¹ Iya guleele ni mu daanga lu bisaama baada basaama tomo mutula biwi beene, baleeda se madoono mutula biwi beene, ² gungoyo basaama mutula baada bambaana, baleede se madoono mutula baada bambaana. ³ baba sameene se bamfumu ba gisi, bawingisi dulu-dulu we luzidi we ginzaama. ⁴ Mana migi mapaana maga zologa Muhulusu wubisi. ⁵ Daada Nzaama gazologa ni baada babosogo bahulugu, bayabeene mapaana ma musomo ndelunu lugansolo meeme mu gumwangasa musomo wunde mu kebe ga baada bamakono mu gigana gi bayudu, ⁶ bamu yabeene ni nde gigi kaga Nzaama wumoso peele wunu wuguulu baada gu miogo mi mumenge Sadana mu nzili yi Mfumu Yesu, ⁷ wunu wululeede ndege beene nga magaba. ⁸ Meeme iya zolo ni babagala basaamaaga mu gimvugu, bakono guwugaaga kobo mu daanga lu bisaama, ⁹ bakaada se bavadaaga milele mipimi, bakono guvadaaga bibende mu kodo, ni lowo milele mi tala yivulu, mi luleene; ¹⁰ guganga se bamfufu lowo mu guleede luzidi gugele Nzaama. ¹¹ Lowo yima wa bakaada nzili mu gulongo Ndaga-Nzaama ni lowo mu guyaala babagala, mutulu Nzaama gasele tomo bagala, mukaada mangoyo. ¹² Sadana gadoneene Eva, lowo ni Adama; ¹³ ndelunu mukaada lugabebese musigi wu Nzaama. ¹⁴ Asi hoso muudu wumabudu baana ni wumasa lugwigili bugini hulugu, ¹⁵ ni gigi pwede we guzolo we ginzaama, luleene lowo gwana.