. ⁵ Dangu di yi dumishi baadu gu Yope benda lendiga muudu wu moshi djina diandi Shimoni wu ba lendigaga kega Piela. ⁶ Ga nimbaga mu nzu yi moshi djina diandi Shimoni,muudu wu hangaga miganda mi ba mbitshi,nzu yandi yeedi pena-pena ye nzadi yi neeni.'' ⁷ Dangu wandjio di ga mu ledi bwoona gendi,Koladine ga lendigi baadu bandi boodi ba gisalu ye mu pumbulu wu moshi wuna wu gadi ya mbundu yi gi Nzambi mu kadi ga ba pumbulu bana ba mu sadila. ⁸ Dangu di gamuyabishi mapandi mana gu hwii ga ba dumishi gu Yope. ⁹ Mu gilumbu gi landi,dangu di bendi mundjila pena-pena ye bul di Yope. Piela ga nini ye yangi di nzu mu midi mudiambu du gu samba Gahungu. ¹⁰ Nzala yi mugami,ya yena ga zola gu dia,haa dangu di ba mu lambila madogu ga dadi ndotshi. ¹¹ Yilu di gangugi ye gima gi moshi gi fanagani nga muledi wu neeni ba wu gami mu ndambu djiya muni gwitsa guluga mu manu. ¹² Mu kadi mu gadi ye bima bi mooni mi pila ye pila biedi ye londi di manu bina biega ye milu miya-miya,ye bima bi mooni biendaga zumu mu manu ye ba nuuni ba pila ye pila. ¹³ Piela ga yugi ndaga yi moshi yi mu ledi mbi:"Piela niamuga,zuwa gosu gimagi mooni wu dia!'' ¹⁴ Haa Piela mbi:"loo,Fwumu mudiambu loo yandu teegu yidii shi gi tshigu mbi loo gima gi mvindu shi mbala yi moshi.'' ¹⁵ Daga yina yi mu ledi mu mbala yi djioodi mbi:"gima gi gadudi Gahungu tshigu yi gia loo wu fani gu gidangaga kega mbi tshigu.'' ¹⁶ Mapandi mana ma bwii mbala dji dadu,ya yena Gahungu ga gadudi gima gina ga dombushi gu yilu. ¹⁷ Piela ga yindula mbi disonga kii mapandi maa taladi gu ndotshi?Mu dangu diadina kega ba dumishi Koladine ba dadi nzu yi Shimoni di badinga,ya yena bitshi guma ye mbelu yi lupangu. ¹⁸ Ba lendigi baadu ba gadi yena ba bayudi mbi:"Shimoni wuna wu ba lendigaga kega Piela,ga nimbaga mu nzu yaayi?" ¹⁹ Dangu dina Piela ga gadi kaga mu gu yindulaga disongila di mapandi mana ma gadadi gu ndotshi,muhunga wu Gahungu gitshi gu mu lela mbi:"dala,baadu ba daadu ba bagu guding. ²⁰ Niamuga,gulumuga,nda wenda loo gu gala ye booma mi ba dumi.'' ²¹ Piela ga gulumugi ye gihani gi ba gadi,ya yena ga yagudi gwedi baadu mbi:"mi ndoo muudu wu lu dinga,mudiambu di kii lwitshi?'' ²² Ba vududi mbi:"muudu wu du dumi gwedi kapiteni Koladine,geedi muudu wu pimbu ndi kega gasambaga Gahungu gi hani gi moshi ye bayuda.Ba yuda bootsu ba yagulaga mapandi ma pimbu diandi. wandjio wu Gahungu wu muledi mu gwitsa gu mu lendiga genda gu nzu yandi mudiambu ga yuga mapandi mana ma wu yagulaga.'' ²³ Piela ga ba godishi mu nzu ga ba hegi gihani gi gu mimba.Mu gilumbu gi gulanda ga niamugi ya yena gendi ye baa.Ba kidishidu ba bula di Yope,bendi kega ye baa. ²⁴ Mu gilumbu gi landi ga godi ye bula di Sezadiya.Koladine ga gadi mu gu ba ginga,ga lendigi ba pangi bandi ye ba ndugu bandi ba ngolu. ²⁵ Dangu di kaga Piela ye ndjila,ga zola ga goda mu nzu,Koladine gendi gu mu yamba.Gabwii mu milu mi Piela mudimabu di gu samba. ²⁶ Haa piela ga muniagishi mbi:"niamuga gwoogu mi kega ye muudu nga ndj. ²⁷ Dangu Piela di ga solula ye Koladine,ba godi mu nzu,ya yena ga dadi baadu bavula mu gwitsa yuula muna mu nzu. ²⁸ ga ba ledi mbi:"binu beeni yabani mbi gwedi shigu muyuda loo ga fani vugana ye muudu wuna wu gondi muyuda ndi kega loo ga fani goda mu nzu yandi. Haa Gahungu ga ndeshi loo wu fani senda shi muudu wu moshi wu mvindu.'' ²⁹ Ya yena dangu di bitshi ndendiga,loo yi duni mu gwitsa yaa.Yi ba luyufula mudiambu di kii lu ndendigi?'' ³⁰ Koladine ga vududi mbi:"bilumbu bi yaa mu dangu diadidi yi gadi muni samba Gahungu mu nzu yamii mu troizer di mashiga,ya yena muudu wu moshi gitshi niamuga gu misu maami miledi mi ga vwadi mi gadi muna ngenga. ³¹ Gayagudi mbi:"Koladine,Gahungu wu yugi bisambu biagu ga bayindula gu sadisa gu ba sadisa ba tsugami. ³² Ya yena duma baadu gu Yope benda ba lendiga Shimoni wuna wu ba lendigaga kega Piela.Ga nimbaga gu nzu yi Shimoni muudu wuna wu hangaga mi gandami bambitshi.nzu yandi yeedi pena-pena ye yanga yi neeni. ³³ Dangu diadina kega yi dumishi baadu mugwitsa gu gudinga wu hangi pimbu bu witshi,ya yena dangu di pidu bootsu dwedi gu misu ma Fwumu Gahungu mudiambu du yuga mapandi mana mootsu ma ga gu ledi mu gwitsa gu du lela. ³⁴ Bwoona Piela ga yandigi gu ba lela mbi:"gu mukiega,mbagishi mbi Gahungu ga zolaga baadu pila yi moshi. ³⁵ Mu gosu giganda gi baadu ga gumbulaga baadu bana mu gu djidisaga ye ba hangaga mandi ma pimbu. ³⁶ bani mbi ga dumishi Yesu kidishidu gwedi baadu ba yishilela mudiambu di gwitsa yabitsa tsangu dji pimbu,dji ngemba,Yesu kidishidu geedi Fwumu wu baadu bootsu. ³⁷ Yabani kega mapandi mana ma ludi mu manu mootsu ma Yudeya.Ma yandigi gu Gadileya dangu Yoani di ga manishi gu longa mu gu senda mbodiga. ³⁸ Lu yabi kii pila Gahungu ga hani ngolu gwedi muhunga wandi,gwedi Yesu,muudu wu Nazeledi.Lu yabi kega mbi kii pila gendagi gosu ndambu mudiambu di gu hana mapandi ma pimbu,kega mudiambu ye gu gindisa baadu bootsu bana ba gadi ye shadana,mudiambu Gahungu ga gadi ye Yesu. ³⁹ Dwedi ba mbangi bana ba dadi mapandi mootsu mana ma hangi Yelusalemi ye mundambu djiega dji gifudi gi bayuda.Ba muzuwii dangu di ba mu shi ye londi di kulundji. ⁴⁰ Haa Gahungu ga muniamugishi mu lufwaa mu bilumbu bidaadu.Ga mu dumishi mu gwitsa moniga. ⁴¹ Haa loo mbi gwedi bayuda bootsu,haa gwedi pidu bambangi bana bandi Gahungu ba ga soodi gu twala,dangu Gahungu di ga mushamugishi mu lufwaa gu hwii,bu du dii,bu du nwii gi hani gi moshi ye ndi. ⁴² Ga du dumishi mu gwenda longa bayuda ye gu ba lesa mbi ndi muudu Gahungu wu ga soodi mu gu sambisa baadu ba mooni ye ba gu fwaa. ⁴³ Ba mbigudi bootsu ba yagulaga mapandi maa,mudiambu diandi mbi gosu muudu wuna wu sagaga mbundu gwedi Yesu Gahungu ga mu lolula mu ngolu di djina di Yesu mudiambu di masumu mandi magahani. ⁴⁴ Dangu Piela di ga gadi muni yagula kega,muhunga wu Gahungu ga gulumugi ye londi di baadu bana bootsu ba gadi mu gu yuga malongi mandi. ⁴⁵ Ba kidishidu bana bitshi ndjila yi moshi ye Piela bana ba gadi bayuda,ba yidugi ngolu dangu badadi mbi Gahungu wu hani muhungu wandi gwedi baadu bana ba gondi bayuda. ⁴⁶ Mudiambu ba yugi baadu bana muni yagula mapandi mana ma fani gonda bagisa baadu,ba bayugi kega muni gumbisa Gahungu ya yena Piela ga yagudi mbi: ⁴⁷ "Baadu ba sendi muhunga wu Gahungu kega nga pidu,muudu wu fani duna mbi loo ba bonga mbodiga yi mwetshi?" ⁴⁸ Ya yena ga ledi baadu bega mu gu ba bodiga mu djina di Yesu.Gu ngoyi,ba mu ledi mu gu gala bilumbu bieega ye baa.