¹ Bakeo Jesosy notarihy gny Fanahy ho agny an'efitry mba halainy devoly fanahy. ² Lafa baka nifaly hagny efapolo andro sy efapolo aliky I, ka mosary. ³ Gnamondry gny mpangala fanahy ka nivola taminy hoe: "Laha Agnak'Andriagnanahary Agnao, volano handrary mofo vato reo." ⁴ Fa Jesosy namaly ka gnanao taminy hoe: "Voasoratry hoe: "Tsy gny mofo avao ro hiveloma gny olo fa zay safa iaby aboaky gny vavan'Andriagnanahary." ⁵ Bakeo devoly nanday azy tagny amy gny tana masina ka nametraky azay teo amy gny faragny anambo gny tempoly, ⁶ sady nivola taminy hoe: "Laha Agnak'Andriagnanahary Anao, milatraha ambany agny, fa voasoratry hoe: "I handidy reo anjeliny hiasabaka anao sy hanandratry Anao eo amy gny tagna ndreo, ka tsy ho tafisitry amy gny vato gny tombokinao." ⁷ Jesosy nivola taminy hoe: "Mbo voasoratry ndraiky hoe: 'Tsy tokony hitsapa gny Tompo Andriamanitrao anao." ⁸ Gnandesi gny devoly handeha amy gny toera anabo ndraky I sady natorony azy gny fanjaka iaby amy zao tontolo zao sy gny hasoa ndreo. ⁹ Hoy I taminy hoe: "Reo raha iaby reo ro homeko anao, laha hoatry ka miondriky amiko eto sy midera ahy anao." ¹⁰ Bakeo Jesosy nivola taminy hoe: "Miala eto anao, ry Satana! Fa voasoratry hoe: 'Anao ro hidera gny Tompo Andrimanitrao sady I raiky avao no ho tompoinao."' ¹¹ Bakeo nanenga Azy gny devoly, sady regny, nisy anjely avy ka gnanompo Azy. ¹² Lafa niren'i Jesosy fa voasambotry Jaona,nimpoly nandeha Galilia I. ¹³ Gnanenga agn'i Nazareta I ka gnandeha sady nimpetraky tao Kapernaomy, zay tan-driaky gny Galilia, ao amy gny zara tanin'i Zebolona sy Naftaly. ¹⁴ Izay ro niseho mba hahatanteraky zay gnambaran'Isaia mpaminany hoe: ¹⁵ "Gny tanin'i Zebolona sy gny tanin'i Naftaly, mandeha amy gny riaky, agny an-dafin'i Jordana, Galilia agn'ireo Jentilisa! ¹⁶ Reo olo nipetraky tamy gny maiky ro nahita fahazava bevata, sady reo zay nipetraky tamy gny faritry sy gny talindro gny fahafatesa, tamy ndreo ro nipotira gny fahazava." ¹⁷ Sady tamy zay fotoa zay Jesosy ro nanomboky nitory teny sy nivola hoe: "Mibebaha, fa mariniky gny fanjaka gny lanitry." ¹⁸ Laha gnandeha tamy gny sisiny riakin'i Galilia I, sady nahita mmpirahalahy roa, Simona gnazy nikehy hoe Petera, voho Andrea rahalahiny, gnanoraky harato tan-driaky eny, fa mpihaza reo. ¹⁹ Hoy Jesosy tamy ndreo hoe: "Andao, hanaraky Ahy, fa hataoko mpihaza olo gnareo." ²⁰ Teo noho eo avao ro nanenga harato reo ka gnanaraky Azy. ²¹ Sady laha mbo nandeha Jesosy no nahita mpirahalahy roa hafa, Jakoba agnak'i Zebedio, sy Jaona rahalahiny. Gnanamboatry gny haratony tanaty sambo tao reo niaraky tamin'i Zebedio baban-dreo. Gnikaiky azy reo I, ²² ka teo no ho eo avao ro gnanenga gny sambokely sy baban-dreo reo ka gnanaraky Azy. ²³ Gnandeha erak'i Galilia Jesosy, nampianatry tao amy gny synagoga reo, nitory gny safa soa gny fanjaka, voho gnanadranga reo karazan'arety iaby voho gny rofy iaby tamy gny olo. ²⁴ Niparitaky eran'i Syria gny vaovao mahakasiky Azy, ka nandesy gny olo Taminy teo zay marary iaby, marary gny karazan'arety sy fangirifiria reo demoniaka, sy zay marary gny androbe sy marary gny paralysia. Nositran'i Jesosy i reny. ²⁵ Vahoaky maro avy baka Galilia, Dekapolisy, Jerosalema, Jodia voho gny baka agny an-dafin'i Jordana ro gnanaraky Azy.