¹ Ne nkeam e vun, wankum ankum a wanganga-Nzambi wakutana ondii omog na ansur a dibundu, walong i nsiku ti wankum ankum okin onen evuru e Nzeam. Watshung Yezu nkor ne mbwo ye wakien wa nde. Watsa ompea ne mbwo i Pilato. ² Pilato s'oywinde ndenden : " oli Nkum e Wayuda?" Yezu okeara ndenden : " K'oshin omituba yie enagn." ³ Wankum a wanganga-Nzambi ayiwo watifugn Yezu djwi na vii eshin n'eshin. ⁴ Pilato akea ongywe : " Opikeari mvutu ve? Tolir olwi o vii amofugn wo yie !" ⁵ Kansi Yezu akakeara Pilato ata djwi, yo yina Pilato s'ayitukinde ensign. ⁶ Mvwe inkum, ne konso okina, Pilato apurikinde wur e bolog emog esileang olwi o vear. ⁷ Ne kati e bimpumbulu iyi ne bolog djwi adjag wo wur emuu, ayiwo na wur emog evikiwo Barabas. ⁸ Olwi o vear watsa etay e Pilato ye wabanda nding akii djwi na wo oshin otsande nkie mvwe inkum i nteang. ¹⁰ Pilato avura ndenden: " Olingagni mopuragni Nkum e Wayuda? ⁹ Djwa ajinde wuo ndenden ankum a wanganga-Nzambi watifugn Yezu ko n'etura epwo. ¹¹ Kansi ankum a wanganga-Nzambi akabiwo vear wawigni na Pilato apuri Barabas. ¹² Pilato akeamvey otuba, ndenden : "Oleangagni nkii esing djwi na wur eviegnu Nkum e Wayuda?" ¹³ Wakeandzama wankum : "Kwog nde ne kulunsi!" ¹⁴ Pilato akea ntuba nda wo:"Ipwo nge emikiende?" Kansi vear wakea ndzama na biuu wuwun : " Kwog nde ne kulunsi." ¹⁵ Pilato, djwi na mpea kiese n'olwi o vear anagn, s'apurinde Barabas. Atum vear waber Yezu akoy mpi atum wokwog ne kulunsi. ¹⁶ Ayernkuu wavara Yezu ne tii opeang o nkum ye wavie ayernkuu ankum. ¹⁷ Walwer Yezu eleam, olobo okwi, wakie impu atiene mbiy wolwer n'ote. ¹⁸ Wabanda n'ompea mbea wuwun : " Mbote, Nkum e Wayuda!" ¹⁹ Wakum onag akoy a nkor n'ote, wotwe asuy. Wafukama na nteang ende kesi waling onkumisa. ²⁰ Ntangu emishirwo n'ongywe two, wolima eleam ekwi mpi wokea ondwer ileam inde, mbiy wovara djwi n'onkwog ne kulunsi. ²¹ Wur emog alelegikinde kog, ayum evur, dzin inde Simoni e Sireni (tea e Alexandre ti e Rufus); ayernkuu s'opiwo na biuu penza na mvara kulunsi e Yezu. ²² Ayernkuu wavara yezu n'ondii oviewo Golgota (eling ntuba Endii ebaay ote). ²³ Wopea vinu emitshib wo na mira, kansi Yezu akagnwa ve. ²⁴ Wokwog ne kulunsi ye wakab ileam inde ileang mpe wabug dzeke (to fikofiko) djwi na ndjia ileang ileam nge esivey konso eyernkuu. ²⁵ Akwog wo Yezu ne kulunsi ntangu eyi vuna etikum ne ngonga otatu o nkateang. ²⁶ N'etign ibaya afugn wo itsin i djwi iyodjag wo ngean : "Nkum e Wayuda." ²⁷ Ondii omog na Yezu akwog wo ne kulunsi ankea wumu anen ape, emog ne wear ewuo, emu ne wum ewuo. ²⁸ Oshin onagn, vii ayifugn wo n'enkean s'akug wo : "Otsug wo n'olwong ankea wumu." ²⁹ Vear alelegiki ne mbug wakum ontwe, walegnug ete wuwun :" E, yie wur eling mvwo evuru e Nzeam djwi okeintwung emu ne mbiy e ntshuu isar, ³⁰ vug yiemie mpi kir le kulunsi ! " ³¹ K'oshin onagn mpi, ankum a wanganga-Nzambi ti walong i nsiku wakum ongywe etwo wuwun : "Avugikinde ko vear amu, kansi apikug mvug nde ndemie ve. ³² Nde Mesiya, Nkum e Israel, akirike opean ne kulunsi, siyen wo mpe sidjir." Avear ayikwog wo ne kulunsi wa nde ko wakum ontwe. ³³ Emikug ntangu osambanu, mpib elog ne buu opfugn tii ntangu ko ngunga ovwa. ³⁴ Ne ngunga ovwa onagn, Yezu adzama na otuba obiuu : " Eloi, Eloi, lama sabatani?"eling ntuba "Nzeam eme, Nzeam eme, djwi na nge eminsianga yie?" ³⁵ Avear amuu ayi kog eyi yug vii anagn watuba wuwun : "Liragni, avie Elia." ³⁶ Wur emog ne kati ewo akim, atsa ntsug vay ongign n'inuka, aler n'oshung mpi apea Yezu djwi agnwi. Wur ewo atuba ndenden : "Sitolir yug Elia asiyiande onkira." ³⁷ Mbiy Yezu atsug olie na biuu ye asug egnim. ³⁸ Eleam enen evuru e Nzeam eyay itay ipe yum dzug tii ngie. ³⁹ Komanda ayernkuu eyi ngiyima ne nteang e Yezu mpe eyiyen oshin omisug Yezu egnim atuba ndenden : " Viavi, wur ene ayinde Mon e Nzeam." ⁴⁰ Ayiwo ko n'ankear amuu ayiliriki etey. Ne kati ewo, ayiwo Maria e Magdala, Maria (mea e Yakob ilieng, ti e Yoze) ye mpi Salome. ⁴¹ Ntangu eyiki Yezu ne Galilea, ankear anagn alodjikiwo ye alopiikiwo vim a nda. Olwi ankear amuu atswiwo Yeruzalem wa nde. ⁴² Ntangu emijie vun, oshin oyiwo eshuu etsangirikawo oliu obing (Saba), eling ntuba eshuu eli nteang e Saba, ⁴³ Yozefu e Arimatea, ayia kog. Ayinde wur emog epiiki vear luzitu ensign ne kati ansur a Likita eninen evuru e Nzeam ye mpi eyikwungiki ekub e Nzeam. Na kikesa enkum, atsa ngyen Pilato mpe aling djung i Yezu. ⁴⁴ Pilato ayituka na ndjia ndenden Yezu atiwa, mbiy s'aviinde komanda e ayernkuu ye s'oywinde yug Yezu atiwa. ⁴⁵ Ntangu komanda emokabande ndenden Yezu atiwa, Pilato apea Yozefu mbug e mvey djung i Yezu. ⁴⁶ Yozefu s'ashumnde marikagn, s'aliminde djung i Yezu ne kulunsi, s'odzubnde eleam enagn, mbiy s'atsinde ompfugn n'aluum, atsum nkr ewo n'atari. Mbiy asadzub itari inenen n'itwunu i nkr ewo. ⁴⁷ Maria Magdala ti Maria e mea e Yoze walir ondii oyipfugn wo Yezu.