¹ La namaly i Zofara gny Namatita sady nivola hoe: ² " Reo eritreritiko ro mahavy gnahy hamaly malaky nohon'ny fitaintaigna zay ao agnatiko. ³ Mahare safa mare zay mangalaky baraka gnahy zaho, nefa misy fagnahy bakamin'ny fahazavan-tsaiko mamaly gnahy. ⁴ Tsy hainao va zao raha-misy zao hatramin'ny andro taloha, laha nametraky gny olombelo teto an-tany Ndranagnahary: ⁵ gny fandresen'ny olo raty fagnahy la boribory, sady gny hafalian'ny mpaniratsira la maharitsy fotoa fohy avao? ⁶ Na la mahatakatsy gny lagnitsy aza gny haabony, sady manganiky gny rahona gny lohany, ⁷ la mbo ho rava manahaky gny malotony gny olo manahaky izay; reo zay nahita gnazy la hivola hoe: ' Aia ie?' ⁸ Hatily manahaky gny nofy ie sady tsy ho hita; egny tokoa, ho enjehy manahaky gny fahita amin'ny haly ie. ⁹ Gny maso zay nahita gnazy la tsy hahita gnazy sasy; gny toerany la tsy hahita gnazy sasy. ¹⁰ Hiala tsiny amin'ny olo mahantra reo anany; tsy maintsy hampimpoly gny hanagna azony gny tagnany. ¹¹ Reo taolany la feno gny tanjaka gny fahatanora, nefa handry miaraky aminy agnaty vovoky izay. ¹² Na la mamy ao am-bavany aza gny faharatia, na la magnetaky izay ao ambanin'ny lelany aza ie, ¹³ na la mitanjaky izay ao sady tsy magnenga izay handeha fa mbo mitanjaky izay soa ao am-bavany avao aza ie__ ¹⁴ la mivaliky mangily gny sakafo ao agnaty tsinainy, zary poizy bakamin'ny bibilava ao agnaty izay. ¹⁵ Mitely hanagna ie, nefa handoa izay ndraiky; haboakin-Dranagnahary bakao amin'ny kibony izay. ¹⁶ Hitsetsiky gny poizin'ny bibilava ie; hamono gnazy gny lelan'ny menarana. ¹⁷ Tsy hankafy reo renirano, reo riakin'ny tantely voho ero-dronono ie. ¹⁸ Hampimpoly gny vokatsy zay nisasarany ie sady tsy afaky gny hinana izay; tsy afaky gny hankafy gny hanagna azony tamin'ny varony ie. ¹⁹ Fotony ie nampijaly voho mahantra; nangalaky an-keriny reo tragno zay tsy naoriny ie. ²⁰ Fotony ie tsy nahalala fahafaham-po tamin'ny vatany, la tsy afaky gny hahavonjy gny raha iaby zay nagnagny fahafinareta ie. ²¹ Tsy misy zay tavela ka tsy naravany; noho izay la manam-petra avao gny fahombiazany. ²² Hilatsaky agnaty fijalia amin'ny fahabetrahan'ny hanagna ie; gny tagnan'ny kiraidraiky zay ao agnaty fahantra la ho avy hanohitsy gnazy. ²³ Lafa hameno gny kibony ie, la hatorakin-Dranagnahary aminy gny firehetan'ny fahatezerany; handrotsaky izay eo aminy Ndranagnahary lafa eo am-pihinana ie. ²⁴ Na la hiboaky gny fitaovam-pialia vy aza izay johary izay, la hahavoa gnazy gny tsipika saba. ²⁵ Hanindroa bakao an-dambosiny gny lefo sady ho tafaboahy; sady hiboaky nbakao amin'ny atiny tokoa gny tendrony manjelanjelatsy; ho avy eo aminy gny horohoro. ²⁶ Aizin-kitroky tanteraky ro miamby gny hanagna; sady bolo tsy nitsofiny ro handoro gnazy; handrava zay sisa tavela ao agnatin'ny lainy izay. ²⁷ Hagnambara gny helony gny lagnitsy, sady hijoro vavolombelo hanohitsy gnazy gny tany. ²⁸ Hiparitaky gny hanagna ao an-tragnony; hikoria hiala aminy amin'ny andron'ny fahatezeran-Dranagnahary reo fanagnahany. ²⁹ Izay ro anjaran'ny olo raty fagnahy baka amin-Dranagnahary, gny lova voatoka ho gnazy baka amin-Dranagnahary."