¹ Ni gulu sigisi, luulu buyi lusigisa. Yinu leele mapaana maga ndeele meeme Mfumu Yesu mu mudimi ande mayi mono mu gimona-misi. ² Meeme ngiaba ni gwigi ande muklisto wumoso wuga nabasa Nzaama gu tala gidigi mvulu guumana (14), nde peele Nzaama wuyaba ni gwigi ndebunu. ³ Luga banaga gawugu mandaga ma ginzenzi ⁴ muudu bugu mayabeene lowo, bugu madodo lowo. ⁵ Meeme lowo yima fana gulu sigisi meege beene mu gisala gimeeme, asi yima zolo gisigisi muklisto wunu wubanaga gu tala, ⁶ Ni gulu sigisi meege mu mapaana mana maya ngwonoso luudu. Kono gudodo ngagwi ni zobo, asi yima zolo ni baada batodeene meeme mapaana mabaya mono ande mabaya wugu gugele meeme. ⁷ Mu gukono gulu sigisi ande gukono gugala luleene mutula mapaana manene mayi mono ande mana maga ndeele, buyi beele gikaasa gingolo, ⁸ luyi saama Nzaama mbala dede (3) ni ganzunusu. ⁹ Nzaama gandeele ni guzolo gimeeme guma gugu gugele nze. Ngolo yimeeme yima monoga ni nze wuma woono. Yima zolo ni yilu sigisi mu guwoono gwama mutulu ngolo yi Mfumu Yesu yimonogo mugu nwaneene meeme. ¹⁰ Lungwigi meeme wunga woono, ngolo yinde yimonogo ndelunu, ngwigi kiesi mu pasi yiya mono ande misingi mibaya tugu baada ginaga ngolo yinde yiya monogo mu daanga lungwigi meeme wunga woono. Ndelunu yima dodo ni lungwigi wunga woono, ngwigi ngolo. ¹¹ Ni yidodo nga zobo' gwigi bini nuzolo bunu mutulu lowo nunwaneene, si lowo ngwigi mfunu yivulu gu misi mi batumu babini banene. ¹² Mapaana mayi sala meeme mu kebe gabini ande buyi ganga meeme mudimi gugele mu gunu leese ni ngwigi tumu ande bipa bini biga sala Nzaama bi gifande gifa. ¹³ Mabundu mambaana matu nudigi bini mu kiwi? Nungweseleene ni lowo yinu waaya bugogo bumeeme. ¹⁴ Bungwiya bisa fudugu mu mbala yidede gu bulu lubini, asi lowo ngini nuwa bugogo bu gudia gumeeme. Meeme lowo yiya nusageene ni nupe nzimi, asi yiya nusaaga bini baada. Pimi bibwidi bi baana baseene bugogo bu baana babiwi, asi lowo gwigi pimi ni baana baseene bugogo bu bibwidi bibiwi. ¹⁵ Meeme ngini gala kiesi ni nseene nzimi yimeeme yinu salasa bini, asi lowo ni yilu salasa mege beene. Bunu guya leesege ni meeme yinu zologa bini guvulu, bini nunzolaaga meeme? ¹⁶ Guya monogo ni meeme buyi kono gunu wa bugogo, ngwigi muudu mufa? Buyi nuniogola? ¹⁷ Luyi nudumusu Tito ande paanga wumbaana, buyi nuniogolo? ¹⁸ Tito buga nuniogolo gunu? ¹⁹ Nuya nungu ni bisi dusaga gulu bingisi gu misi mi mibini? Galowo. Bisi duya sala mu gimvugu ande Mfumu Yesu ya misi mi Daada Nzaama. ²⁰ Meeme ngwigi mu boomo ni mu daanga lutwini ya gunu baada bamoso bagele gisaga-saga, bisi se dumonogo gisaga-saga. ²¹ Baada bamoso bafudugeene mu gusala masumu nga ginduumu ande bidoda-dodo ande gudodagana ande gusilagana buhala; bambaana mu kobo ande gudugagana ande luleene. Lowo yima zolo ni Nzaama gamwese nsono ya misi mibini mutula masumu ma baada bana bama fudugu gungoyo mu gusala gubiyi. Gwini pa meeme pwisi yi gudili.