¹ Sady lafa njan'i Sanbala fa nananga gny manda rahay, la nirehitsy tao agnatiny izay, sady nisafoaky gny hatezera ie ka nanamavo gny Jiosy. ² Hoy ie teo agnatrehan'ireo rahalahiny noho gny tafik'i Samaria: " Fa ino toy ataon'ireo Jiosy kanosa reo? Hampimpoly gny tana ho an-drozy vasa rozy? Hanolotsy soro vasa rozy? Ho vitan-drozy ao agnatin'ny raiky andro vasa gny asa? Hamelo reo vato bakamin'ireo korontam-bato fa nioroa ndraiky vasa rozy? ³ Tobia Amonita la nisondry taminy, sady hoy ie hoe: " Laha mba nisy amboahaolo mantsy niakatsy teo amin'izay atsangan-drozy, la handrava gny manda vaton-drozy izay!" ⁴ Njanjigno, Ndranagnaharinay, fa vaorabiraby rahay. Ampolio amin'ny lohan-drozy avao gny fivolagnan-dratin-drozy sady engao rozy ho babo agny amin'ny tany zay higadran-drozy. ⁵ Ka mamory gny helokin-drozy sady ka mamafa gny fahotany tsy ho eo agnatrehanao, fa nihantsy rozy. ⁶ Ka natsanganay gny manda sady nifandray teo amin'ny hatsasaky gny hahabony gny manda iaby fotony nanam-agniria gny hiasa reo olo. ⁷ Fa lafa njan'i Sanbala, Tobia, reo Arabo, reo Amonita, sady Asdodita fa nandroso gny asa fagnamboara gny mandan'i Jerosalema, sady fa hikato reo toera vaky teo amin'ny manda, la nirehin-katezera bevata tao agnatin-drozy. ⁸ Niara-nikonokono iaby rozy , sady avy hialy tamin'i Jerosalema ka nahatonga savorovoro tao amin'izay. ⁹ Fa nivavaky tamin'ny Ndranagnaharinay rahay sady nametraky mpiamby hiaro amin-drozy andro aman'aly nohon'ny fampitahoran-drozy. ¹⁰ La hoy reo vahoakan'i Joda hoe: " Mihalefy gny herin'ireo zay milanja enta-mavesatsy. Maro mare reo korontam-bato, sady tsy afaky mampimpoly mananga gny manda rahay." ¹¹ Hoy reo fahavalonay hoe: " Tsy hahay na hahita rozy ambara-pahavianay eo amin-drozy ka hamono an-drozy, sady hampiegny gny asa." ¹² Tamin'izay fotoa izay la avy bakagny amin'ny lala iaby reo Jiosy zay nipetraky teo agnilan-drozy sady nisafa impolo tagnaminay, nampitandry gnanay gny amin'ny tetiky zay ataon-drozy agnaminay. ¹³ Ka nametraky olo tagny amin'ny faritsy iva mare amin'ny manda tegny amin'ny toera miharihary zaho. Nametraky gny fianakaviany kiraidraiky nisondry tamin'ny sabany, gny lefony, noho gny tsipikany aby zaho. ¹⁴ La nijilo zaho, sady nitsanga, ka hoy zaho tamin'ireo olo agnabo, noho tamin'ireo mpanapaky, sady tamin'ny vahoaky sisa hoe: " Ka matahotsy an-drozy. Tiarovo gny Tompo, zay bevata sady mahagaga. Mialia ho gnan'ny fianakavianareo, gny anakareo lahy noho gny anakareo ampela, gny valinareo, sady gny avorohotanareo." ¹⁵ Sady lafa njan'ireo fahavalonay fa hainay gny paik'adin-drozy, noho nasavorovoroan-Dranagnahary gny paik'adiny, la nimpoly teo amin'ny manda rahay iaby, samby tamin'ny asany aby. ¹⁶ Ka nanomboky tamin'izay fotoa izay la niasa ho gnan'ny fanangana gny manda fotsiny gny antsasak'ireo mpanompoko, sady gny antsasany nitanjaky lefo, ampinga, tsipika, noho nanao akanjo fiarova, laha nitsanga bakao afaran'ireo vahoakan'i Joda iaby koa reo mpitariky. ¹⁷ Niamby gny fipetraran-drozy avao koa reo mpiasa zay nananga gny manda noho nilanja gny enta-mavesatsy. Niasa tamin'ny tana raiky aby gny olo iaby, sady tamin'ny tana ilany ro nitanan-drozy gny fialiany. ¹⁸ Gny mpananga iaby la nanao gny sabany teo agnilany sady manahaky izay ro niasany. Gny raiky zay nampagneno gny trompetra la nijano teo agnilako. ¹⁹ La hoy zaho tamin'ireo olo agnabo noho reo manam-boninahitsy sady tamin'ireo vahoaky sisa hoe: " Goava sady mihitatsy gny asa, sady misaratsaraky tsika eto agnabon'ny manda, mifanalavitsy. ²⁰ Ao hiazakazaky ho eo amin'ny toera aharezanareo gny feon-tropetra nareo sady hivory eo. Hialy ho antsika gny Ndranagnaharintsika." ²¹ Koa nataonay gny asa. Gny antsasakin-drozy nitanjaky lefo nanomboky baka amy maraindray be ka hatramin'ny fipoiran'ny Kintana. ²² Hoy avao koa zaho tamin'ireo olo tamin'izay fotoa izay hoe: " Ao gny olo iaby noho gny mpanompony handay gny haliky eo agnivon'i Jerosalema, mba ho mpiamby antsika mandritra gny haliky rozy sady ho mpiasa amin'ny andro." ²³ Koa na zaho, na reo rahalahiko, na reo mpanompoko, na reo joharin'ny mpiamby zay nagnaraky gnahy, la tsy mba nisy nisolo akanjo rahay, sady nitanjaky fialia gny kiraidraiky taminay, na la handeha hangalaky rano aza.