¹ Ntangu emipwe Yezu n'evur e Nzeam, longoki ende emog okaba ngean: "Long, lir intieng i mvuru na intieng atari ane". ² Yezu akeara ngean: "Oyen mvuru inen inen ine? Kaku itari imog iyasatsiga ne dzug itari imu, inkum ayalogwo". ³ Ntangu egnemi Yezu n'ombim o Olive, ne nteang evur e Nzeam, Petelo, Zaki, Yoani na Andele s'atsiwo ngywe Yezu n'oziy wuwun : ⁴ "Osekabi, ntangu nge vi ane ayasalamawo? Kidimbu nge eyasekaba nde vi awo ali pembeni na nsalama?" ⁵ Yezu s'abaninde n'ankaba ndenden : " Kebagni wur akodjimagni. ⁶ Avear ensign ayayiawo ne dzin i me mpi ayatubakawo wuwun 'me nde Yezu' ye mpi ayadjim wo avear ensign. ⁷ Ntangu eyayug gnu watuba vi a mbeagn ti vi oshuru o mbeagn, oyayenagni mpay, vi ane afwete nsalama, kansi nsuka ewo etokum ntete ve. ⁸ Djwi buu emuu ayalwawo na buu emuu, ekub emuu ayalwawo na ekub emuu. Buu ayagnugwo n'endii ensign, mpi nziya ayayiawo. Ine inkum ayayiawo luyantiku to itsin i mpay. ⁹ Kebagni. Ayofugnagniwo ne tibinali, ayonagakagniwo akoy ne mvuru i Nzeam. Ayosamakagniwo ne nteang ankum a buu ti ne nteang e wa ntinu (erwa) djwi na me, djwi esayia ntiegni djwi na wo. ¹⁰ Kansi vim enteang efwete ngyia ndong oshong owuo ne buu opfugn. ¹¹ Yug watotshungagni mpe wosamisagni ne tibinar, oyayenagni mpay ve djwi na vii asikug gnu ntuba. Djwi ne ntangu enai, vii ankum asifwetegnu ntuba, asopeagniwo; epa gnu vear asituba ve, kansi Mpeve Santu. ¹² Avear ayafugnakawo atwung awo djwa wapii ndola ewa, ye atea ayafugnakawo aman awo. Aman ayatombokakawo n'atea ti amea awo mpi ayafugnakawo djwa waadjag. ¹³ Avear ankum ayotunagniwo djwi na me. Kansi wur eyatsug inagn ti nsuka ayavugnde. ¹⁴ Ntangu eyayen gnu mpay etishwe n'endi epikug wo ngyia ve ( seanga wur etanga ayi na ngindu inde), vear ankum ayayia ne Yudea ayakim wo n'ombim, ¹⁵ wur eyayia ne dzug otwon akwon nkr l'evur, to djwi na mvey vim le lien; ¹⁶ ye wur enkum eyayia n'evur to diya akwon nkea mbiy djwi na mvey eleam ende. ¹⁷ Kansi ngey ya ankear ayayia na djim ti ayapeaka aman aviyo ne ntshuu inagn! ¹⁸ Samagni Nzeam djwi vii ane akwon ndog ne nsungi e mpio. ¹⁹ Djwa ne ntshuu inagn, mpay ayayiawo ensign, mpay etotigniwo ngyen yum luyantiku, ntangu ekii Nzeam buu, tii luo, oshin ompay inagn epafikea. ²⁰ Tuba ko yug Nkum ndemie amifyotuna ntshuu iwo, kaku wur eyavug ve, kansi djwi n'avear ande amison nde, ayafyotunande ntalu e ntshuu inagn. ²¹ Mbiy yug wur emog amokabagni ndenden, 'Liragni, Kristu ndean!' to 'Liragni Kristu nde ndwign!', oyadjiragni ve. ²² Djwi wa Kristu oyang ti wangunsa to waprofeta oyang ayapwewo mpi ayakiewo bidimbu ti makamwisi isikug ndjim ata vear ayison Nzeam. ²³ Osugagni! Mean ntokabagni vii ane ankum nteang. ²⁴ Kansi ne mbiy i mpay i ntshuu iwo inagn, vun ayakum wo mpib, ngwon epafipiey ve, ²⁵ vier ayalog wo yum dzug, biuu inkum ili le dzug ayagnug wo. ²⁶ Mbiy avear ayayen wo Mon-Wur aleye ne mafuba na biuu enen ti na nkembo. ²⁷ Mbiy ayatumnde banzio inde mpi ayatshib nde ondii omog avear amison nde ne akuu ankea aney a buu, yum nsuka okiri ti nsuka e dzug. ²⁸ Kanagni ilong ipea vear oshung o figi. Yug etab etilieng to atilem ye mpi emikea mpur nkay, jiagni gnugnun elug e mvwe eli pembeni. ²⁹ Oshin omog, ntangu eyayen gnu vim ankum ane atikug, jiagni gnugnun Mon-Wur ativanga, ali n'epfug. ³⁰ Viavi, ndokabagni, vear azinga opean wapashir ngwa ve ntangu eyapwe vii anagn. ³¹ Olung ti buu ayalengawo, kansi otuba ome opayalenga ve. ³² Kansi djwi n'eshuu to ntangu ewo, kaku wur ejia ve, ata banzio ne dzug, ata Mon, ko Tea ndemie wur ejia. ³³ Osugagni! Oyavuragni lwong ve, djwi opijiagni ntangu eyasalama vii awo. ³⁴ Ayayiawo oshin omog ti wur eyitsu wia emu: asasugn evuru ende, asasugn evuru n'avear ande otshia, asapea wur na wur otshia onde. Ye mpi asakaba sentre asalir evuru wuo. ³⁵ Yo yina osugagni! Djwa opijiagni ntangu esikea nkea evuru, mi ntangu ekuwo, mi ne ngia otshuu, mi ne nkog enteang mi ne nkateang to ne suka. ³⁶ Yug amiyia ne kintulumukini, osugagni akayia ongyenagni otivuragni lwong. ³⁷ Vii okabagnime ane, ndakaba na wur enkum : Osugagni, kebagni !