¹ Bungwini bisa yafudugu gu bulu lubini mu mbala yidede. Ndebunu buba sonogo ni Paana yiyosogo yiwaaga ni baada boolo ni lowo badede batu yileedeene gimbangi. ² Iya bisa nulugisi mu mbala yiyoolo ni lowo ngini bisa nuwa bugogo bu gundisaaga. ³ Nuya saga ni Mfumu Yesu ganu leele mu gono lumeeme, bunwini muwugu, gigi mu gusala mu kebe gabini, lowo gatu nuwoono. ⁴ Luba musi yataa kulunsi, buga woono, asi luulu gigi ande ngolo yi Daada Nzaama. Mu gimvugu ndegini gitwigande, bisi se twigi banga-woono, asi butwini nuleese ni twigi ande ngolo yi Daada Nzaama, bunwini yimono. ⁵ Numegeede gulu dala hoso muudu ni nwigi ande lugwigili, ni lowo nutu lumono, dodaana ni lowo nutu ludala pimi. ⁶ Bunwini mono ni gisala gibisi gigi gipimi mu kebe gabini. ⁷ Ndelunu duya saama Nzaama ni mu kebe gabini si muudu wumoso gakono gubwa mu masumu, lowo duya zolo ni numono, asi duya zolo ni nusalaaga mapaana mapimi, si bisi lowo dutu magugusu. ⁸ Ginaga lowo duma fana gusala mapaana maga kono guzolaaga Nzaama, dusalaaga luzolo lunde hoso daanga. ⁹ Bisi dumonoga kiesi ni twigi banga-woono, bunu bini nwigi ngolo. Duya nusaameene ni nugele baada bapimi tsili. ¹⁰ Ndelunu iya nusonogeene daanga lungwigi guleye, lowo ni mu gunu mwese pasi, asi mutulu guyelese lugwigili lubini. Ndebunu lungini yaduulu, nukono gumono ni iya nusalasa gisala mu gingolo-ngolo. Ngolo yiduya salayiwi yigi yi Daada Nzaama, yigi mutulu guduungu gimvugu gibini, asi lowo ni mutula gubeebese gimvugu. ¹¹ Bapaanga ba guzolo, galaana pimi, nuzolaganaaga bini babosogo, nusalasanaaga ande guleedaganaaga mbodo yi gipaanga ande guleedaganaaga gibagala bini ande bini ande guwugaganaaga ande gubwisaganaaga midimi; ¹² bunu Nzaama mupimi ande wu guzolo bugini galaaga ande bini hoso daanga. ¹³ Baklisto babosogo batu nudumusu mbodo. ¹⁴ Nzaama ganu dele mu disi lupimi mu guzolo gu Mfumu Yesu ande gimvugu gi Muhunga-Nzaama.