¹ Nzaama wubisi gigi Nzaama mupimi, wudu de gisala gigi, dugi salaga gukono guwoono luudu. ² Ndelunu dugi salaga pimi mutulu muudu muwosogo gagi yabeene, mu bufugu bu nsugu hoso muudu gini lusaameene ndege ya misi mi Nzaama. ³ Ndaga-Nzaama duyi longaaga pimi dukono guwingisi bupala mu kebe, dukono gubwese gimi, dukono gudogolo si gimi gimoso, ni lowo baada bana babili nzili lowo bini yiguumunu ginaga Sadana mfuma-gisi gigi wuba ganga misi, bamonaaga ⁴ lowo baya yabeene si gimi gimoso, lowo baya mono mugiema- Nzaama mu malongi ma Ndaga-Nzaama mu kuuma-mwanaana Yesu. ⁵ Mu malongi mabisi dukono gulu monogoso bisi beene, dumonogoso Mfumu Yesu wunu wigi mooso mu kebe ga pibi nga buga dodo ndege, ⁶ bisi twigi baada baana ba gisala baga wingisi mooso mu kebe ga midimi mutulu dulongo baada mugieme du Nzaama wunu wuya geege ya mbunzu yi Yesu. ⁷ Bisi duseene gimi gimoso gima digi tala, gigi gi gimpeve mu kebe gabisi ngagwi ni gini gigi mu kebe ga mabungu mutulu gumonogoso ngolo yi Nzaama. ⁸ Bisi twigi mu kebe ga pasi, asi pasi lowo yini duzwa; twigi mu kebe ga kiene, asi kiene lowo yini dudogolo guganga mudimi; ⁹ bubini dubwisi, asi lowo bini duzwa. ¹⁰ Bisi duvaada lufa lu Yesu mu luudu lubisi mutulu moono wunde wumonogo mu kebe ga luudu lubisi, ¹¹ moono wunu wu Yesu wigi mu gumonogo hoso daanga mu kebe ga luudu lubisi, lufa lu Yesu munu gusala mugele bisi mutulu bini nubege moono mu luudu luulu lufaaga. ¹² Bisi babosogo twigi bangafa si butwigi mu muningi. ¹³ Basonogo ni meeme yisi mudimi sa iya dodo bunu, bisi se dusi mudimi sa duya dodo bunu. ¹⁴ Duyaba ni Nzaama wunu wunimisi Yesu mu lufa bugini dunimisi se bisi, butwini wusugu nzili yimoso ande Yesu mu lufa, butwini monogo ya misi mi Nzaama. ¹⁵ Duya mono pasi yiyi yiyosogo mutula bini, bunu Nzaama ganu dele mu disi lupimi, nugele baada bavulu mugu musaama ande gumu wa lugugu ande madoono. ¹⁶ Dukono guwoono luudu si bunu buluya beebe bitsi-bitsi, luudu lubisi lu gimpeve munu gufudugu hoso bufugu. ¹⁷ Kiene yiduya wugu luulu lowo yima digi mugieme wunene wu mvulande mvulu ande wumfunu yivulu ¹⁸ ginaga bisi lowo duya dala bimi bini biya monogo gu misi, asi bini biya kono gumonogo gu misi, bini bi mvulande mvulu.