¹ Mwanaama wu mudimi Timote, wuwu meeme Polo, tumu wu Nzaama we wu Yesu Klisto iya gusonogeene mugaana wuwu. ² Daada Nzaama we Mfumu Yesu bagudele mu disi lupimi, baguwe dulu-duluu. ³ Iya zolo ni nze wusaala ya Efese, wusala longo baada bawesele malongo ma bupala we matigi we miaga mi pamba-pamba, bakono guduumunaaga makuumu ma bambudu ba tomo, ⁴ ndebunu baada bini gala we luzolo we lugwigili lumusomo we mudimi mupimi. ⁵ Baada babili nzili, balongoga bagwene mapaana ma pamba-pamba mu gingolo-ngolo, asi biwi beene bama seleneege. ⁶ Misigi migi mfunu yagele baada ni migi mu nzili yipimi, ⁷ misigi lowo migi mutula baada bapimi, asi migi mutula baada baaba: ⁸ bana bakono guzidisaaga mapaana ma Nzaama we badaada we bamaaya babiwi, ⁹ bana bazwaaga bagwene, bana balaalaga Nzaama mu bupala, bana basalaga ginduumu, bana bakono gulabaaga misigi mi Nzaama, ¹⁰ bana bakono guyaba Nzaama, baada ba mudwe bwidi, baada badegega bagwene, babagala bakweleganaaga biwi ande biwi, bakaada se gifa gimoso, ¹¹ baada badodoga bupala, bakono guzolaaga paana-paana. ¹² Iya wa Mfumu Yesu madoono bugape gisala gigi we ngolo mu gukono gulaba mana mayi gidi meeme mu daanga luyi koono gugidigi muklisto, luyi mubeya. ¹³ Luulu wunsoolo, wutele mu disi lunde lupimi, wupe luzolo we lugwigili. ¹⁴ Ganseene meeme nga muudu wunu wulesega baada bambaana mugeleene wupimi ¹⁵ mutulu gubaga moono wu mvulande mvulu. ¹⁶ Meeme ngwigi wunu wumadigi baada babosogo mu gusala masumu, asi Nzaama lugangugeene kiene. ¹⁷ Luzidi we lugugu bigele ande Nzaama wunu wukoono nsugu, ¹⁸ wukono gumonogaaga gu misi, gigi wumoso peele; wumbaana lowo gigi. Amen! ¹⁹ Nze mwanaama Timote, iya guwa malongo maama mutulu wigi we lugwigili we manungu mapimi mu mudimaaga; ²⁰ baada bavulu lowo bigi ande manungu mapimi nga Imeneye we Alegizandele, badodoga mapaana mafa mu kuuma-Nzaama.