¹ Wakum le simu emu e nzeyi, le buu e wa Gadarenia. ² Mbale emog eyi pwi Yezu ne war, wur emog ayia le nteang ende, ayum alum, mpi ayinde na mpeve ipwo. ³ Wur ewo atsande mpier le tii alum, wakokugaka n'ontshung eshing, ata okor o bibende. ⁴ Otshungikiwo ntangu enkum bibende ne nkuu na eshing e bibende, kansi alebagikinde bibende inkum, kaku wur eyi na biu onkir. ⁵ Otshu na mbii, ayikinde ku le tii alum ti ne dzug embim, atsugikinde elie, mpi abagikinde wampura ne djung inde l'atari. ⁶ Ntangu eyende Yezu etey, akim etay ende, atsankur abwong ne nteang ende. ⁷ Atsug olie l'otuba o biuu: "Djwi nge yie ya me, Yezu, mon e Nziam edzug? Ndowigna le dzin i Nziam, oyantungisa." ⁸ Djwi na Yezu okabikinde : "Pwe ne djung i wur ene, yie mpeve epwo." ⁹ Mbiy Yezu oywe, "Dzin i yie nagni? Nde mpi okeara, "Dzin i me Lezio, djwa sili ensign. ¹⁰ Abondila Yezu mingi djwa akwon ampur le lien e wia. ¹¹ N'ondi onagni, ayiwo n'olwi e wa ngulu aliki pipi na nguma, ¹² mpi wademona wawigna n'ande: "Tum avear le tii e wa ngulu, djwa sishwi le tii e wo." ¹³ Apea mbug, mpeve ipwo ipwe watsa ntshwe le tii e wa ngulu, mbiy wangulu wakim aveang watsa ndog le nzeyi: ayiwo kiteso awug ape eyitsu nzig le nzeyi. ¹⁴ Avear ayibokoliki wangulu inagni wakim, watsa nkab oshong itayi inkum, ne via inen ti ne via ikiag. Avear watsa ndir vi ayileg. ¹⁵ Wayia etay e Yezu, mpi wayen wur eyi na mpeve ipwo- nde wur eyi na Lezio- atikeanse, atilwer ileam, atikea wagni, mpi wayug wom. ¹⁶ Avear ayiyen vi ankum ayileg wakab vi ayisalami na wur e mpeve epwo ti ne wa ngulu. ¹⁷ Mbiy wabana na ngwigna na Yezu alim le buu ewo. ¹⁸ Ntangu eveanikinde ne war, wur eyiki na mpeve ipwo owigna nswa e mpier n'ande. ¹⁹ Yezu atun, mbiy okaba: Tshwag n'evur eyie, etay atwung ayie, mpi kabawo vi amokie Nkum, ti oshin emoyugnde ngiy. ²⁰ Akien, mpi abana nkab ne Dekapolisi vi anen emokie Yezu, mpi avear ankum wayen ngituka. ²¹ Ntangu e Yezu ekeyi nde mbag simu emu le tii e war, olwi avear wayia ngywo pipi na nde, oshin oyinde pipi na nzey. ²² Mbiy, emog kati ankum a sinagoge, eviewo Yairusi ayia, mpi ntangu eyiyen nde Yezu, alog ne nkuu inde. ²³ Mbiy owigna ngean: "Onkean me onkiar ali pipi n'ewa. Ngiovie, yag otsug mbwo djwa avug, akeyi ne luzingu." ²⁴ Yezu atsa n'ande, mbiy olwi avear wodjie ye mpi walojing. ²⁵ Nzokande ayiwo na okear omog epuriki alung yum mvwe djum n'ipe. ²⁶ Ayenikinde mpay ensign le mbwo i minganga etshin n'etshin ye mpi apiynde ekr enkum eyikinde la wo. Kansi akaviya lubiku, nkeang akumikiwo k'ensign. ²⁷ Ntangu eyugnde watuba vi a Yezu, ashwe l'olwi avear, ne mbiy e Yezu, mpi akir eleam e nde. ²⁸ Djwa atubikinde: "Yug mekug nkir ata k'eleam ende, asivugme. ²⁹ Ntangu eyokirnde, alung aseanga na mpwe, ayug ne djung inde nde ativug. ³⁰ Mpi mbala emog Yezu ayug biu emog etipwe ne djung inde. Mpi atshim le kati olwi avear mpi aywe: " Wur nagn eminkir n'ileam?" ³¹ Wa ntumwa inde w'okeara: "Oyen olwi avear emotsug le kati kati, mbiy oyaywe, "Wur nagni eminkir ? ³² Kansi Yezu alir ne munziunga ende djwi na ndjia nagni emikie vi anagn. ³³ Onkear owo, ntangu ejinde vi amileg le djiung inde, ayug wom mpi abana ntekita. Ayia ndog le nkuu i Yezu mpi okaba vi ande ankum. ³⁴ Yezu atuba n'ande : " Mon me onkear, lukwikilu eyie etovuga. Tshwag na ngemba ye mpi vey lubiku e nkeang eyie. ³⁵ Ko ntangu eyitubikinde, avear ayum n'evur e nkum e sinagoge wakaba nkum e sinagoge: "Mon yie onkear atiwa. Djwa la nge etungisayie longi?" ³⁶ Kansi Yezu akakipe vi ayi nkab avear anagni, atuba nda nkum e sinagoge: " Oyayug wom, kwikila kaka." ³⁷ Akaleang wur odjiende, yug epa Petelo, Zaki ti Yoani, otwung o Zaki. ³⁸ Wakum l'evur e nkum e sinagoge, mpi wayen olwi o vear waliye mpi watsug elie. ³⁹ Ntangu eshwi Yezu l'evur, atuba ngean l'avear: "Djwa nge ekiegnu oshur, djwa nge eliegnu?" Mon atowe, kansi ativur lwong." ⁴⁰ Avear ankum woywe etwo, kansi Yezu apur avear ankum le lien, avey tea na mea e mon na avear eyodji, watsa ondi eyi mon. ⁴¹ Yezu akir mon l'ewuo, mpi atuba n'ande: "Talitha koumi", eling ntuba " Mon onkear, yima, ntuba m'a yie." ⁴² Mbala emog, mon onkear ayima, abana nkien djwa ayinde na mvwe djum n'ipe. Avear ankum wayituka. ⁴³ Yezu apum avear anagni ankum wakwon nkab vi ane. Mbiy awigna na wo wapiyi mon vim a nda.