¹ Pa kõdãnë, pu u pa se kõdãnë, ² Pase ke mem fom ki u ka kõdãnë, i ke mem mizu ki u ka mizuhe uot ie ke mizuhe u osi. ³ Pukisa u ue fuifui ki la uei dji u fue i u pa ue sa ki la u phop uei? ⁴ kumã u ke dji pu u fué "lese mo txihe fuifui ki la u uei" si li gãië fuifui lãdã u phop uei! ⁵ Hipokhita? txihe phõmië fuifui dji u uei! Ëbe u ke ue kle pu txihe fuifui dji u fue so uei. ⁶ Pa bai sa ki së pu xë-iela, pa jite bagaj dji valé pu koxõ-iela, pase koxõ- iela ke djibut ãle bagaj dji valé, i xë-iela ke vini kõt u ie ke atake u. ⁷ Dumãde zot ke husuve; sa ki ka sase ke thuve; bat i lapot-la ke luvui. ⁸ Pase sa ki ka dumãde ke husuve, mun ki ka sase ke thuve, sa ki bat lapot li ke luvui. ⁹ Ki mun ki ãt zot, ki se so pitxit dumãde djipë , li ke bai un hox? ¹⁰ Si dumãde puasõ, li ke bai un siapã? ¹¹ Si zot tuju mixã, sase bai bõ kado pu zot pitxit, Kã zot Papa ki Lahosiel , bai bõ bagaj pu sa ki ka dumãde! ¹² Pase tut sa ki u le ki uot fe, zot fe osi kõsa: pase sa a alpha dji Phofeta-iela. ¹³ Ãthe pu lapot ki exthuet, pase laj a lapot, ki ghã pase a ximë ki ka pote pu Kõdënasiõ, i boku mun ka ãthe. ¹⁴ Pase exthuet a lapot-la, i sehe a ximë ki ka pu lavi , i a kote tximoso ke ãthe. ¹⁵ Ãtãsiõ, ke phofeta ki ke vini ke lëj dji mutõ, më ãdjidã a xë ki mixã. ¹⁶ Zot konet pu so fui-iela: li posib hamase uva dji plã ki gãië pikã o u ke hamase figo dji pie zutxi. ¹⁷ kõsa tut bõ pie-bua ka bai bõ fui, më pie-bua ki pa bõ pa ka bai bõ fui. ¹⁸ Pie-bua ki bõ pa puve bai fui ki pa bõ, i osi pie-bua ki pa bõ pa puve bai bõ fui. ¹⁹ Tut pie-bua ki pa ka bai bõ fui ie ke kupe'l i jite lãdã djife. ²⁰ Zot ke konet, pu so fui-iela. ²¹ A pa nëpot mun ke dji pu mo: "Sëie, Sëie" ke ãthe la lasosiete dji lahosiel, më ui sa mun ki ka fe volõte dji no Papa ki Lahosiel. ²² Kã sa ju-la ke hive, boku mun ke dji pu mo: "Sëie, Sëie " pu povua dji u nõ no pase mësaje dji Bõdje, no txihe demuë i no fe boku mihak! ²³ Mo ke hepon:" Mo pa konet zot! hete luë dji mo, zot ki ka fe djimal." ²⁴ Tut sa ki ka kute mo pahol, i viv kumã li ka dji mo ka kõpahe kumã un om ki ïtelijã ki leve so kaz lasu un hox. ²⁵ ke tõbe lapli, djilo-la ke vini gho, i vã-la ke sufle ke fos kõt kaz-la. Më li pa tõbe, pase li te edjifike lasu hox-la. ²⁶ Më tut ki ka kute mo pahol i pa ka viv kumã li ka dji mo ka kõpahe kumã un om ki fu ki fe so kaz lasu ban-sab. ²⁷ ke tõbe lapli djilo-la ke vini gho, i vã-la ke sufle ke fos kõt kaz-la. Kaz-la tõbe i hete dethi totalmã. ²⁸ Kã Jezi fini dji kose, mun-iela hete susphan ke so mãië dji mõthe. ²⁹ Jezi te ka mõthe kumã un mun ki gãië otohite, i nõ kumã met dji lalua-iela.