¹ Duyaba ni luudu lubisi lu gimuudu lwigi nga nzo yi tente, bulwini fa, asi mudimi wubisi wigi ni ² bufugu bunu Nzaama gini duwingisi mu nzo yaana yi mvulande mvulu, nzo yini yikono guduungu muudu; ³ bugini duvaadasa milele, lowo twini gala buguulu gu tala. ⁴ Lowo duya saga gudogolo luudu luulu lu muswini, asi duya saga ni duvaada luudu lunu lukono gufaaga mutulu luudu luulu lutwigalwiwi loolo lwigi bugogo. ⁵ Ndege beene Nzaama wunu wudu genese luudu lutala daanga luga duwe Muhungaana. ⁶ Twigi ande gibagala daanga lulwosogo, ⁷ asi duyaba ni daanga lutwigi mu kebe ga luudu luulu lu muswini, ⁸ twigi guleye ande Nzaama; ndelunu duya sa ngolo ni duvaada luudu lunu lutala ⁹ mutulu duduugalwiwi ya misi mi Mfumu Yesu ¹⁰ ginaga hoso muudu gini baga matabisi maana labeene bisala biana biga sala yataa maana ni bipimi ni lowo bifa. ¹¹ Bisi munu guyabeene mpili yi guzidisi Nzaama, ndelunu duya nuzoleene ni bini se numu yabeene pima-pimi nga budu muyaba bisi, nudigi nkudu bisi, asi lowo duya nudumu. ¹² Kiesi gibisi gigi ni bini nuba leese baada bana baya nudala ni nwigi baana ba Nzaama. ¹³ Ni bisi duya monogo bazobo gwigi mutula Nzaama, asi lowo twigi bazobo, gwigi mutula bini. ¹⁴ Ndelunu muudu wumoso wufileene baada babosogo mutulu babege moono wu mvulande mvulu baada bana bigi mu kebe ga lufa lunde. ¹⁵ Gafi mutulu baada babosogo bakono gugala ande moono wubiwi beene, asi mutulu wunu wufi, wuwusugu mu lufa gisini biwi. ¹⁶ Bisi lowo Dubisa dalaaga si muudu wumoso mu disi lugi muudu, asi ni duma dala Yesu ¹⁷ mutulu ni muudu wuma wingini mu gimvugu gi Yesu, wuma sobogo, gimuudu ginde gitomo gima sa, wuma gidigi muudu mufini, ¹⁸ Nzaama wuya gosagana ande bisi baada babosogo mu nzila Mwanaana Yesu ¹⁹ wuga si ya kebe mu gugoso baada ande ndege Nzaama gukono gudala gubiyi gubisi. Ndelunu wudu de gisala gi guyabasa baada babosogo paana yini yigu gosagana. ²⁰ Bisi twigi baada bana baga dumu Yesu, baga demene Nzaama ni bagoso baada babosogo mu kuuma-Yesu. ²¹ Nde gigi wunu wukono masumu (musantu), asi Nzaama luga muvaadasa masumu ma baada babosogo mutulu mu nzilande biwi babege moono.