¹ Nijaka tamin'i Mosesy i Yaveh ka nagnano hoe: ² "Didio ny fokon'olon'Israely ka jakay areo hoe: 'Laha hiditra ny tany Kanana anareo, ny tany ijay hônareo, ny tany Kanana sy ny faritry ny tanine, ³ hivelatre hatagne agn'efitr'i Zina magnaraka ny morogn'i Edoma ny atsimonareo. Ny morogne atsignanana amin'ny morogne atsimo die ho eo amin'ny tsipike ijay mifaragna ao amin'ny fefarana atsimon'ny Ranomasina Sira. ⁴ Ny fari-taninareo die hihodigna megnatsimon'ny tagnambognan'i Akrabima ka mienga mamakivaky ny efitr'i Zina. Laha tagne, no mienga megnatsimon'i Kadesi-barnea ijay ka mitohy megnagne Hazara-adara ka megnagne Azmona. ⁵ Laha tagne, ny moron-tany die hivily laha tao Azmona megnagne amin'ny lohasahan-driak'i Egypta ka magnaraka an'ijay hatagne an-dranomasina. ⁶ Ny morontsiraka andrefagna no ho moron-tanin'ny Ranomasina Makadiry. Io ny ho fari-tany andrefagnareo. ⁷ Ny fari-taninareo avaratre hivelatre magnaraka ny tsipika ijay havahanareo hatagne amin'ny Ranomasina Makadiry ka hatagne amin'ny Tagnambogna Hora, ⁸ sady koa laha tagne amin'ny Tampom-bohitra Hora ka hatagne Lebo-hamata, laha teo die hatagne Zedada. ⁹ Laha teo ny fari-tany hitohy hatagne Zifrona ka mifaragna ao Hazar-Enana. Ijany ny ho fari-tany avaratrareo. ¹⁰ Laha teo mariho ny fari-taninao atsignanana hatagne Hazar-enana atsimo ka hatagne Sefama. ¹¹ Afaran'ijay ny fari-tany atsignanana hijotso laha tagne Sefama ka hatagne Ribla, ao amin'ny faritra atsignanan'i Aina. Ny fari-tany hitohy magnaraka ny faritra atsignanan'ny Ranomasina Kinereta. ¹² Laha teo ny fari-tany die hitohy megnatsimo magnaraka ny Ony Jordana ka hatagne amin'ny Ranomasin-tsira. Ijay ny ho taninareo, magnaraka ny morogne magnodidigna abiaby."' ¹³ Die nandidy ny fokon'olon'Israely i Mosesy ka nagnano hoe: "Itoy ny tany ijay ho ajonareo amin'ny filokana, ijay efa nididin'i Yaveh homena hôn'ny foko sivy sy ny asasaky ny foko. ¹⁴ Ny fokon'ny taranak'i Robena, araka ny fanondroam-panagnana hôn'ny fokon-drajan-dreo, ary ny fokon'ny taranak'i Gada, araka ny fanondroam-panagnana hôn'ny fokon-drajan-dreo, ary ny asasa-pokon'i Manase abiaby efa nandray ny tanin-dreo. ¹⁵ Io foko roe sy ny asasa-poko efa nandray ny anjara-tany agne an-dafin'ny Jordana megnatsignanana an'i Jeriko, mananjo ny fiposahan'ny masoandro." ¹⁶ Nijaka tamin'i Mosesy i Yaveh ka nagnano hoe: ¹⁷ "Itoy aby ny agnaran'ny lelahy ijay hijara ny tanin'ny lovanareo: Eleazara mpisorogna sy Josoa janak'i Nona. ¹⁸ Ôka anao hifidy mpitarika raike aby isaky ny foko mba hijara ny tany hôn'ny fianakaviamben-dreo. ¹⁹ Ito aby ny agnaran'io lelahy io: Laha tamin'ny fokon'i Joda, die Kaleba janak'i Jefone. ²⁰ Laha tamin'ny fokon'i taranak'i Simeona, die Semoela janak'i Amihoda. ²¹ Laha tamin'ny fokon'i Benjamina, die Elidada janak'i Kislona. ²² Laha tamin'ny fokon'ny taranak'i Dana mpitarika raike, die Boky janak'i Jogly. ²³ Laha tamin'ny taranak'i Josefa, laha tamin'ny fokon'ny taranak'i Manase mpitarika raike, die Haniela janak'i Efoda. ²⁴ Laha tamin'ny fokon'ny taranak'i Efraima mpitarika raike, die Kemoela janak'i Siftana. ²⁵ Laha tamin'ny fokon'ny taranak'i Zebolona mpitarika raike, die Elifaza janak'i Parnaka. ²⁶ Laha tamin'ny fokon'ny taranak'Isakara mpitarika raike, die Paltiela janak'i Azana. ²⁷ Laha tamin'ny fokon'ny taranak'i Asera mpitarika raike, die Ahihody janak'i Selomy. ²⁸ Laha tamin'ny fokon'ny taranak'i Naftaly mpitarika raike, die Pedahela janak'i Amihoda." ²⁹ Yaveh nandidy an'ireo lelahy ireo mba hijaha ny tany Kanana sady hagnome ny isam-pokon'Israely ny anjaran-dreo.