¹ Bapaanga babisi, duya zolo ni bini se nuyabeene mapimi ma Nzaama maga masala mu kebe ga mabundu ma Masedoni. ² Baklisto bama gala mu pasi yivulu tsili, lowo gabiwi bagele ande bimi, asi baleese kiesi gima digagana mu gugaaba gubiwi. ³ Meege beene buyi mono, baya duloomo biwi beene ni badumusu baklisto bigi gu Yudeye lusalasa. ⁴ Baleede bimi bivulu gidigi bidu gêne bisi, hoso muudu nga buga zoloso ndege beene mu mudimaana, gukono mabogodo ni lowo gumu sindigi. ⁵ Balu leede tomo gu miogo mi Nzaama, gungoyo luba yi gugele bisi. ⁶ Lwi ndelunu ludu tunudumusu Tito mu gwa nulongo gisala gini giga bulusu guugu. ⁷ Bini nwigi bamvaama banene, nubege guzolo ande lugwigili ande ndungu yi mapaana mamosogo maga dugenese nulongo ⁸ ginaga nuyaba buga luleede Mfumu Yesu mutula bisi, gigi mvaama wunu wulu gidili muudu wuma koono gibageene ⁹ mutulu bini nubege gimvaama mu miogo minde mibwasa. ¹⁰ Meeme iya nuleele ni gwigi pimi ni bini numa gala baada batomo mugu guumunu gisala gigi, tomo bini nubulusu mugu luleede ¹¹ ginaga Nzaama gazolaaga ni nuleede nga bwigi gibageene gi hoso muudu, ¹² luleede guzolo gubini gupimi bunu nde gaguumunu ni gimi gini gi ¹³ Lowo gwigi pimi ni mu daanga lunu makono gimi numono pasi mu gusalasa baada bambaana, ¹⁴ asi gwigi pimi mu gusalasaganaaga ni gimi gigi, bwi ndebunu mu daanga lu pasi yinze, baada bambaana bubini ya gusalasa. ¹⁵ Basonogo ni muudu wunu wuma dolo bimi bivulu, lowo bitumu hinagana, wunu wuma dolo gandaama, lowo gama kono gimi. ¹⁶ Dumu lumusaana Nzaama wunu wuwe Tito luzolo lugunu salasa nga bisi. ¹⁷ Nde wu guumunu mu gwiyi gugele bini mu guzolo gwana, ¹⁸ ni wubaya buleene miogo mu mabundu mamosogo mu gisala gigi gi gulongo Ndaga-Nzaama. ¹⁹ Gigi muudu wutu duwa mabundu mamosogo ni twenaagande mu gisala gi Nzaama. ²⁰ Bisi dusaana ngolo mu gugebe pima-pimi nzimi yiyi, dumonogoso luzolo lubisi mu kebe ga gisala gigi, ²¹ dumu waana Nzaama lugugu ya misi miana ande ya misi mi baada. ²² Luulu duya nudumusu paangaabisi wumbaana wudu silineege mudimi giya nzili yimoso ande Tito wunu wudu salagande tomo ande bapaanga bambaana mutulu gwa nusalasa; ²³ duya nuloomo ni nuba leese guzolo gubini ginaga bayaya sala mutula lugugu lu Mfumu Yesu. ²⁴ Bunu mabundu mamosogo nga mamu sileene mudimi.