¹ Yezu akia mbana ndong along ne simu e nzeyi. Olwi o viar asangiwo pipi nande, avean nde ne war emog, ne nzeyi. Olwi e viar ankum eyiwo n'okiri, ne simu. ² Along nde vim entsign na bingani, mpi atuba ndawu ne tiy along ande: ³ Yugagni. Wur etsa mfugn apwinde djwi na mfugn. ⁴ Ntang efugnikinde, ndamu e nkeni elog ne mbug : wamfuru wayia, wala wo. ⁵ Ndamu emu elog n'endi atari, endi ekayia na buu entsing ; nkeni iwo imen eviang, djwi ekavia buu entsing. ⁶ Kansi, ntangu eyipwi mbii, vim ayimen azikiwo mpi iyum, djwa akwonwo nsimbulu. ⁷ Ndamu i nkeni emu elog ne endi atiene : atiene avean dzug mpi egnege vim ayimen, mpi vim awo ikawur mbeam. ⁸ Ndamu i nkeni emu elog ne buu ewuo : ewur mbeam eviang, etsun, epea mbeam osar, osom, mpi nkam n'oshung omog. ⁹ Mbiy yezu s'atubinde : wur eyi n'atii a ngyug ayug. ¹⁰ Ntangu eyinde ndemie, avear wojinga nde ti wa ntumwa inde djum n'ipe, wobana ondjwe djwi na bingana inde. ¹¹ Nde atuba nda wo : opeagniwo gnu diswekamo ekub e Nziam ; kansi djwi n'avear ali ne lien, vi ankum aleleg na bingana, ¹² djwi na wo, wayalir, wayen, kansi wapiyen etey, mpi yug wayug, wayug kansi wapijia, djwa wakwon ntshim itura, mpi masumu iwo ikwon ndolulama. ¹³ Atuba diaka ndawo : opijiagni kingana ene? Otin nge eyajiagnu bingana imu ine inkum? ¹⁴ Wur efugn afugn otuba. ¹⁵ Avear amu wali ne mbug, endi eyi fuywo otuba, ntangu eyiyugwo otuba, mbala emog satana ayia ndima otuba oyalong wo. ¹⁶ Amu, oshin omog, wavia nkeni l' endi atari ; yug watiyug otuba, wayami ntete na kiese; ¹⁷ kansi kakuwo na nsimbulu, wayakwon biu, mpi yug mpay to ngimekama etiyia djwi n'otuba o Nziam, walog na pete enkum. ¹⁸ Avear ayiyami nkeni n'eti atiene, eli avear atsa ngyug otuba, ¹⁹ kansi na wo, wabanza i vi a buu e ntangu ene, mpuy i bimvwama, na ileang leang i vim amu, iledjag otuba o Nziam, mpi otuba kaku mpila esiwurwo mbean le kati ewo. ²⁰ Amu, weyami nkeni le buu ewuo; eli avear aleyug otuba o Nziam, aleyami mpi alewur mbeam, mbeam osar, osom mpi nkam na wur. ²¹ Atuba diaka ndawo: atsawo mveara mwinda djwa na ntsug n'adjiu to ne ngie e ntir? Epa djwa na ntsug n'ondi etsa mpiey tshia? ²² Djwa kaku vim e ngiwum efwetewo nding na ndjia, kaku vim e ngiziy efwetewo mpur. ²³ Yug wur ali n'atii djwi na ngyug, ayug. ²⁴ Atuba diaka ndawo: Yiagni onker na vi aleyug gnu. Ayotesakagniwo na kiteso elesadilignu, mpi ayayikawo ndamu djwi na gnu. ²⁵ Djwa ayapeawo na wur ele na vim; kansi wur emikwon, ayokumawo ata ndamu elinde lawo. ²⁸ Akea ntuba diaka: Eli otshin onkum o Nziam. Yug wur atitwomo nkeni le buu; ²⁷ ata alingivur to ngitien, otshu na mbienkum, nkeni asifwewo ata yug wur efuy apijia. ²⁶ Buu atsawo mpur vim wemie, adjiu nteang mbiy otimi, ne nsuka mbeam ipwi l'otimi; ²⁹ yug ko mbeam ititsun, vear wayilami djwi ntangu e ndima mbeam etikug. ³⁰ Atubinde diaka: na nge esitesa su diaka ekub e Nziam, to asikugsu ontendula na kingana nge? ³¹ Eli kamese nkeni i seneva, ale okiag le wankeni inkum; ³² kansi yug watofuy le buu, apwi, akum onen kuluta bimenina inkum, apur atab anen, mbiy wamfur idzug wafana nkuba ne ngie mpio ende. ³³ Eli ne mbug e wabingana e mpila ene eyalongikinde, n'otshin eyi kugikuwo na ngyug. ³⁴ Atubikinde ndawo na bingana kansi n'oziy, atendulukinde wantumwa inde vi ankum. ³⁵ Eshu wo, epiekuo, Yezu atuba ndeawo: sibagagni simu emu. ³⁶ Ntangu epagninde olwi avear, wovara le war eyi yikinde, ayiwo mpi na viar imu djwi la nde. ³⁷ Opepe onen etomboka, vay ashwe ne war, war ebana na ndzig. ³⁸ Kansi Yezu ayinde ngivur ne dzug i kuse. Wobiya, watuba nande: Nkum opiyen etura mpay l'oshin owasu? ³⁹ Ntangu eyibiynde, angeanga opepe, atuba na nzeyi: yia pwo! tshung odzum! Mpi opepe oshir, vi ankum akea ne mbug. ⁴⁰ Mbiy atuba ndeawo: djwi la nge eyug gnu wom? Otin nge ekwongnu lukwikilu? ⁴¹ Wiankum wayug wom, watuba wog na wog: wur nge eli ata opepe na nzeyi elolemfuki?