¹ Noho izay, zaho, amy gny maha gadra ho agny gny Tompo ahy, mampirisky anareo mba handeha am-pamendreha amy gny kaiky zay nikeha anareo. ² Mampirisiky anareo zaho mba hana fanetrea tena bevata sy fahatsora ary fahareta, mifandefitry amy gny fitiava. ³ Manaova zay farany gny herinareo mba hanajaria gny firaisa gny Fanahy amy gny fatora gny fihavana. ⁴ Raiky avao gny vata ary raiky avao koa gny Fanahy, manahaky gny nikaiky anareo tao amy gny fanantena gny fikeha anareo ho raiky avao koa. ⁵ Sady raiky avao gny Tompo, raiky avao gny finoa, raiky gny batisa, ⁶ sady raiky avao Ndragnahary sy gny Baba gny raha iaby, zay anambony raha iaby sady amy gny alala gny raha iaby sy ao amy gny raha iaby. ⁷ Tsika tsiraikiraiky iaby ro nomea fahasoa araky gny habe gny fanomezan'i Kristy. ⁸ Araky gny safa gny Soratry Masina izay hoe: "Lafa niakatry tany amy gny anabo I, nanday reo babo ho amy gny fahababoa, sady nanolotry fanomeza ho agny vahoaky I." ⁹ Ino gny hevitry gny hoe: "Niakatry I," laha tsy hoe nijotso tany amy gny faritry ambany gny tany avao koa I ? ¹⁰ I gnazy nijotso gnazy olo niakatry anabo tany an-danitry, mba hahafahany mameno gny raha iaby. ¹¹ Kristy ro nanolotry gny sasany ho Apostôly, gny sasany ho mpaminany, gny sasany ho evanjelista, gny sasany ho pasitera sy mpampianatry. ¹² Gnanome reo asa reo I mba hanampia reo vahoaky masina ho amy gny asa fanompoa, amy gny fanorea gny vatan'i Kristy. ¹³ Manohy mananga gny vatagny I mandra-pahatratsy ntsika iaby gny firaisa mpinoa sy gny fahalala gny Gnanaki Ndragnahary, sady mba hahavy antsika ho matoe ka mba hahatratsy gny habe gny fahafenoan'i Kristy. ¹⁴ Manory antsika Kristy mba tsy hanahaky gny zaza zay afefikiny gny loziky koa tsika, sady tsy handesi gny tsioky gny fampianara sy gny hafetsea gny reo olo amy gny tetiky feno fitaky. ¹⁵ Fa tsika koa, amy gny filaza gny fahamarina amy gny fomba iaby ao amin'Izay loha, zany hoe, Kristy. ¹⁶ Kristy ro mananga gny vata iaby, sady nampitiky sy natambatry tamy gny isan-tonony io, sady lafa miasa miaraky reo, zay mahavy gny vata hitombo mba hampiory gny vatany amy gny fitiava. ¹⁷ Noho izay, mivola sy manindry mare agny zay ao amy gny Tompo zaho, mba tsy hiai manahaky gny Jentilisa koa gnareo, amy gny fahafoana gny fisaina ndreo. ¹⁸ Maiziky gny fahalala ndreo, tafasaraky amy gny fiainan-Dragnahary noho gny tsy fahalala ao amy ndreo, noho gny fahamafisam-po ndreo. ¹⁹ Tsy mahay menatry ndreo sady gnanolotry gny vata ndreo ho amy fila gny nofo, sady manohy manao agny zao karaza mpahalotoa iaby zao. ²⁰ Fa tsy izay ro fomba gnianara nareo gny momba an'i Kristy. ²¹ Inoako fa nahare gny momba Azy gnareo, sady nampianary tao aminy, satia gny fahamarina ro ao amin'i Jesosy. ²² Nampianary gnareo mba hanary gny fomba fiainanareo taloha, mba hanary gny toetry taloha. Gnazy toetry taloha zay simba noho gny fitaky gny filany. ²³ Gnampianary gnareo mba hihavao ao amy gny fanahy gny sainareo, ²⁴ sady hisiky gny olom-baovao zay noharia araky gny sorakin-Dragnahary_ao amy gny tena fahamarina sy fahamasina ²⁵ Noho izay, ialao gny vandy, sady aoka gny tsiraikiraiky aminareo hifampivola gny marina amy gny namany, satria samby rantsany tsika iaby. ²⁶ Masiaha fa ka manota. Ka enga tsatry gny masoandro moly gny siaky nao. ²⁷ Ka manome hiriky ho agny gny devoly. ²⁸ Izay nangalatry, tsy tokony hangalatry koa. Tsy maintsy miasa I, manao asa soa amy gny tanany, mba hananany raha ho zaray hoa gny reo anatin'gny tsy fahampia. ²⁹ Ka enga hisy safa maloto hiboaky baka amy gny vavanareo. Mampiasà gny safa zay ilay amy gny fanorena gny hafa, araky zay ilaindreo, mba tena hanampy reo zay minjanjy anareo gny safanareo. ³⁰ Sady ka mamplahelo gny Fanahy Masin-Dragnahary, fa baka aminy ro nanaova tombo-kase anareo ho amy gny andro fanavota. ³¹ Ialao iaby gny lolom-po, haromonta, gny siaky, gny fifamalia, sy gny fifampivolana raty, miaraky amy reo karazan'asa raty iaby. ³² Manàna fahalemem-panahy amy gny tsiraikiraiky iaby, fahatsoram-po, mifamela heloky, manahaky gny namelan-Dragnahary anareo tao amin'i Kristy.