¹ Sady la namaly Joba ka nivola hoe: ² " Haiko marina fa io tokoa ri ie. Fa akory ro ahafahan'ny olo raiky ho marina amin-Dranagnahary? ³ Laha te hialy hevitsy amin-Dranagnahary ie, tsy afaky hamaly Gnazy ndraiky mandeha amin'ny tsioky ie. ⁴ Ndranagnahary la hendry am-po sady matanjaky amin'ny heriny; ia ro fa nagnamafy gny vatany hanohitsy Gnazy ka nahomby? __ ⁵ Ie zay mamindra gny tendrombohitsy ka tsy mampitandry na ia ia lafa mamadiky reo amin'ny fahatezerany Ie_- ⁶ Ie zay magnozongozo gny tany hiala eo amin'ny toerany sady mampihovitsovitsy gny andriny. ⁷ Io Ndranagnahary io avao ro mivola gny masoandro tsy hiposky , sady tsy miposaky io, sady zay magnaro reo kinta, ⁸ zay Ie vatana ro mamelatsy gny lagnitsy sady manisihosy gny onjan-dranomasina, ⁹ zay manao gny Bera, Telonohorefy, Ikotokelimiadilaona, sady reo kintana agny Antimo. ¹⁰ Io Ndranagnahary io avao ro manao raha bevata, raha tsy takatsy gny say__ raha mahatseriky tsy hita isa. ¹¹ Ingo, mandeha eto agnilako Ie, nefa tsy hitako ; mandalo avao koa Ie, nefa tsy haiko. ¹² Laha manaisotsa raha Ie , ia ro hahasaka Gnazy? Ia ro afaky hivola aminy hoe:" Ino ataonao toy?" ¹³ Ndranagnahary tsy hangalaky gny fahatezerany; reo mpagnampy an-dRahaba aza miondriky eo ambaniny. ¹⁴ Ka vo maika fa akory ro hahafahako mamaly gnazy, hahafahako mifily safa halahatsy aminy? ¹⁵ Ndra la marina aza aho , la tsy afaky gny hamaly gnazy; mitalaho famindram-po amin'ny mpitsarako avao ro azako atao. ¹⁶ Ndra la nikaiky aza aho sady namaly gnahy Ie, tsy nino aho hoe hijanjy gny feoko Ie. ¹⁷ Fotony mandrava gnahy amin'ny tafio-drivotsy sady magnamora gny feriko amin'ny tsy misy antony Ie. ¹⁸ Tsy mamela gnahy hiay akory Ie; fa koa, fenoany raha mafaitsy aho. ¹⁹ Laha resakytanjaky , ingo!, mahery Ie! Laha resaky fitsara ia ro afaky hampikaiky Gnazy? ²⁰ Ndra la amin'ny marina aza aho, gny vavako avao ro hiampanga gnahy; sady ndra la tsy manan-tsiny aza aho, reo safako hagnaporofo gnahy fa meloky aho. ²¹ Tsy manan-tsiny aho, kanefa tsy rarahiako sasy gny momba gny vatako; ataoko tsinontsino gny fiaignako. ²² Tsy magnova raha io, ka io ro ivolagnako hoe haringany miaraky gny olo tsy misy tsiny voho olo raty fagnahy. ²³ Laha hamono tampoky gny areti-mandringana, la hihehy gny amin'ny fahorian'ny olo tsy manan-tsiny Ie. ²⁴ Namea teo an-tagnan'ny olo raty fagnahy gny tany; Ndranagnahary magnaro reo tarehin'ny mpitsara io. Fa laha rst Ie ro manao gnan'io, la ia ? ²⁵ Gny androko la malaky mandeha noho gny mpanday hafatsy milailay; gny androko la miely; ka tsy misy soa hitan'ireo aia aia. ²⁶ Malaky mandeha manahaky gny lakan-jororo regny, sady malaky mandeha manahaky gny voromahery mipaoky gny hazany. ²⁷ Laha nivola aho hoe hagnaligno reo fitaragnaiko aho, hangalaky gny endriky malahelo aho ka hazoto, ²⁸ la hatahotsy gny alaheloko fa tsy hihevitsy gnahy ho tsy manan-tsiny Iha. ²⁹ Ho melohina aho; ka nagnino zany aho ro tokony hiezaky tsy amin'ny antony? ³⁰ Laha manasa gny vatako tamin'ny ranon'oram-panala aho sady nanao gny tagnako malio tsy nisy manahaky gnan'io, ³¹ la handroboky gnahy agny an-kaly Ndranagnahary, sady gny ankanjoko la ho rikoriko gny amiko. ³² Fa tsy olo manahaky gnahy Ndranagnahary, ka afaky hamaly Gnazy aho, ka hiaraky avy eo amin'ny fitsara rahay. ³³ Tsy misy mpitsara eo agnelagnelany mba hametraky gny tagnany aminay roe. ³⁴ Tsy misy mpitsara hafa afaky mangalaky gny tsorakazon-Dranagnahary amiko, zay afaky mitanjaky gny horohorony tsy hampatahotsy gnahy. ³⁵ La hivola mare aho sady tsy hatahotsy Gnazy. Kanefa amin'izao raha misy zao, la tsy afaky hanao gnan'io aho.