¹ Eshu e Saba ntangu eyileg wo, Maria Magdala, Maria e mea e Zaki ti Salome washum malasi djwi na nsa nkwe ne djung i Yezu. ² Ne suka suka e eshu elelandi Saba, watsa alum ntangu eyikeam vun. ³ Wakum ntuba wog na wog wuwun : "Nagn esiselima itari ili ne nteang e nkr ?" ⁴ Ntangu esiang wo viy, wayen itari iwo wur emog atokey, atotsug n'iker, ayiwo itari ininen kibeni. ⁵ Washwe le tii e nkr, wayen onkwo omog atigneme ne wum ewuo, atilwer eleam e sii, ye mpi wayen ngituka ensign. ⁶ Onkwo owo s'atubi nda wo ndenden : " Oyayugagni womo ve. Olingagni Yezu e Nazareti, eyikwog wo ne kulunsi. Atifutumuka ! Apa ali nendien ve. Liragni ondii oyotsug wo. ⁷ Kansi gnu, tshwag okabagni walongoki inde na Petelo gnugnun atitsa onkwungagni ne Galilea, asitsagnu ongyen ko mpiug ko oshin oyokabagninde." ⁸ Wapwe ne nkr ye wakim iviang; djwa ayen wo ngituka kibeni ye ayiwo na womo ensign. Wakakaba ata wur ve djwi aleyugikiwo womo. ⁹ Nsuka suka eshuu enteang emposo, eshuu obiing, ne mbiy e lufutumuku ende, apwe nteang na Marie Magdala, eyipurnde mpeve ipwo ishambia ne djung. ¹⁰ S'atshwinde nkab oshong owo na vear ayiki wa nde, walongoki inde ayisatsiga na ntantu mpe ayisaliaka ntangu inkum. ¹¹ Wayug wuwun Yezu ali ne luzingu ye Maria Magdala atoyen, kansi wakadjir ve. ¹² Ne mbiy ewo, Yezu apwe, n'eshin ekiy, na vear ape amuu, aletshwiki wiya emuu. ¹³ Avear anagn watsa mpe wakaba walongoki ayisatsiga, kansi wakadjir ve. ¹⁴ Ne nsuka Yezu apwe ne nteang e walongoki inde djum n'emog ntangu eyiliikiwo. Adzaminde djwi n'oshin ozangiwo lukwikilu mpe oyitshung wo itura iwo, djwi wakaleang ndjir avear ayoyen ne mbiy e lufutumunu ende. ¹⁵ Atuba nda wo ndenden : " Tshwagagni buu opfugn, longagni oshong o wuo na vear ankum. ¹⁶ Wur esikwikila mpe esivey mbotika ayavugnde ye wur epakwikila ayaveynde ndola. ¹⁷ Bidimu ine ayalandakawo vear ayakwikila. Ne dzin ime, ayakemakawo wampeve ipwo. Ayatubakawo etuba empa. ¹⁸ Ayakirakawo ndjwa na mbwo iwo, ye yug watignwa ndikila, ndikila enagn epakie vim ve. Ayayab wo vear a nkeang mbwo, vear a nkeang ayavugakawo. ²⁰ Ntangu emishir ntuba Nkum Yezu nda wo, s'avean nde dzug olung, amitsa gneme ne wum ewuo e Nzeam. ¹⁹ Walongoki watsa ndong itay inkum, ntangu enagn Nkum alekiikinde otshia nda wo djwi na nzegne ne mbug e bidimbu bikumbwa, ndenden otuba olelong wo oli viavi.