¹ Lowo tsili gwigi mfunu ni yinu sonogeene mu guwa baklisto ba Yudeye magaba mutulu meeme ngiaba ni midimi mibini migi mipimi. ² Gimi ndegini buyi nusileene gugele bisi Masedoni ni bisi Akayi bayilamana duugu mu mvulu yima digi. Baada bavulu mu kebe gabini baya laba gifu gibini. ³ Ndelunu duya nudumusu ndaama bapaanga ba bisi-Masedoni balu moneene biwi beene ni ⁴ paana yidu badeleene mu kuuma bini yigi ndebunu, nukono gudu wa nsono. ⁵ Yima zolo ni tomo biwi biyi, meeme ngini yalaba gungoyo mutulu biwi bamono ni gwigi ndebunu ni bini nuyidigi magaba mana, gukono gugala gitungu-mugili. ⁶ Hoso muudu galu leedeene nga buga mazolo mu mudimaana, gukono mabogodo ni lowo gingolo-ngolo gi muuda-mbaana ginaga Nzaama wuzolo muudu wunu wuya leede mu kiese. ⁷ Badodo ni wunu wuma gwini bitsi gabaga bitsi, wunu wuma gwini bimi bivulu gabaga se bimi bivulu. ⁸ Nzaama wuma fana guwa muudu wu gifa gini bimi bivulu bi gifande gifa, bini bima fana gumu salasa hoso daanga ande mu gusalaaga baada bambaana mapimi ⁹ ande guwaaga baada bana bakono gubagaaga bimi bivulu bini bi mvulande mvulu ndebunu buba sonogo. ¹⁰ Nzaama wunu wuwaaga mugwini-mbenge, wumu disa, bugini muwa mbenge yivulu ande guyelese bimi biga mana gwini, gini nugidili bamvaama ¹¹ mutulu nugabaaga hoso daanga. Ndebunu baada bavulu bubini mudoonaaga Nzaama mutula magaba mabini matwini badwaleene. ¹² Bimi binu madumusu lowo ni bigi peele mfunu gugele baklisto, asi biya loomo se gubisa mu bisaama mutulu gudoono Daada Nzaama. ¹³ Baada bavulu bini mulumusu Nzaama mutula gulemvege gubini ande guzolo gubini mu Ndaga-Nzaama bunu magaabeene baada bambaana bimi bibini. ¹⁴ Bubini nusaameene gugele Nzaama ni ganu dele mu disi lupimi. ¹⁵ Galumu gwana Nzaama wunu wuma kono wugu mumegande.