¹ Noho zay aoka mba ho mpangala tahaky an-Dragnahary, manahaky gny gnanaki malala. ² Sady mandehana amy gny fitiava, araky gny nitiavan'i Kristy antsika koa sy nanomezany gny vatany ho antsika, fanatritry manim-pofo sy soro ho an-Dragnahary. ³ Fa tsy tokony hisy na resaky fijangajanga na karaza fahalotoa na tsy fahonona mbata aza aminareo, fa tsy mendriky gny olo masin-Dragnahary reo. ⁴ Aoka tsy hisy mamoafaly, resaky adaladala, sy somonga tafahoatry, fa tsy mendriky gny iaby reo. Fa koa tokony hisy fankasitraha. ⁵ Fa afaky mahazo antoky gny amy zao gnareo, fa tsy hisy mpijangajanga, maloto, na gny mpierina, izay hoe, mpanompo sampy, mana lova ao amy gny fanjakan'i Kristy sy Ndragnahary. ⁶ Aoka tsy hisy hamitaky anareo amy gny safa tsisy, satria noho reo raha reo ro avy baka my gny gnanaky gny tsy fankatoava gny siaki-Ndragnahary. ⁷ Noho izay, ka mikamba amy ndreo. ⁸ Fa maiziky gnareo taloha, fa zao gnareo ro fahazava ao amy gny Tompo. Mandehana manahaky gny gananky gny mazava, ⁹ (fa gny vokatry gny fahazava ro ao amy gny hasoa iaby, fahitia, sy fahamarina). ¹⁰ sady ilao zay mahalavariaky gny Tompo. ¹¹ Ka mikamba amy reo asa tsy mamokatry gny haiziky, fa ampiharihario koa reo. ¹² Fa mahamenatry na gny manono reo raha atao ndreo agny amy gny mivony aza. ¹³ Ka lafa hazavain'gny fahazava gny raha raiky, lasa miharihary. ¹⁴ Fa gny rgha iaby zay miharihary ro fahazava. Noho izay ro voavola hoe: "Mifohaza, iha matory, sady mitsangàna amy gny toera gny maty, ka hamiratsy aminao Kristy." ¹⁵ Mitandrema amy gny fomba fiainanao, tsy manahaky gny tsy mahitsy fa manahaky gny mahitsy. ¹⁶ Araraoto gny fotoa satria zao andro zao fa raty. ¹⁷ Noho izay, ka miadaladala, fa takaro hoe ino ro sitrapo gny Tompo. ¹⁸ Ka manao mamo gny divay, fa manday agny amy gny fahasimba toetry zay. Fa koa,ao ho feno gny Fanahy Masy, ¹⁹ mifampiresaha amy nareo samby nareo amy gny salamo sy fihira ary hiram-panahy, mihirà sady miantsa amy gny Tompo amy gny fonareo iaby. ²⁰ Misaora mandrakariva amy gny raha iaby, amy gny anaran'i Jesosy Kristy Tompontsika ho an-Dragnahary gnazy Baba, ²¹ mifanolora vata amim-panaja ho an'i Kristy. ²² Ry ampela, manekea gny valinareo, manahaky gny amy gny Tompo. ²³ Fa gny johary ro loha gny vavy manahaky agn'i Kristy koa loha gny fiangona, sady Kristy vatany ro mpamonjy. ²⁴ Fa manahaky gny haneke gny fiangona agn'i Kristy, manahaky zay ro tokony haneke gny ampela gny valiny amy gny raha iaby. ²⁵ Ry lehilahy, tiavo gny valinareo, manahaky gny nitiavan'i Kristy gny fiangona sy nanomezany azy gny ainy. ²⁶ Nanolotry gny vatany ho agny gny fiangona Kristy mba afahany manamasi azy, tamy gny fanadiova azy tamy gny rano fanasa amy gny vata, ²⁷ mba afahany manoro azy ho bevata voninahitry eo aminy, tsy misy pentina na kentrona na raha manahaky izay, fa masy sady tsy misy diso. ²⁸ Manahaky izay koa gny lehilahy ro tokony ho tia gny valindreo iaby manahaky gny vata ndreo. I zay tia gny valiny ro tia gny vatany koa. ²⁹ Mbo tsy gnisy tsy tia gny vatany, fa mamaha sy mikarakara izay soa, manahaky agn'i Kristy mamaha gny fiangona sy mikarakara azy koa, ³⁰ satria tsika ro ratsam-batany. ³¹ Noho izay antony zay gny lehilahy ro hanenga gny babany sy gny neniny ka hikamba amy gny valiny, sady I roa ro hanjary vata raiky avao." ³² Bevata zay fahamarina mivony izay, fa zaho ro miresaky momba an'i Kristy sy ny fiangona. ³³ Kanefa, gny tsiraikiraiky aminareo avao koa ro tokony ho tia gny valiny manahaky gny vatany, sady gny ampela ro tokony hanaja gny valiny.