¹ Ry anaky, manekea gny baba sy neny nareo ao amy gny Tompo, satria mety izay. ² "Hajao gny babanao sy gny neninao" (izay ro lily voalohany misy fampanantena), ³ "mba hahita soa iha sady mba ho lava andro iaina etoy ambony gny tany." ⁴ Gnareo baba, ka manday gny gnanakinareo ho amy gny fahatezera. Fa koa, tezao amy gny lily sy reo fampianara gny Tompo reo. ⁵ Ry mpanompo,mankatoava gny tomponareo an-tany etoy amy gny haja anabo sy tambitamby, amy gny fahatsora gny fonareo. ⁶ Mankatoava azy reo manahaky gny hankatova nareo an'Kristy. Mankatoava tsy amy maso gny tomponareo avao mba hankasitraha ndreo. Fa koa, mankatoava manahaky gny mpanompon'i Kristy, zay manao gny sitrakin-Ndragnahary amy gny fo nareo iaby. ⁷ Manompoa amy gny fo nareo iaby, manahaky gny hoe manompo gny Tompo gnareo fa tsy olo, ⁸ satria haintsika fa na ino na ino asa soa ataon'olo tsiraikiraiky, handramby vali pitia baka amy gny Tompo I, na andevo I na olo afaky. ⁹ Gnareo Tompo, manaoava manahaky anizay koa amy gny mpanomponareo. Ka mampihorohoro andreo. Hainareo fa I zay sady Tomponareo no Tompo ndreo ro an-danitry any, sady tsy misy fiangara ao Aminy. ¹⁰ Farany, mahereza ao amy gny Tompo sy amy gny tanjaky gny heriny. ¹¹ Isikino iaby gny fialian-Dragnahary, mba afahanao mitsanga manohitry reo tetiky gny devoly. ¹² Fa gny alintsika, tsy manohitry gny vata sy gny lio, manohitry gny fanjaka sy gny fahefa ara-panahy sy reo mpanapaky gny fanjaka gny maiziky raty, manohitsy reo fanahy raty agny amy gny fipetraha an-danitry agny. ¹³ Noho izay isikino iaby gny fialian-Dragnahary, mba afahanareo mitsanga amy zao andro raty zao, sady lafa vitanareo gny raha iaby, hahatohitry gnareo. ¹⁴ Mitsanga, noho izay, lafa avy nanao gny fehikibo gny fahamarina sy gny fiarova tratra gny fatia gnareo. ¹⁵ Sady manahaky kiraro ho agny tombokinareo, ka hapetaho gny fahavonona hitory gny safasoa gny fihavana. ¹⁶ Amy gny toe-draha iaby, rambeso gny ampinga gny finoa, zay afahanareo manohitry reo ana-tsipiky mirehitry motro gnany raty. ¹⁷ Sady rambeso gny saron-doha gny famonjea sy gny meso lava gny Fanahy, gnazy safan-Dragnahary. ¹⁸ Amy gny vavaky sy fangataha iaby, ka mivavaha amy gny Fanahy amy gny fotoa iaby. Amy zay fomba fisaina izay, miambena avao amy gny fahareta iaby, laha manolotry vavaky ho agny reo olo masin-Dragnahary gnareo. ¹⁹ Sady mivavaha ho ahy, mba hisy hafatry homeny ahy lafa manokatry gny vavako zaho. Mivavaha mba afahako mampahafantatry amy gny fahasahia gny fahamarina mivony momba gny safasoa. ²⁰ Ho agny safasoa no maha solotena voafatotry amy gny gadra ahy, mba afahako manambara agny zay am-pahasahia, laha tsy maintsy mivola zaho. ²¹ Tykiko, gnazy rahalahy malala sy mpanompo mahatoki ao amy gny Tompo, ro hampahafantatsy anareo gny raha iaby, mba hahaiza nareo zay atoko. ²² Nirahiko taminareo I noho io tanjona io, mba hahaiza nareo reo raha momba anay, sady hahafahany mampahery gny fonareo. ²³ Fiadana ho amy reo rahalahy, sady gny fitiava miaraky amy gny finoa baka amy Ndragnahary Baba sy gny Tompo Jesosy Kristy. ²⁴ Gny fahasoava agnie ho amy zay tia agn'i Jesosy Kristy Tompontsika amy gny fitiava tsy maty mandrakizay.