¹ Misaora an'i Yaveh, fa soa I, ary mandrakizay ny famondram-pony. ² Aoka reo navotan'i Yaveh hilaza izay, de izay navotany teo an-tanan'ny fahavalo. ³ Nangoniny hatagny amin'ny tany hafa maro reo, de zay hatagny atsinanana sy hatagny andrefana, hatagny avaratsa sy hatagny atsimo. ⁴ irenireny tany an'efitsa teny amin'ny lalana hay reo ary tsa nahita tanàna hitoerana. ⁵ Satria noana sady nangetaheta reo, de heniky ny faharerahana reo. ⁶ De nikaika mafy an'i Yaveh tamin'ny andro fahoriany, ka namonjy andreo tamin'ny fahoriany I. ⁷ Nitondra andreo tamin'ny lalana mahitsy I mba ahafahandreo mandeha any amin'ny tanàna zay hipetrahany. ⁸ Hidera an'i Yaveh anie reo ona nohon'ny famindram-pony sy reo raha soa aby nataony tamin'ny olombelogna! ⁹ Fa nanome fahafaham-po ny faniriandreo zay nangetaheta I, ary ny faniriandreo noana de vokisany raha soa. ¹⁰ Ny sasany mitoatsa agnaty aizina sy aloky ny fahafatesana, voagadram-pahoriana sy reo rojo vy. ¹¹ Nisy izay satria nikomy nanohitsa ny tarogn'Andriamagnitsa reo ary nanary ny torolalan'ny Avo Indrindra. ¹² Nampietry ny fondreo tamin'ny raha sarotsa I. Tafintohina reo ary tsa nisy ona hanampy andreo hitraka. ¹³ De nikaika an'i Yaveh tamin'ny fahoriany reo, ka nofinerin'i Yaveh hiala hatagny amin'ny fahoriany. ¹⁴ Nitondra andreo hivoaka ny maizina sy ny haizim-pito I ary novinakiny ny fatorandreo. ¹⁵ Hidera an'i Yaveh anie reo ona reo nohon'ny famindram-pony sy reo raha mahagaga nataony ho an'ny olombelogna! ¹⁶ Fa namotika ny vavahady varahina I ary nanapaka reo hidy vy. ¹⁷ Gegy reo tamin'ny fikomiana nataony ary ory noho reo helony. ¹⁸ Very ny faniriany hihinana aby ny hanigna , ary niha-nanakaiky ny vavahadin'ny fahafatesana reo. ¹⁹ De nikaika mafy an'i Yaveh reo tamin'ny fahoriany, de nitondra andreo hivoaka amin'ny fahoany I. ²⁰ Nandefa ny tarogny I ka nanasitrana andreo, de novonjeny tamin'ny fahapotehiny reo. ²¹ Ny ona anie hidera an'i Yaveh nohon'ny famindram-pony sy reo raha mahagaga nataony tamin'ny olombelogna! ²² Aoka reo hanolotsa reo fanati-pisaorana ka hanambara ny asany lihibe amin'ny fihirana. ²³ Zay miantsambo eny an-dranomasina sy manao raharaham-barotsa agny ampitan-dranomasina. ²⁴ Reo de nahita ny asan'i Yaveh sy ny fahagagany teny an-dranomasina. ²⁵ Fa I ro mibaiko sy maniraka ny tafio-drovotsa zay mampisondrotsa ny ranomasina. ²⁶ Nanakatsa ny lagnitsa reny; ary nidigna tany amin'ny laligna. Ketraka ny fahoriana ny fiainandreo. ²⁷ Nisangodigna sady nivembena sahala reo mamolava reo de roso tagny amin'ny fahaverezan-tsaina. ²⁸ Ary nikaika an'i Yaveh tamin'ny fahoriany reo, ka noferiny nivoaka tamin'ny fahoriany reo. ²⁹ Nampijanona ny tafio-drivotsa I, ary nampitony ny onjan-dranomasina. ³⁰ Ary de niravoravo reo satria nitony ny ranomasina, ary nitondra andreo ho eny amin'ny morony niriandreo I. ³¹ Ny ona anie hidera an'i Yaveh nohon'ny famindram-pony sy amin'ireo raha mahatalanjona nataony tamin'ny olombelogna! ³² Aoka reo hanandratsa Anazy eo amin'ny fiangonan'ny ona ary hidera Anazy eo amin'ny filan-kevits'ireo loholona. ³³ Mamadika reo ony ho efitsa I, loharano ho tany maina, ³⁴ ary tany mahavokatsa ho tany hay noho ny faharatsian'ny ona. ³⁵ Mamadika ny efitsa ho farihin-drano I ary tany maina ho loharano maro. ³⁶ Atoatsany any zay noana, ary hanorina tanàna hitoerana reo. ³⁷ Hanorina tanàna hisy saha reo, ho atao tanim-boaloboka, ary hamokatsa be. ³⁸ Hitahy reo I ka ho maro an'iza izay. Tsa avelany hihavitsy ny biby fiompiny. ³⁹ Fa nihena sy nietry reo nohon'ny fahoriana maharary sy hirifiry. ⁴⁰ Mandraraka fanamavoana amin'ireo mpitarika I ary mampirenireny andreo any an'efitsa, zay tsa misy lalana. ⁴¹ Fa miaro reo mahantra nohon'ny fahoriana koa I ary miahy reo fianakaviany sahala ny andian'ondry. ⁴² Hahita zay ny ol-mahitsy ka ho faly, ary reo ratsy fagnahy aby manakombom-bava. ⁴³ Zay hendry de aoka handray an-tsoratsa zay raha hihevitsa reo asa famindram-pon'i Yaveh.