¹ Ntshuu ipe isatsugawo ne nteang e feti e Pake ti okina o mampa ipitsumvima ve. Ankum a wanganga-Nzambi ti walongi onkwon alelingikiwo oshin nge ositshung wo Yezu na wagn djwa wodjag. ² Yo yina saletubikiwo wuwun, "Ekwon ngya oshuu okina, djwi vear wakapur oyug." ³ Eshuu emog Yezu ayinde le Betani, l'evuru e Simoni eyi na nkeang e nduum to maba. Ntangu elikinde ne dzug i mesa, onkear omog ayia etay ende n'oleanga omiywo na malasi e isu ensign. Angama oleang owo ye amwang malasi iwo n'ote o Yezu. ⁴ Kansi ne tii e vear ayi kog, ayiwo n'amu ayiyen ipwo mpe ayiyug nkier. Satubikiwo wog na wog, "Djwi na nge epiy nde malasi ine? ⁵ Anakug wo nsar malasi ine ne isu isikug ndenga nkam isar i dinari, mpe nkabula ekr enagn na emva." Ye watomboka mpe wangeanga onkear onagn. ⁶ Kansi Yezu atuba nda wo ngean: " Siangagni nde pwo. Djwi na nge otungisagnu nde ? Antikie djwi imog iwuo. ⁷ Ayayiagnu ntangu enkum na emva ne kati egnu, ye ntangu enkum eliang gnu asikug gnu nkie vi a wuo djwi na wo. Kansi me mpayia ntangu enkum mia gnu ve. ⁸ Atikie eyikugnde nkie : atimwamg djung ime malasi djwi na ngwong djung ime eshu eyampfugniwo n'alum. ⁹ Viavi, ndokabagni, etay enkum eyalong wo oshong owuo ne buu opfugn, ayokanakawo ye mpi ayakeakawo nkab vi amikie onkear one." ¹⁰ Mbiy Yudasi Iskarioti, emog kati e walongoki djum na ipe i Yezu, satshwinde etay ankum a wanganga Nzambi djwi na nsar Yezu. ¹¹ Ntangu emishirwo ngyug vii ande, ankum anagn ayiwo na kiese mpi wokaba wuwun asopeawo ekr. Mbiy s'elingikinde ko oshin o nsar Yezu n'ankum anagn. ¹² Ne eshuu enteang e nkinsi e mampa ipitsumvimba, ntangu eyidjag wo imeme djwi na okina o Pake, walongoki inde woywe ngean: " Ondii nge eling yie sitsungwong djwi yie ole oliu o Pake?" ¹³ Satum nde walongoki ipe mpi atuba nda wo ngean, "Tshwagagni ne via onen, asisangagnu na wur emog alevari iwung i vay. Djiagninde. ¹⁴ Ondii osishwende, djiagninde le tii mpe tubagni na nkea evuru gnugnun ' Long atituba ngean," Ondii osilame okina o Pake ti walongoki ime oli n'onkagn?" ¹⁵ Asolagagninde sambele eninen n'evuru e dzug emibongisande wuo. Wongagni vim ankum mpiug djwi na olio osu o Pake. ¹⁶ Walongoki sapwiwo mpi wakum ne wiya onen; wayen vii ankum ko oshin oyakabinde, ye mpi sawong wo olio o Pake. ¹⁷ Ntangu emibanda ndjie vun, Yezu ayiankum na walongoki inde djum n'ipe. ¹⁸ Ntangu eliikiwo ne dzug i mesa, Yezu atuba ndawo ngean : " Viavi, ntuba ma gnu, emog ne kati egnu ela gna me asinsarnde. ¹⁹ Wakum ngiyngiy kibeni, ye wur na wur sakum nde ongywe, " epa me?" ²⁰ Yezu akeara mpi atuba ndawo ndenden : "Eli emog kati egnu djum n'ipe, emog etsug ntangu opean ewuo n'ilongo imog ndame. ²¹ Djwidjwi Mon-Wur asitsande oshin emifugn wo djwi na nde. Kansi mpay ya wur eyosar. Anayiawo wuo djwi na nde wokwon ongwur. ²² Ntangu eliikiwo, Yezu avey mampa, asampula mpi abag wog. Apea walongoki inde mpi atuba ndenden, " Veyagni wog. Ene eli djung ime." ²³ Mbiy avey mbungu, akeara nsag na viye ya Nzeam, aapea mpi wagnwa wankum. ²⁴ Atuba nda wo : " Ene eli alung ame, alung a ngagn to lutondo, alung asitshag djwi na avear ensign. ²⁵ Viavi, ndokabagni, mpafignwa diaka vinu tii eshuu eyakeame gnwa vinu impa n'ekub e Nzeam." ²⁶ Ntangu emishirwo ntswe lim i Nzeam, watsa n'ombiim o Olive. ²⁷ Yezu atuba ndawo ndenden : "Gnu gnankum ayatag gnu abag djwi na me, djwa wamifugn ngean : 'Ayadjagme wur elir ameme, mbiy ameme ayapagniwo tshaga tshaga.' ²⁸ Kansi ayafutumukame, ayatsame Galile nteang e gnu." ²⁹ Petelo satubi nda nde : " Ata yug avear ankum watolur yie, me mpasosugn yemie ve." ³⁰ Yezu satubinde nda nde ndenden : "Ndokaba yie viavi, otshuu olwo, nkogo na ntovug mbala ipe, asiyiawo ontinsan mbala isar." ³¹ Kansi Petelo ovura ngean : " Ata elomo ngwe ma yie, mposan ve." Wankum ko watuba k'oshin onagn. ³² Wakum ondi oviewo Getsemani ye Yezu atuba nda walongoki inde ndenden : "Sagnemagni nendien, me ndetsu nsama." ³³ Avey Petelo, Zaki ti Yoani djwi na ntsa nda wo. Ye mpi abana ngyug mawa na mpay n'etura ende. ³⁴ Atuba nda wo ndenden : " Nde na ngiy ensign tii ko ewa. Satsugagni nendien ye keamagni viy." ³⁵ Yezu atsa mwa nteang, alog ne buu ye asama Nzeam djwi na nding yug mpila eliko ntangu e mpay ene esikug ndim ne nteang ende. ³⁶ Atuba ndenden : " Abba, Tea, okug nkie vii ankum, kaku ekwon yie nkie ve. Ondimi mbungu e mpay eyi ne nteang eme. Kansi ekwon ngyia oshin oleang me, kansi eyi oshin oleang yie." ³⁷ Akea etay e walongoki inde ye ayia angyen wativur lwong wankum, mpi atuba nda Petelo : " Simoni, otivur lwong? Opikug nkeama viy ata ngunga emog ve? ³⁸ Keamagni viy ye samagni djwi okwon ndogagni ne mpukumuna. Mpeve e wur eli biuu kansi djung inde eli olem. ³⁹ Akea nam nda wo ye akea nsama ko na ngogo oshin omog. ⁴⁰ Akea diaka mpi ayia angyen watikea mvur lwong djwi viy awo ayiwo atilem na lwong. Wakakug omvura ata djwi ve. ⁴¹ Mbala otatu, akea mpi atuba nda wo ndenden : " Olagni kaka ne lwong ye oyoragni? Etishir ! Ntangu etikug. Liragni! Mon-Wur wan watosar ne mbwo i vear a masumu. ⁴² Yimagni, sikienagni. Liragni, wur esinsar ndean atikum pipi. ⁴³ Etean kaku, ko ntangu eyitubikinde, Yudasi, emog e walongoki inde djum n'ipe ayia nkum nda olwi o vear na empien ti mbor ne mbwo. Ankum a wanganga-Nzambi, wamisoniki to walongi i nsiku ti ansur vear ayatum. ⁴⁴ Yudasi, wur eyisar Yezu akabinde vear anagn ndenden : " Wur esipeame bizi to mwaa, ndug enagn. Kiragni nde, vearagni nde wuo." ⁴⁵ Ntangu emikum Yudasi, aveanga mbeama na Yezu ye atuba ngean : " Rabi (Long) !" Mbiy s'opinde mwaa. ⁴⁶ Mbiy sakirwo Yezu na mbwo ye sotshung wo. ⁴⁷ Kansi wur emog ne kati avear ayiyimi kog, apur ompien, anag wur otshia e nkum e wanganga-Nzambi ye obag itii. ⁴⁸ Yezu atuba nda wo ngean : " Nde nkea wumu djwa oyagni ntshung me n'empien ti mbor ? ⁴⁹ Ntshuu inkum ayikime ma gnu mpi alongikime n'evur e Nzeam, okantshungagni ve. Kansi elomiwo esalemi ngwign djwi vii ayifugn wo n'Onkean o Nzeam akug. ⁵⁰ Ye mpi walongoki inde inkum s'ososugn wo ndemie ye s'alurwo. ⁵¹ Mon ompeam omog aledjikinde Yezu, ye ne djung, alwernde ko ifunga ; wotshung kansi ⁵² asafanga ifunga eyidjingnde ne djung mpe akim opwopuu. ⁵³ Wavara Yezu etay e nkum enen e wanganga-Nzambi. Mpiug, wankum inkum i wanganga-Nzambi, antsuru a dibundu ti wansoniki to walong i nsiku ayiwo watikutana. ⁵⁴ Petelo alesedjikinde Yezu mwa etey tii ko ntangu eyishwiwo n'opeang o nkum enen e wanganga-Nzambi. Asagneme kog ondii omog nda vear otshia ayiyoriki tshia. ⁵⁵ Ankum a wanganga-Nzambi ti vear ankum ayishwi ne likita enagn alelingikiwo ko djwi isikug wo mbeam Yezu djwa wodjag. Kansi wakavea djwi ve. ⁵⁶ Mpamba ve vear entsign alefugnikiwo Yezu na vii a oyang, kansi vii a vear awo akayiaka ne mbug emog ve. ⁵⁷ Vear amu wayima djwi n'omfugn na djwi oyang, watuba ngean, ⁵⁸ "Oyugsu atuba ndenden 'Ayabvwome evuru e Nzeam ene eyitwung wo na mbwo i vear, ye ne ntshuu isar ayatwungme evuru e Nzeam ekiy epayatwung wo na mbwo i vear. ⁵⁹ Kansi ata ne djwi ine otuba o vear awo okatsaka na mbug emog ve. ⁶⁰ Nkum enen e wanganga-Nzambi ayima ne kati e vear ankum, aywe Yezu ndenden : "Kaku yie ata na mvutu? Vii nge vear ane ofugn wo yie?" ⁶¹ Kansi Yezu ayia ko pwo, ye akakeara ata djwi ve. Nkum enen e wanganga-Nzambi akea ongywe mpi atuba ndenden, "Oli Kristu, mon e Nzeam etsasu nkumisa?" ⁶² Yezu s'akearinde ndenden, "Eli mug. Mpi ayayen gnu Mon-Wur ntangu eyagnemende n'ewuo ompeam e ekub e Nzeam ye ntangu eyayiande ne kati e mafuba i dzug." ⁶³ Nkum enen e wanganga-Nzambi s'ayarinde ileam inde ndenden "Djwi na nge elingsu diaka watemwe? ⁶⁴ Otiyugagni oshin omitwende Nzeam. Obansagni nge? Wankum wakeara wuwun elomo wodjag. ⁶⁵ Amu wabana n'ontwomo asuy ti n'ondzub ileam ne viy, n'onag mbata ye mpi na ntuba wowon : "Profeta, tuba : wur nagn emodjag?" Vear otshia wovey ye wodjag ensign. ⁶⁶ Ntangu eyi Petelo ko le tii opeang etay e ngie, onkear omog, wur otshia e nkum e wanganga-Nzambi ayia. ⁶⁷ Ntangu emiyen nde Petelo ayor tshia, apwong ondir wuo mpi atuba ndenden : " Yie ko ayikiyie ya wur e Nazareti, Yezu." ⁶⁸ Kansi Petelo asaan, ndenden : " Mpijia ve ye mpijia ko itsin i djwi iling yie ntuba." Mbiy s'apwinde le lien opeang. Nkog ko avug. ⁶⁹ Kansi ntangu onkear otshia onagn emikeande ongyen, akea nkaba avear ayi kog,ndenden : " Wur ene ali nda wo ! " ⁷⁰ Kansi Petelo akea nsaan. Etean kaku, vear ayi kog watuba wa Petelo wuwun : " Viavi, oli ya vear anagn, djwi yie oli wur e Galilea." ⁷¹ Kansi Petelo s'eyantikinde na nsila na biuu ndenden : " Mpijia wur ewo etubagnu ve." ⁷² Nkog avug mbala ozole. Petelo akea nkana djwi iyitubi Yezu nda nde ndenden : " Nteang nkog na mvug mbala ozole, yie asinsaan yie mbala isar." Mpi akum ndiye ensign penza.