¹ Mbiy, Yezu abana ntuba na wo na bingani. Wur emog akinde evur e vinu. Ajingnde evur ewo n'opeang, atsum ipug i nkamula vinu, mpi atwung evur etey djwi na ndiraka evur. ² Ne ntangu e ndima vinu, atum nsadi emog etay avear ayifugn vinu, djwi wopi ikab i vinu. ³ Wokir, wodjag, mpi wokeara kongign. ⁴ Akea ntum nsadi emu etay ewo; wonag mbor n'ote mpi wotwe. ⁵ Ankea ntum nsadi otatu, wodjag mpi, otshin omog n'avear ankum a mbiy ayitumnde, wanag mbor mpi waladjag. ⁶ Atum diaka mon nde e nsia; otum kesi wur e nsuka mpi atuba ngean : Asiyiawo na luzitu djwi na mon me. ⁷ Kansi avear otshia a vinu watuba wog na wog: "Yenagni wur eyasatsuga na oleamanzo ndean. Yagagni s'odjagagni djwi olamanzo esatsuga esusu. ⁸ S'okirwo, wodjag, wotwomo ne lien n'ikir evur. ⁹ Ntangu ene, nkea evur asikiende esing? Asiyiande ye asidjagnde vear otshia anagn ankum, asipeande evur e vinu na vear amu. ¹⁰ Ototangagni otuba one o masonam: Itari iyifangi vear atwung mvur itikum itari ikir ikuu evur ; ¹¹ eli luzolo e Nzeam yug itari iwo itikum nkir ikuu evur ; mpi epa eli kidimbu kikumbwa djwi la su ? ¹² Alingikiwo n'ontshung, kansi alurikiwo olwi o vear anagn. Ajiwo wuwun Yezu atubinde itsig inagn djwi la wo. Mbiy s'osawosugn ye s'akien wo. ¹³ S'atum wo wafarize imuu ti vear a Erodi etay e Yezu djwi djwi wopigi ilung n'otuba onde ndemie. ¹⁴ Wayia ntuba wande wuwun : "Nkum, sijia susun oli Nzeam edjwidjwi, ye opitsindur otuba ovear djwi opitsu ndir oshin oli wur le lien, ye atsandong yie mbug e Nzeam e viavi. Ne nsiku, eli wuo to epwo na mbie mpaku na Sezar? Elomo sifuti to sikwon mfuta? ¹⁵ Kansi Yezu, eyijiki oyang owo, s'akearinde ngean : "Djwi na nge endobgnu me odzum?Onjiagni ikutu imog ntolir. ¹⁶ Wajie Yezu ikutu imog. Mbiy Yezu aywe vear awo ngean : "Elung ti vi amifugn wo le ti ekr ene eli e nagni?" Wakeara wuwun, "eli e Sezar". ¹⁷ Yezu s'atubinde ndenden, "Peagni ya Sezar vim a Sezar, ya Nzeam vim a Nzeam". S'ayen wo ko ngituka djwi la Yezu. ¹⁸ Mbiy wa Saduse etsantuba wuwun lufutumuku kakuwo, wayia etay e Yezu ye woywe ngean: ¹⁹ " Long, yen vi ayifugn Moize djwi na su: Yug otwung ompeam o wur atiwa mpi atitsakiy wear ye mpi akawur aman, wur enagn afwete ntsavey onkear onagn mpi asawur aman djwi na otwung nde omiwa. ²⁰ Ayiwo atwung ampeam ashambia. Mon ompeam onteang atsug wear, awa ye akasasugn ata mon emog. ²¹ Mon ozole asakr nsakwi ye awa nkatu na nsakiy mon. Otatu k'oshin omog. ²² Ye wankea ashambia kaku ata emog eyisasugn mon. Ne mbiy ewo onkear onagn ko asawa. ²³ Ne ntangu e lufutumuku, onkear onagn ayayiande wear e nign ? Djwa ayinde wear e wankea ashambia." ²⁴ Yezu akeara ngean : "Epa eli kikuma elejing gnu, djwa opijiagni ata vii ayifugn wo n'onkean o Nzeam ata biuu o Nzeam ? ²⁵ Djwa ntangu eyafutumuka avear l'ewa, ampeam wapayakea ntsug ankear, ankear ko wapayakea ntsug awum, kansi vear ayayiawo kesi wanzio le dzug. ²⁶ Kansi djwi na lufutumuku l'ewa, okatangagni n'onkean o Moize, vii ayokabi Nzeam djwi la oshung omvu oyipieyiki tshia : ' Nde Nzeam e Abraham, Nzeam e Izaki ye Nzeam e Yakobi ' ? ²⁷ Nzeam apa ali Nzeam e vear amiwa, kansi e vear ali ne luzingu. Omijingagni vii kibeni." ²⁸ Musoniki emog eyiyugiki asulu awo ayia ; ajinde ndenden Yezu atakeara mvutu i wuo. Aywe Yezu ngean, " Nsiku nge emilega onen ne kati e nsiku inkum?" ²⁹ Yezu akeara ndindin, "Onkwon onen kuluta oli, ' Yug, Israel, Nzeam, Nkum esu, ali Nkum k'emog. ³⁰ Ofwete ndeang Nkum, Nzeam eyie, n'etura eyie enkum, ne moyo eyie enkum ti na biu oyie onkum.' ³¹ Onkwon ozole oli one, 'Ofwete ndeang nkweno eyie kesi yie yemie.' Kaku nsiku imu ilenga ine n'onen. ³² Musoniki akeara Yezu ngean, "Eli wuo, Longi ! Otituba viavi yiyen Nzeam ali k'emog, kaku Nzeam emu ikiy. ³³ Ndeang Nzeam n'etura enkum, na ngindu inkum ti na biu onkum, ye ndeang nkweno kesi yie yemie eli onen kuluta gnam itsambwowo le tshia ti bimenga inkum itsawo ntamina na Nzeam. ³⁴ Ntangu eyen Yezu ndenden atikeara na wagn, atuba nda nde ngean, "Epa oli etey na ekub e Nzeam." Ne mbiy ewo, kaku ata wur eyifoywe djwi. ³⁵ Yezu, ntangu elongikinde n'evur e Nzeam, atubinde ngean, " Oshin nge basoniki atubikiwo wuwun Kristu ali mon e Davidi ? ³⁶ Davidi ndemie, ntangu emiywende na mpeve, atubinde ndenden, ' Nkum atituba nda Nkum eme, gneme ne wum eme ewuo tii kuna eyatsugme wambeni iyie ne ngie iyie i nku.' ³⁷ Davidi ndemie avie Kristu Nkum, oshin onkagn Kristu asifiyiande mon nde ?" Olwi avear s'ayikiwo ndama Yezu na kiese. ³⁸ Yezu n'along ande aletubikinde nda wo ngean, "Kebagni na basoniki, wamileang nkien ko n'entwum iteytey ye n'endi e vear ensign waleang vear wapi mbote ; ³⁹ mpi n'evur e Nzeam waleang gneme ku ne nkway inteang ye n'okina to oliu, waleang k' indi inteang. ⁴⁰ Walekumi mvur i wansakwi, ye waleki bisamu iteytey djwi vear wayen. Vear anagn ayavey wo ndola eninen." ⁴¹ Mbiy Yezu s'egneminde ne nteang esag epeawo makabu l'evur e Nzeam, s'alirikinde oshin oletsug vear makabu. Ankea ekr s'etsugikiwo olwo ekr n'esag. ⁴² Mbiy nsakwi emog, omva onkear, ayia ntwomo akutu ape. ⁴³ Mbiy Yezu s'avinde walongoki inde mpi atuba ndawo ngean : " Mokabagni viavi, omva o nsakwi one atipea makabu kuluta vear ankum amitsug ekr n'esag ene. ⁴⁴ Djwa amu ane ankum watipea ekr eli kakuwo na mfunu. Kansi nsakwi ene, n'omva onde, atipea ekr ende enkum eyinde na wo djwa na luzingu ende.