¹ Mu ntangu yu mosi ga kati kibenu wena ye mayuma ye wunkaka, keti sikenda ku mfundu kuna kuena muntu ka luikilaku, mu sa nde kenda nkutu kuna kuena ba bakuikila ? Keti benu kaluzeyiku nde bana bakuikila si bafundisa nza ² ? Ye go benu si lufundisa nza, keti kaluena bafuanaku benu mu kumanisa mambu ma makondolu mfunu ? ³ Keti benu kaluzeyiku nde betu si tifundisa ba mbasi ? ⁴ Go benu si lufundisa mambu ma luzingu lukonsu ntangu, mudiambu dinki luta landila mambu momu mena ga kati ka bantu bakondolu mfunu mu dibundu? ⁵ Monu ntedi mambu momu mudiambu di nsoni zenu. Keti ga kati kibenu ga nkatu muntu wena ye nduenga zi mbidi mu sa nde kamanisa mambu mena ga kati ki zimpangi? ⁶ kansi bonsu buta lutila mambu bubu, yuwukuikila ta funda yu wunkaka wukuikila, ye mambu momu medi ku mfundisi yu kakuikilaku. ⁷ Bukiena nde mayuma mena gana kati ki minkuikisi udina benu kalununginiku. Mudiambu di nki ka lulendi tambudila mpasi ku mudiambu di nkanu? Mudiambu di nki kalulendi kiyambula ku ba luwuna ? ⁸ Kansi benu lukuamisi ye wuna ba nkaka, ye bawu bena ba mpangi benu kibeni. ⁹ Keti benu kaluzeyiku nde yu kondolu lunungu kasi kabaka ki mfumu ki Nzambi ku? Ka lukukila mambu ma luvunu ku. Ba bagondanga tongu, basambilanga biteki, ba nkua kinsunsa, basalanga kindumba ye bawu ba kuelananga bawu ye bawu. ¹⁰ Mi yibi, bankua kikokotu, binue malafu, ba finganga bantu ye badianga bongu za luvunu(ka yu mosiku mu bawu si wu baka ki mfumu ki Nzambi. ¹¹ Ye mudina bukadila bankaka ga kati ki benu. Kansi benu lua sukulua, lua nungusua, benu luakuma ba lunungu kua Nzambi mu nkumbu Yesu Klistu ye mu Mpefi Nzambi etu. ¹² "Makulu ena yamu luve" Kansi makulu kamena mfunu ku. "Lakulu mena yamu luve" Kansi monu kilendi kiyambula ku yi yalua kua biawu. ¹³ "Madia mena mudiambu di kivumu ye kivumu kiena mudiambu di madia" Kansi Nzambi si kafuasa bia biodi. Nitu kayena mudiambu di kinsunsa ku. Kansi nitu yena yi Mfumu, ye Mfumu si kasingika nitu. ¹⁴ Nzambi watu futumuna kumosi ye Mfumu, ye yani si katufutumuna diaka betu mu lendu kiani. Ket benu kaluzeyiku nde nitu zenu zena ndambu za Klistu? ¹⁵ Keti monu si ngie baka ndambu za nitu Klistu u kuvukisa yo ye bankua kinsunsa? Bika mana ka makalaku! ¹⁶ Keti benu kaluzeyiku nde yuna wukivukisi yi nkua kinsunsa yani kumini nitu mosi ye yani. Bonsu butanga masonuku:"Babodi si bakuma nitu mosi". ¹⁷ Kansi yuna wukivukisi ye Mfumu kumini ye Mpefi mosi ye yani. ¹⁸ Lutina nkadulu za kinsunsa! Masummu ma nkaka ma natanga muntu makalanga mukati ki nitu ani ku, kansi yuwukigananga wu sumunanga nitu yani mosi. ¹⁹ Keti benu kaluzeyiku nde nitu yi kinlongu kia Mpeve ya nlongu, kiki vondanga mu benu mu benu, ki lubaka kua Nzambi? Keti benu kaluzeyiku nde benu ka luvuilu ku benu kibeni ku? ²⁰ Kadi benu lua sumbua mu ntalu. Yidina luzitisa Nzambi mu nitu zenu.