¹ Noho izay, zaho Paoly, ro gadran'i Kristy Jesosy ho anareo Jentilisa. ² Ataoko fa nahare gny fandesa gny fahasoavan-Dragnahary zay nomea ahy ho anareo gnareo. ³ Manoratry araky gny fanambara nampahafatary ahy zaho. Izay ro marina mivony momba zay nosoratako kelikely taminareo. ⁴ Lafa mamaky gnareo, ho afaky gny hahazo gny fomba fahazoako izay marina mivony momba an'i Kristy zay. ⁵ Tamy reo taranaky hafa ro tsy natao hain'gny gnanak'olombelo izay marina zay. Fa henaniky zao koa izay ro nambara tamygny alala gny Fanahy tamy reo Apostôly sy reo mpaminany zay voatoka ho amy toy asa toy. ⁶ Izay marina mivony zay ro mivola fa reo Jentilisa ro mpiaraky mandova, sy mpiaraky mivonjo amy gny vata, sady mizara gny fampanantena ao amin'i Kristy Jesosy amy gny alala gny filazantsara reo. ⁷ Fa nandrary mpanompo zay filazantsara izay zaho tamy gny fahasoavan-Dragnahary nameny ahy tamy gny alala gny fiasa gny heriny. ⁸ Nomen-Dragnahary ahy zay fanomeza zay, na de zaho aza ro farany keikely mare amy reo olo masin-Dragnahary. Izay fanomeza zay ro mba hitoriako amy reo Jentilisa gny safasoa gny haren'i Kristy sarotry hita. ⁹ Gny fanomeza mpahasoavan-Dragnahary ho ahy ro anandesako fanazava amy gny olo iaby gny fandaharan-Dragnahary. Io fandahara io ro navonin-Ndragnahary, Gnazy nomoro gny raha iaby, nandritry gny tao maro taloha. ¹⁰ Nampahafatary tamy gny fiangona izay fandahara zay mba hahavy reo mpanapaky sy reo manam-pahefa an-danitry agny hahay gny toetry maro gny fahendren-Draganahary. ¹¹ Niseho araky gny fandahara mandrakizay zay tanteraky tao amin'i Kristy Jesosy Tompontsika zay. ¹² Fa ao amin'i Kristy ro ananantsika fahasakia sy lalam-pahatokia noho gny finoantsika Azy. ¹³ Noho zay, misoloho anareo zaho mba tsy ho kivy noho gny fijaliako ho anareo, izay voninahitry nareo. ¹⁴ Noho izay, mandohaliky aloha gny Baba eo zaho, ¹⁵ zay nanome anara gny longo iaby an-danitry any sy etoy an-tany. ¹⁶ Mivavaky zaho mba hanomeza anareo, araky gny hare gny voninahitriny, mba hatanajky amy hery amy gny alala gny Fanahy Masina, zay ao aminareo. ¹⁷ Mivavaky zaho mba hipetraky ao am-po nareo amy gny finoa agny Kristy, mba hifototr sy hiori ao amy gny fitiavany ganreo. ¹⁸ Hahazo hery lehy gnareo ka ho afaky mahatakatry, miaraky amy reo mpino iaby, gny sakany, gny halavany, gny hahabony, sy gny halaliny, ¹⁹ sady mba hahay gny fitiavan'i Kristy, zay mihoatry gny fahalala iaby, ka mba ho feno gny fahafenoa Ndraganahary iaby gnareo. ²⁰ Sady ho Azy zay mahavita manao mihoatry zay iaby angatahintsika na eritseritintsika, araky gny hery zay miasa ao anatintsika, ²¹ ho Azy gny voninahitry ao amy gny fiangona sady ao amin'i Kristy Jesosy hatrami gny taranaky iaby mandrakizay doria. Amena.