¹ Nihira ho an'i Yaveh reo fasa amy toy hira toy tamin-gny andro zay nanavotan'i Yaveh gnazy teo an-tanan'ireo fahavalony iaby, voho teo an-tanan'i Saoly i davida ² Nivavaky rozy hoe: " Yaveh ro vatolampy, fiarova mahery ho gnahy, lay raiky zay mamonjy gnahy. ³ Ndranagnahary ro vatolampiko. Mialoky eo aminy zaho. Ie ro fiarovako, lay tandroky gny famonjea gnahy, fiarova mafy ho gnahy, voho fialofako, lay raiky zay magnavotsy gnahy amin-gny heriloha. ⁴ Hikaiky an'i Yaveh, zay maeva gny ho hengea zaho, ka ho avotsy amin'ireo fahavaloko zaho. ⁶ Nanao tsikarioky gnahy koa gny talin-gny fiaigna tsy hita maso, namandriky gnahy gny fandrikin-gny faty. ⁷ Tamin-gny fijaleako ro nikaihako an'i Yaveh; nikaiky an-Dranagnahariko zaho; nahare gny feoko avy tao an-tempoliny Ie, sady avy teo an-tsofiny gny kaiky vonjiko. ⁸ La nihozo voho nihozongozo gny tany. Nihetsiketsiky voho voahozongozo gny fioregnan-gny lagnitsy, fotony meloky Ndranagnahary. ⁹ Niakatry avy tamin-gny vavorony gny setroky, sady afo meredareda ro nivoaky avy tamin-gny vavany. voarehitr'izay gny vain'afo. ¹⁰ Nisokafiny lagnitsy igny ka nilitsy agny ie. Fahiky faratampony gny tambanin-gny tombony ao. ¹¹ Niondra amin-gny Kerobima ie nitily. Mbamin-gny tsioky agnabo mbegny gny ahita gnazy. ¹² La nataony maiky gny magnodidy gnazy. Namory hiboky matevy agnabo egny ie. ¹³ Avy tamin-gny tselatra teo agnatrehany ro nilatrahan-gny bolo. ¹⁴ Yaveh nampikotrokotroky avy tany an-tagnitsy. Nikoraky mare lay Abo Indrindra. ¹⁵ Nandefa zana-tsipika Ie ka nampiely an-drozy fahavalony__nandefa helatsy mazava koa ie ka nagnaparitaky an-drozy ¹⁶ Bakeo la niseho iaby ndra gny tagnatin-gny riaky agny, nitsangavihavy gny fipetrahan-gny tany toy fa neloky faratampony sady la nisempotsy vatany Yaveh. ¹⁷ Nijotso bak'agnabo agny ie, namonjy gnahy. Naninto gnahy tsy hijotso amin-gny rano laliky ie. ¹⁸ Niaro gnahy tamin-gny mpagnenjiky gnahy mahery reo ie, tamin-gny olo malay gnahy reo fotony mahery olo reo amiko. ¹⁹ Nanohitsy gnahy rozy tamin-gny fahasahiragnako fe Yaveh ro nagnampy gnahy. ²⁰ Nanday gnahy amin-gny toera malalaky soa ie. Nivonjeny zaho fotony mazoto amiko ie. ²¹ Fa namaly soa tamin-gny fahamarinako Yaveh, nampoliny tamin-gny fahalivako taloha igny zaho. ²⁴ Fa tsy nanan-tsiny teo agnatrehany ihany koa, sady nitandry gny tenako tsy hanota zaho. ²⁵ Noho izay la nampolin'i Yaveh tamin-gny taloha tamin-gny refin-gny fahamarinako zaho, tamin-gny refin-gny fahaliovako teo imasony. ²⁶ Atoronao gn'olo matoky anao fa azo atokisa iha, sady atoronao gny tsy manan-tsiny koa fa tsy manan-tsiny iha, la maneho gny tenanao ho tsy manan-tsiny Iha. ²⁷ Amin-gny malio la maneho gny tenanao ho malio Iha, fa mivaliky amin'ireo mialokaloky Iha. ²⁸ Magnavotsy olo mijaly iha vo meloky amin-gny ze mirehareha ka la azetsikao rozy ²⁹ Iha ro jiro mampazava Yaveh. Mampazava gnahy amin-gny maiky. ³⁰ Fa noho Iha la afaky milay mihoatry gny Saka zaho; noho lay Ndranagnahariko la afaky mandinga rindry zaho. ³¹ Laha gny amin-Dranagnahary, tanteraky gny lalany. Malio gny safan'i Yaveh. Ie la fiarova ho gnan'ireo iaby zay mialoky eo Agnaminy. ³² Fa ia ro Ndranagnahary afa-tsy Yaveh, sady ia ro vatolampy afa-tsy gny Ndranagnahary? ³³ Ndranagnahary ro fialofako, sady mitariky gny olo tsy manan-tsiny amin-gny lalany Ie. ³⁴ Mampalaky gny tomboko manahaky gny diera Ie sady mametraky gnahy egny amin-gny vohitry abo. ³⁵ Zariny gny tagnako amin-gny aly Ie, voho gny sandriko hamoritry tsipiky varahina. ³⁶ Fa nameanao gnahy gny famonjeanao ka la gny hasoam-ponao koa miasa magnabe gnahy. ³⁷ Fa namboarinao soa gny famindran-gny tomboko ka fa tsy malemilemy zaho henanio ³⁸ Nagnea mpialy amiko reo, la nanorotoro an-drozy. Tsy nimpoly zaho laha tsy nitorotoro rozy iaby. ³⁹ Tsy afaky mitsanga sasy rozy fa zaho la namotipotiky an-drozy vatany. La hinitsakitsako rozy. ⁴⁰ Nameanao hery handesiko mialy amin-drozy zaho ka la napetrakao ambany tomboko eo gny mpialy amiko. ⁴¹ Nameanao gnahy gny hatokin-gny mpanohitsy gnahy reo, la namono gny malay gnahy zaho. ⁴⁴ Namonjy gnahy amin-gny grevy ntaon-gny vahoakiko reo iha, nataonao ho filohan-gny firenena maro zaho. Manompo gnahy iaby ndra gn'olo tsy haiko ⁴⁵ Nitere hihohoky amiko eto iaby gny vahiny. Laha vo nahare gny mikasiky gnahy rozy la nagnenky. ⁴⁶ Niboaky an-tahotsy bak'antragnon-drozy ao gny vahiny. ⁴⁷ Velo lahy Yaveh, dera gny vatolampiko. Rengeko gny Zagnahariko ie ro vatolampy mpamonjy gnahy. ⁴⁸ Ie ro Ndranagnahary tsy hita mamaly soa gnahy, nametraky vahoaky maro ambaniko eo. ⁴⁹ Niaro gnahy amin-gny mpialy amiko reo ie, nanondrotsy gnahy ho agnabon-gny mpanohitsy gnahy reo. Narovanao amin-gny johary mahery reo zaho ⁵⁰ Ka hagnomea fisaora ho gnanao amin-gny firenena reo eo zaho, Yaveh, hanao hira fandrengea gn'agnaranao zaho. ⁵¹ Ndranagnahary mampandresy gny mpanjakany voho namono gny tsy fivaliham-pagnenkeny amin-gny voahosotsy ie, ho gn'an'i Davida voho gny tarihany zisiky farany.