¹ Mana yi mwne ku koko di kitata di wu zakele ha kiti, bulu di ba soniki we munkati we kumpenze, di kele ba cha biniemini nsambwadi. ² Yi mwene mbasi yi ngolo yi tuku tendulu mu ndingi ngolo:" Na mene yi ngolo za ku yangulu buku we ku kungunu biniemini nsambwadi." ³ Kweku ata mutu ku zulu holo ha nsi mutoto, holo lowu ku nsi mutoto wu fene ku yangulu holo ku tanga buku. ⁴ Yi dididi bungi mu diambu ku monokenoko ata mutu fene mu ku yangulu buku holo ku tanga. ⁵ Mana mosi ha nkati ka minunu ka nkambawu:"Yaku didi! Tala Ntambu wu kikanda ki Bayuda, kikanda ki Tavidi wu nungini, fene ku yangulu buku we ku kungunu biniemini nsambwadi." ⁶ Mu nkati ka kiti ki di yalu we batu ba ya mana ha nkati ka minunu yi mwene mwana mukoko ka telemenewu kwakunu: Ka monokenewu nga wunu ba hondele. Ka kele misengu nsambwadi we mesu nsambwadi mi tuku songisi mampefu nsambwadi ka hitikidi Nzambi ha nsi mutoto. ⁷ Yi ka chetukele, mana yi ka bongele buku ku koko di kiyakala di wu kele zakelewu ha kiti ki kimfumu. ⁸ Tangu ka bongele mwana mukoko buku, batu ba ya we minunu ma ku molo yi ya yi ba fokomene ku di se di yandi. Ba kele mosi mutu we mbele we mbungu yi wolo yi kele munkati yi wenge di di tuku songidi bisambu bi ba ba tambusulu ndingi Nzambi. ⁹ Ba yimbidiwu mukungu mpa; "Nge fene mu ku bongo buku we mu ku kungunu biniemini, mu diambu nge ke ba ku hondele, we menge ma nge wu bongele ku Nzambi batu ba bikanda biakulu, mandingi makulu, batu bakulu we ma nsi makulu. ¹⁰ We ba ba sidi mu kimfumu ki mosi yi ba nganga-Nzambi mu kisalu ki Nzambi, mana ba yala ha nsi mutoto." ¹¹ Di hiki, yi tadidi we yi wudi ndingi yi mambasi ma vulu vulu mu lweke di kiti ki kimfumu we batu we minunu. Ntalu bawu mu kimvuku yi kele mafundu yi mafundu we mafundu di hiki. ¹² Ba hoyelewu mu ndingi ngolo:" Mwana mukoko ba hondele fene mu ku bongo ngolo, nduku, kimvwama we mukembu. ¹³ Yi wudi biakulu bini kasadidi Nzambi yi kele ku zulu, we ha nsi mutoto, we ku nsi mutoto, mumamba we biakulu bi kalawu mwamunu bi hoyele:" Mukembu, sikisi we kimfumu wu wene ha ntandu kiti ki kimfumu we ku mwana mukoko mu diambu di kimakulu." ¹⁴ Batu ba ya ba hoyelewu: "Ku kala bwabunu," Mana minunu mi fokomene mi tuku sambidi.