¹ Wuwu meeme Poolo iya nusonogeene, baada badodoga ni yimonogoga ni ngwigi pwede lungwigi mu kebe gabini, asi bamonoga ni ngwigi wu gikagala-ngolo bihene bimbaana. ² Nukono gungiamba ni yima duulu gunu mutulu yiya zolo guleese baada bana baya dodo ni bisi duya saleene gimuudu gibisi. ³ Bisi twigi baada, asi gisala gibisi giya laba misigi mi Nzaama, lowo ni mi gimuudu, bisi lowo duya saleene mada ma gimuudu. ⁴ Mada mabisi migi ma ngolo yi Nzaama, mana maya bwisi malongi ma bupala ande gububulu bibege bi midoyo, ⁵ migi mana maya gama manungu ma baada bafa mu kuuma-Yesu. ⁶ Bisi duma fana guganga gono lu baada babosogo bana baya kono guzidisi Yesu tii lubini muzidisi. ⁷ Bini nuya mono mapaana yanzie. Ni muudu wulu mona ni gigi mu gimvugu ande Yesu, galu godoloso. ⁸ Gwigi ndebunu ni bisi twigi mu Yesu. ⁹ Meeme kalaaga ande nsono mu gudodeene ngolo yini yiga paaga Nzaama, lowo ni yigi mutulu gubeebese, asi mu gudwala gimvugu gibini gu gilungunu. ¹⁰ Migaana mi meeme baya dodo ni miya waaga baada pasi, asi meeme numonoga pwede ni ngwigi mu kebe gabini, nukono guwa pasi ¹¹ Gimi gimfunu nuyabeene ni mapaana maduya sonogo lutwigi guleye nde mana se maduya saleene lutwigi yaaya mu kebe gabini. ¹² Bisi lowo duma fana gulu monogoso ni twigi yatala baada babosogo mu ngolo yibisi beene ni lowo gulu mege ande baada bambaana. ¹³ Duya saleene Daada Nzaama ndebunu bugaya dudumu ndege, lowo duma fana gusomogo mudingi wuga dusileene nde; baada baya dodo bunu bigi mazobo. ¹⁴ Bisi lowo se duma fana gusigisi gisala gi baada bambaana, gidu makono gusala bisi. ¹⁵ Gisala gibisi gigi ande mudingi, nde munu muduya salande... lugwigili lubini ni luyele. ¹⁶ Duma fana gwa longo Ndaga-Nzaama mu bihene bimbaana, asi lowo duma fana gusigisi gisala gikene, gibisi beene. ¹⁷ Ginaga basonogo ni muudu gama zolo gulusigisi, gasigisi gisala gitu musaleene Nzaama. ¹⁸ Ndelunu lowo gwigi ni ndege muudu wulu sigisa, asi Nzaama gazologa ni ndege gamu guumunu mu gisala giana.