¹ La namaly Elifaza zay Temanita ka nanao hoe:" ² Laha misy olo magnandra miresaky aminao, la tsy haharitsy va iha? Nefa ia ro afaky handrara gny vatany tsy hivola? ³ Ingo, maro reo fa nampiararinao; fa nampatanjaky gny tagna malemy iha. ⁴ Nitanjaky zay nilavo reo safanao; fa nohamafisanao gny malemy lohaliky. ⁵ Kanefa zao aavy aminao gny fahoria, sady ketraky iha; mikasiky gnanao io, sady ory iha. ⁶ Moa tsy gny fahatahoranao ro tokinao, sady gny fahitian'ny lalanao ro fanantenanao? ⁷ Mba saigno laha zao" ia ro fa ringa tsy nanan-tsiny? Na mbia reo olo-marina ro nopotehy? ⁸ Araky zay fa hitako, reo zay mambolu heloky voho mamafy olana ro mijinja gnan'io. ⁹ Amin'ny alan'ny fofongnain-Dranagnahary ro haharinga gnan-drozy; amin'ny fipoahan'ny hatezerany ro hahalevo gnan-drozy. ¹⁰ Gny fieron'ny liona, gny feon'ny liona masiaky, reo hin'ny liona tanora__potika reo. ¹¹ Ringa gny liona antitsy nohon'ny tsy fahampian'ireo haza, reo anaky gny liona vavy la mipearity egny rehetra egny. ¹² Nisy raharaha nandesy naminga teto amiko, sady nahare bitsiy maomba gnan'io gny sofiko. ¹³ La nisy eritreritsy avy bakamin'ny fahita amin'ny haly, lafa tafalatsaky tamin'ny olo gny torimaso laliky. ¹⁴ Tagnaty haly ro niavian'ny tahotsy voho horohorotamiko, sady nangovitsy gny taolako iaby. ¹⁵ Sady nisy fagnahy nandalo teo agnatrehan'ny tarehiko, sady nitsanga gny volo tamin'ny vatako. ¹⁶ Nijano gny fagnahy, fa zao tsy nety voafaritso gny endriny. Endriky raiky ro teo agnatrehan'ny masoko; nisy fahangina, sady nahare feo aho nanao hoe: ¹⁷ " Afaky gny ho marina kokoa noho Ndranagnahary va gny olo mety maty? Afaky gny halio noho gny Mpamoro gnazy va gny olo raiky? ¹⁸ Ingo,laha tsy mametraky fatokisa amin'ireo mpanompony Ndranagnahary; laha miampanga reo anjeliny nohon'ny fahadala Ie, ¹⁹ hatraia gny fahamarignan'ireo zay mipetraky agnaty tragno vita amin'ny tanimanga, zay ao amin'ny vovoky gny fototsy ioregnany, zay poiky mialohan'ny kalalao? ²⁰ Potehy eo agnelagnelan'ny maray voho hariva rozy; ringa mandrakizay tsy misy mahatsikaritsy zao rozy. ²¹ Tsy voaongotsy tamin-drozy va gny tadin-dain-drozy? Maty rozy; maty tsy misy fahendrea rozy.